The Phnom Penh Post Search

Search form




Logo of Phnom Penh Post newspaper Phnom Penh Post - ស្ត្រីខ្មែរ​កាន់​តែច្រើន​ យល់ដឹង​អំពី​បក​រោម​ល្វែង​ក្រោម




ស្ត្រីខ្មែរ​កាន់​តែច្រើន​ យល់ដឹង​អំពី​បក​រោម​ល្វែង​ក្រោម

Content image - Phnom Penh Post
ក្រៅ​ពីការ​បករោម​ប៊ីគីនី ការ​បករោមដៃ​ ជើង មុខ ចិញ្ចើម និង​ក្លៀក​ក៏​ពេញនិយម​ដែរ​។ ឈឹម ស្រីនាង

ស្ត្រីខ្មែរ​កាន់​តែច្រើន​ យល់ដឹង​អំពី​បក​រោម​ល្វែង​ក្រោម

ភ្នំពេញ: ផ្ទុយ​នឹងពាក្យ​ពោល​តៗគ្នា​ថា ស្ត្រី​អត់រោម​ល្វែង​ក្រោម​គឺ​ចង្រៃ​នោះ ស្ត្រី​ខ្មែរ​កាន់តែ​ច្រើន​នាពេល​បច្ចុប្បន្ន​បាន​ជ្រើសរើស​យកការ​ជម្រុះ​ស្មៅ​នៅ​តំបន់​ត្រីកោណ ដោយ​ការកាត់ កោរ ឬបក​ជម្រះ​ឲ្យ​ត្រងោល ជាដើម។

ប៉ុន្តែ​ការសម្អាត​រោម​ដោយ​ខ្លួនឯង​ត្រូវបាន​អ្នកឯកទេស​ណែនាំ​ថា វាមិន​បាន​ស្អាត​ល្អ គ្រប់​ជ្រុងជ្រោយ អាច​ប្រឈម​ការមុត ឬរមាស់​ពេល​រោមដុះ​ឡើង​វិញ។ មូលហេតុ​នេះហើយ ទើប​ស្ត្រី​កាន់តែ​ច្រើន​ហ៊ាន​ជម្រុះ​ភាព​ខ្មាសអៀន ប្រគល់​នាទី​សម្អាត​ល្វែង​ក្រោម​នេះឲ្យ​អ្នកជំនាញ​វិញ។

អ្នកនាង មឿន ស្រីភ័ក្ត្រ អ្នក​ព្យាបាល​ឯកទេស​ប្រចាំ​មជ្ឈមណ្ឌល Attirance បាន​និយាយ​ថា៖ «ខ្ញុំ​ធ្វើការ​នៅ​មជ្ឈមណ្ឌល​នេះ​តាំងពី​ឆ្នាំ ២០១០ មក​ម្ល៉េះ កាល​ពីមុន​គឺមិន​សូវ​ជាមាន​ការចាប់អារម្មណ៍​ពីស្ត្រី​ខ្មែ​មកបក​រោម​ក្រោម​នោះទេ ភាគច្រើន​សុទ្ឋតែ​ជា​ជនបរទេស ចំពោះ​ស្ត្រី​ខ្មែរ​វិញ​គឺគាត់​ពេញនិយម​តែបក​រោមក្លៀក​តែប៉ុណ្ណោះ រហូត​មកដល់​ឆ្នាំ ២០១៣ គឺស្ត្រី​ខ្មែរ​យើង​គាត់​ពេញនិយម​បក​ក្លៀក​ខ្លាំង និង​បក​រោម​ក្រោម​នោះ​មួយៗ​ប៉ុណ្ណោះ»។

អ្នកនាង​បាន​កត់សម្គាល់​ទៀត​ថា៖ «បើ​និយាយ​ពីការ​យល់​ដឹង និង​ទទួលស្គាល់​ពីកា​របក​រោម​ខាងក្រោម​គឺពី​ឆ្នាំ ២០១៥ ច្រើន​បន្តិច ហើយ​នៅ​ឆ្នាំ ២០១៧ នេះ​គឺមាន​ការនិយម​ច្រើន​ខ្លាំង​មែនទែន​ពីការ​បករោម​ខាងក្រោម​នេះ​ដោយសារ​តែគាត់​មានការ​យល់ដឹង​អំពី​បញ្ហា​សុខភាព​របស់​គាត់ ចំពោះ​ការ​បករោម​គឺ ធ្វើ​ឲ្យគាត់​ងាយស្រួល​សម្អាត​បាន​ស្អាត​ល្អ មិន​ធុំក្លិន និង​មាន​អារម្មណ៍​ស្រឡះ​ស្រួល»។

ស្ត្រីខ្មែរ​មក​ទទួល​សេវា​នេះ​ភាគច្រើន​មាន​វ័យ ២៥ ឆ្នាំ​ឡើង តែ​ក៏មាន​ភ្ញៀវ​ក្មេង​អាយុ​ខ្ទង់ ១៨ ឆ្នាំ ដែល​មិនសូវ​ខ្មាសអៀន និង​យល់ដឹង​ពីការ​ថែរក្សា​តំបន់​អាថ៌កំបាំង​នេះដែរ។ ការ​បករោម​ក្រោម ឬបក​រោមប៊ីគីនី​នេះ​មាន​តម្លៃ ២៧ ដុល្លារ។

Content image - Phnom Penh Post
ការ​បករោម​ល្វែង​ក្រោម​នាំ​មកនូវ​អនាម័យ​។ រូប សហការី

អ្នកជំនាញ​រូបនេះ​ឲ្យដឹង​ទៀត​ថា៖ «ជួនកាល​ពួកគាត់​នៅ​អៀនខ្មាស​ច្រើន​ទំរាំ​ដាច់ចិត្ត​ឲ្យខាង​ខ្ញុំបក​ជូន​គាត់។ អ៊ីចឹង​ពួកយើង​ព្យាយាម​ពន្យល់​ពីការ​បករោម​នេះ​គឺវា​មិន​ប៉ះពាល់​ដល់​សុខភាព​ទេ​តែវា​ជួយ​សម្អាត​ប្រដាប់ភេទ​របស់​យើង​កុំឲ្យ​មាន​ក្លិន​ឬជាប់​បាក់តេរី​បន្ទាប់ពី​យើង​បន្ទោបង់​រួច​គឺវា​នៅ​ជាប់​ក្លិន​នៅតាម​រោម ធ្វើ​ឲ្យមាន​អនាម័យ ស្រួល​ស្លៀក​ឈុត​ប៊ីគីនី និង​មិន​ទើស​ទាល់​ពេល​មាន​រដូវ»។

យ៉ាងណា​វិធីសាស្ត្រ​នេះ​ក៏អាច​មានការ​ឈឺចាប់​តិចតួច​ដែរ ប៉ុន្តែ អ្នកនាង មឿន ស្រីភ័ក្ត្រ អះអាង​ថា៖ នៅពេល​ដែល ឆ្លងកាត់​ការ​បករោម​ពីរបី​ដងនោះ អ្នក​បករោម​នឹង​លែង​មាន​អារម្មណ៍​ឈឺ​អំឡុង​ពេល​បក​រោម​លើក​ក្រោយៗ​ទៀត។ ស្នាម​ក្រហម​នៅលើ​ស្បែក​ក្រោយពី​បក​រោម​រួច​ក៏នឹង​បាត់​នៅ​ថ្ងៃ​បន្ទាប់ ហើយ​រាងកាយ​នឹង​រក្សា​ភាព​រលោង​គ្មាន​រោម​រហូតដល់ ៣ សប្ដាហ៍។

ព័ត៌មាន​បន្ថែម​ទាក់ទង​លេខ ០១៦ ៧៧៦ ៣៥៣៕

Content image - Phnom Penh Post
ផលិត​ផល​បក​រោម​ពីបារាំង​ពន្យឺត​ការ​ដុះរោម​​​។ ឈឹម ស្រីនាង

អត្ថបទគួរចាប់អារម្មណ៍