.jpg)
ស្ត្រីមានផ្ទៃពោះអាចទទួលបានអត្ថប្រយោជន៍បន្ធូរភាពតានតឹងសម្រួលសាច់ដុំ និងចរន្តឈាមពីការស្ប៉ា។ រូបថត សហការី
ភ្នំពេញៈ ជាមួយក្លិនប្រហើរនៃរុក្ខជាតិជាច្រើនមុខ និងក្លិនគល់ស្លឹកគ្រៃសាយភាយពេញអគារគួបផ្សំជាមួយភ្លេងខ្មែរយ៉ាងពីរោះរណ្តំនៅ បូឌា ស្ប៉ា ស្ថិតនៅផ្លូវលេខ ៣៥២ សង្កាត់បឹងកេងកង ១ អ្នកម្ដាយកំពុងតែពពោះ អាចមកបន្ធូរភាពតានតឹង សម្រួលសាច់ដុំ និងចរន្តឈាមតាមរយៈការស្ប៉ាសម្រាប់ស្ត្រីមានគភ៌។
អ្នកស្រី វ៉ាន់ បុប្ផាភួង (Vann Bopha Phourng) វ័យ ៣៧ ឆ្នាំជាអ្នកគ្រប់គ្រង បូឌា ស្ប៉ា បានថ្លែងប្រាប់ភ្នំពេញ ប៉ុស្តិ៍ ថា៖ «បូឌា ស្ប៉ា មិនត្រឹមតែមានស្ប៉ាសម្រាប់មនុស្សធម្មតានោះទេ ប៉ុន្តែក៏មានសេវាកម្មពិសេសមួយសម្រាប់អ្នកមានផ្ទៃពោះដូចគ្នា ជាក្បាច់ពិសេសដែលខាងយើងបង្កើតឡើងដោយខ្លួនឯងសម្រាប់អ្នកមានផ្ទៃពោះតែម្តង»។
បូឌា ស្ប៉ា បើកដំណើរការរយៈពេល ១៣ ឆ្នាំមកហើយដែលក្នុង ១ ថ្ងៃ បូឌា ស្ប៉ា ទទួលបានភ្ញៀវចម្រុះជាតិសាសន៍ចំនួន ៥០ នាក់ទៅ ៨០ នាក់ និងមានការបែងចែកជា ២ សេវាកម្មមានផ្នែកសុខភាព និងសម្រស់ក្នុងតម្លៃស្ប៉ា ១ ម៉ោងចាប់ពី ៣០ ដុល្លារដល់ ៦៥ ដុល្លារ។
អ្នកស្រី ស៊ឹម សៅវន្តី វ័យ ៣១ ឆ្នាំជាគ្រូបង្រៀនផ្នែកស្ប៉ាដែលមានបទពិសោធ ១១ ឆ្នាំក៏បានឲ្យដឹងដែរថា៖ «ចំពោះអ្នកដែលគាត់មានផ្ទៃពោះគាត់តែងតែមានអារម្មណ៍តានតឹងខុសពីមនុស្សធម្មតា។ អ៊ីចឹងគាត់គួរតែមកទទួលសេវាកម្មស្ប៉ាក្នុង ១ អាទិត្យ ២ ដងសម្រាប់អ្នកធ្វើការនៅក្រុមហ៊ុន។ ប៉ុន្តែបើសិនជាស្ត្រីមានផ្ទៃពោះដែលមិនធ្វើការហើយនៅផ្ទះគាត់អាចធ្វើស្ប៉ា ១ អាទិត្យម្តងបានហើយ ដោយសារគាត់មិនសូវមានភាពស្មុគស្មាញដូចអ្នកធ្វើការនោះទេ»។
ចង្វាក់នៃការស្ប៉ាសម្រាប់អ្នកមានផ្ទៃពោះ បូឌា ស្ប៉ា ប្រើក្បាច់ប្រភេទ Pregnancy Post ជាក្បាច់ដែលបង្កើតឡើងសម្រាប់អ្នកមានផ្ទៃពោះចាប់ពី ៤ ខែឡើងទៅ។
បន្ទប់ស្ប៉ាប្រកបដោយផាសុកភាពនៅ បូឌា ស្ប៉ា ដែលមានសេវាពិសេសសម្រាប់ស្ត្រីមានផ្ទៃពោះ។ហេង ជីវ័ន
ចំណែកប្រេងដែលត្រូវប្រើក្នុងការស្ប៉ាមិនប្រើប្រាស់ប្រេងដែលមានក្លិននោះទេចៀសវាងការប៉ះពាល់ដល់ការលូតលាស់របស់ទារក។
អ្នកគ្រូបង្ហាត់ពីរបៀបស្ប៉ា ស៊ឹម សៅវន្តី ក៏បានបង្ហាញពីការស្ប៉ាចំពោះអ្នកមានផ្ទៃពោះបន្ថែមដូច្នេះទៀតថា៖ «ដំបូងយើងឲ្យគាត់គេងផ្អៀងខ្លួន ព្រោះអ្នកមានផ្ទៃពោះមិនអាចស្ប៉ាដោយគេងផ្កាប់មុខទៅក្រោមដូចមនុស្សធម្មតាបានទេ។ បន្ទាប់យើងយកខ្នើយមកទ្រក្បាលពោះ និងទ្រនៅត្រង់កន្លាក់ជើងដូចជាមនុស្សឱបខ្នើយឱបព្រមទាំងរៀបចំគ្របកន្សែងនៅលើខ្លួនគាត់ ឲ្យគាត់មានអារម្មណ៍ថា ស្រួលខ្លួនសិន ហើយក៏ចាប់ផ្តើមធ្វើចលនាស្ប៉ាចាប់ពីមួយចំហៀងខ្នងទៅរហូតដល់ពេញមួយចំហៀងខ្លួន និងឲ្យគាត់ប្រែមួយចំហៀងទៀត ដើម្បីស្ប៉ា»។
ស្ត្រីមានគភ៌គាត់ត្រូវគេងផ្ងារដោយមានខ្នើយកល់ឲ្យជើងខ្ពស់ជាងក្បាលពោះនៅត្រង់កន្លាក់ជង្គង់ និងកែងជើង ដើម្បីកុំឲ្យទារកធ្វើចលនា។
បន្ទាប់មកអ្នកជំនាញនឹងចាប់ផ្តើមធ្វើចលនានៅលើក្បាលពោះរបស់គាត់ ដោយប្រើដៃអង្អែលបង្វិលថ្នមៗយឺតៗដែលអ្នកជំនាញអះអាងថាជាចលនាបីដូចជាការដាស់ទារកក្នុងផ្ទៃមកទទួលការស្ប៉ាជាមួយម្តាយដែរ។
អ្នកជំនាញស្ប៉ារូបនេះរៀបរាប់ពីអត្ថប្រយោជន៍នៃការស្ប៉ាទៀតថា៖ «នៅពេលដែលស្ត្រីមានផ្ទៃពោះមកទទួលសេវាកម្មស្ប៉ា និងទទួលបានអត្ថប្រយោជន៍ជាច្រើនដែលអាចជួយបន្ធូរអារម្មណ៍តានតឹងដល់ម្តាយជួយសម្រួលសាច់ដុំ និងចរន្តឈាមឲ្យដើរស្រួល»។
អ្នកស្រី ស៊ឹម សៅវន្តីអ្នកជំនាញស្ប៉ាបានបន្ថែមថា៖ «មិនត្រឹមតែទទួលបានលទ្ធផលនេះដល់មាតានោះទេ ថែមទាំងអាចជួយសម្រួលដល់ទារកនៅក្នុងផ្ទៃទៀតផងដូចជាការធ្វើលំហាត់ប្រាណរួមគ្នា និងទទួលបានអារម្មណ៍ស្រស់ស្រាយ»៕
