.jpg)
ស្រោមអនាម័យ Durex ដាក់លក់នៅផ្សារទំនើប។ រូបថត AFP
ក្រុងឡុងដ៍: ផ្សារទំនើបយក្ស Tesco បានប្រកាសប្រមូលផលិតផលស្រោមអនាម័យយីហោ Durex ក្រោយពីបរាជ័យការធ្វើតេស្ដរហែក។ ដោយដាក់តាំងស្លាកសញ្ញាតាមកញ្ចក់ហាងរបស់ខ្លួន ផ្សារទំនើបបានទទូចឲ្យអតិថិជនត្រួតពិនិត្យផលិតផលម៉ាក Durex Real Feel និង Durex Latex Free។
អតិថិជនត្រូវបានលើកទឹកចិត្ដឲ្យត្រួតពិនិត្យកាលបរិច្ឆេទនៅផ្នែកខាងក្រោមកញ្ចប់ និងខ្សែកងស្រោបស្រោមនីមួយៗ។ អ្នកដើរផ្សារដែលទិញចំផលិតផលប្រមូលចូលស្ដុកវិញអាចយកមកប្ដូរប្រាក់វិញនៅហាង កន្លែងដែលពួកគេបានទិញ។
ផលិតផលដែលត្រូវបានប្រមូលចូលឃ្លាំងវិញមានប្រអប់ស្រោម Durex Real Feel ១២ កញ្ចប់ដែលមានកូដ 1000444370 និងកាលបរិចេ្ឆទខែកុម្ភៈ ឆ្នាំ ២០២១ និងផលិតផលប្រអប់ Durex Latex Free ១៨ កញ្ចប់ កូដ 1000430479 ថ្ងៃបរិច្ឆេទខែមករា ឆ្នាំ ២០២១។
សេចក្ដីថ្លែងការណ៍មួយពីវេបសាយ Durex បានឲ្យដឹងថា៖ «ស្រោមអនាម័យរបស់យើងត្រូវបានផលិតឡើងដើម្បីជាមធ្យោបាយពន្យារកំណើត និងការពារជំងឺឆ្លងតាមការរួមភេទតាមរយៈរបាំងការពារមិនមែនជ័រកៅស៊ូស្វិតដែលផ្ដល់អត្ថប្រយោជន៍ជាច្រើនដល់អតិថិជនជួបអាលែកហ្ស៊ីនឹងជ័រ។
សេចក្ដីថ្លែងការណ៍បន្ដថា៖ «មានតែស្រោមមួយចំនួនប៉ុណ្ណោះដែលត្រូវប្រមូលចូលស្តុកវិញ ពីព្រោះវាអាចធ្វើឲ្យរហែកពេលប្រតិបត្ដិការ»។
ក្រុមហ៊ុនបានណែនាំដល់អតិថិជនឲ្យប្រឹក្សាយោបល់ពីវេជ្ជបណ្ឌិត ឬឱសថការីតាមដែលអាចធ្វើទៅបាន និងមិនលើសពី ៧២ ម៉ោងបើជួបឧប្បត្ដិហេតុស្រោមរហែក៕ HR
