ក្រុងប្រេស៊ីលីយ៉ា: ក្រុមគ្រូពេទ្យផ្នែកវះកាត់នៅសាលាសម្ភព Assis Chateaubriand Maternity ប្រទេសប្រេស៊ីលបានធ្វើឲ្យពិភពលោកភ្ញាក់ផ្អើលជាមួយបច្ចេកទេសវះកាត់ច្នៃបង្កើតរន្ធទ្វារមាសដោយការប្រើស្បែកត្រីលើស្ដ្រីដែលប្រសូតមកដោយគ្មានកស្បូន ស្បូន ឬអូវ៉ារី។
មុនពេលប្រើស្បែកត្រីត្រូវបានសម្អាតយ៉ាងយកចិត្ដទុកដាក់ និងសម្លាប់មេរោគតាមរយៈកាំរស្មីដើម្បីកម្ចាត់មេរោគនានា។ នីតិវិធីនេះបានយកស្រកា និងក្លិនឆ្អាបពីត្រីដោយបន្សល់ទុកនូវស្បែកសម្បុរស្លេក និងអាចរក្សាទុកក្នុងទូទឹកកកបាន ២ ឆ្នាំ។
ហេតុអ្វីវិធីសាស្ដ្រស្បែកត្រីត្រូវបានយកមកប្រើ?
វិធីសាស្ដ្រស្បែកត្រីត្រូវបានចាត់ទុកជាវិធីប៉ះពាល់តិចតួចជាងមធ្យោបាយបុរាណដែលបង្កើតរន្ធទ្វារមាសដោយការប្រើស្បែកចៀរចេញពីក្រលៀនរបស់អ្នកជំងឺផ្ទាល់។
ការវះកាត់ប្រើស្បែកត្រីឆាប់ជាដោយអត់មានស្លាកស្នាម ឬហានិភ័យមិនសះស្បើយ ឬឆ្លងមេរោគអ្វីឡើយ។
អ្នកជំងឺអាចដើរបានរយៈពេល ១២ ថ្ងៃ ខណៈការវះកាត់បែបបុរាណដែលយកស្បែកក្រលៀន ឬលឹង្គពន្លាត់ចូលក្នុងធ្វើជារន្ធយោនីតម្រូវឲ្យអ្នកជំងឺចំណាយពេលរាប់សប្ដាហ៍លើគ្រែពេទ្យ និងត្រូវការពេលរៀនដើរជាថ្មីផងដែរ។
តើការប្រើប្រាស់ស្បែកត្រីច្នៃធ្វើជាទ្វារមាសសិប្បនិម្មិត វាពាក់ព័ន្ធនឹងនីតិវិធីអ្វីខ្លះ?
ដើម្បីបង្កើត «ទ្វារមាសថ្មី» វេជ្ជបណ្ឌិតដាក់បញ្ចូលពុម្ពទម្រង់ជាប្រដាប់ភេទ អមដោយស្បែកត្រីទីឡាព្យា នៅចន្លោះប្លោកនោម និងចុងពោះវៀនធំ។ វត្ថុជំនួយទាំងនោះត្រូវបានរក្សាទុកក្នុងរន្ធរយៈពេល ១០ ថ្ងៃដើម្បីទប់ជញ្ជាំងទ្វារមាសរួមខ្ជិប។
អំឡុងពេលមានរដូវ ស្បែកត្រីទីឡាព្យាត្រូវបានស្រូបចូលហើយកោសិកា និងសាច់ដុះលូតលាស់ភ្ជាប់នឹងសាច់ធម្មជាតិដើម្បីប្រែក្លាយជាល្បាយតែមួយ។ ស្បែកត្រីជួយបណ្ដុះកោសិកាស្បែកមនុស្ស និងទម្រង់សរសៃឈាមព្រមទាំងបង្កើតជាប្រឡាយទ្វារមាសថ្មីដែលមានសណ្ឋានដូចនឹងប្រដាប់ភេទនារីពិតៗ។
តើហេតុអ្វីត្រូវប្រើស្បែកត្រីទីឡាព្យា?
ត្រីទីឡាព្យា សម្បូរនៅតាមដងទន្លេ និងកសិដ្ឋានទូទាំងប្រទេសប្រេស៊ីល។
វាផ្ទុកជាតិសំណើមច្រើន និងសម្បូរខូឡាជេនដែលជួយឲ្យឆាប់ជាសះស្បើយ។
ស្បែកត្រីនេះក៏មានសារធាតុប្រឆាំងជំងឺ និងស្វិតមិនចាញ់ស្បែកមនុស្សនោះទេ។
ស្បែកត្រីទីឡាព្យា ធ្លាប់ត្រូវបានប្រើដើម្បីព្យាបាលជនរងគ្រោះដោយការរលាកជាង ២០០ នាក់ដោយអត់ប្រើស្បៃដែលត្រូវតែផ្លាស់ប្ដូរជាប្រចាំនោះឡើយ៕ HR