ភ្នំពេញ : ស្រោមអនាម័យអូកាម៉ូតុ (Okamoto) ដែលបំបែកឯតទគ្គកម្មពិភពលោកខាងស្ដើងជាងគេបំផុតនោះ បានរៀបចំពិធីរំឭកខួបទី៨០របស់ខ្លួន នៅសណ្ឋាគារ កាំបូឌីយ៉ាណា កាលពីថ្ងៃទី៥ ខែមេសា សប្ដាហ៍កន្លងទៅនេះ។
ថ្លែងក្នុងពិធីនេះ លោកវេជ្ជបណ្ឌិត លឹម ហួរពៅ នាយកប្រតបត្តិនៃក្រុមហ៊ុន Full Well Trading (Cambodia) Ltd បានឲ្យដឹងថា អូកាម៉ូតុ បានចូលរួមយ៉ាងសកម្មក្នុងការកាត់បន្ថយការឆ្លងរីករាលដាលនៃជំងឺអេដស៍ និងកាមរោគក្នុងប្រទេសកម្ពុជាក៏ដូចជាបានទទួលអាជ្ញាប័ណ្ណពីក្រសួងសុខាភិបាល ក្នុងការចែកចាយលើទីផ្សារជាផ្លូវការក្នុងដើមឆ្នាំ២០០៤។
លោកបានឲ្យដឹងទៀតថា៖ «វត្តមានរបស់អូកាម៉ូតុនៅកម្ពុជា អាចរួមចំណែកក្នុងការទប់ស្កាត់ និងកាត់បន្ថយការចម្លងមេរោគអេដស៍ ដែលរីករាលដាលក្នុងប្រទេសនេះចាប់តាំងពីឆ្នាំ១៩៩០។ ទន្ទឹមនឹងនោះ ស្រោមអនាម័យអូកាម៉ូតុ ក៏ដើរតួនាទីយ៉ាងសំខាន់ក្នុងការពន្យារកំណើតផងដែរ»។
រយៈកាល១ទសវត្សរ៍ក្រោយប្រតិបត្តិការលក់នៅប្រទេសកម្ពុជា ត្រូវបានលោកឲ្យដឹងថា៖ «រហូតមកដល់ពេលនេះ អូកាម៉ូតុ ត្រូវបានចែកចាយនៅលើទីផ្សារទូទាំង២៤ខេត្តក្រុងក្នុងប្រទេសកម្ពុជា ដែលក្នុងនោះវាទទួលបានការពេញនិយមបំផុតនៅរាជធានីភ្នំពេញ»។
ផលិតនៅប្រទេសជប៉ុនតាំងពីឆ្នាំ១៩៣៤ និងចែកចាយនៅប្រទេសកម្ពុជាដោយក្រុមហ៊ុនខាងលើ អូកាម៉ូតុបានបំបែកឯតទគ្គកម្មរបស់កំណត់ត្រាហ្គីណេសជាស្រោមអនាម័យដ៏ស្តើងបំផុតក្នុងលោក កាលថ្ងៃទី២១ ខែមករា ឆ្នាំ២០១២។
ក្នុងនោះមានស្រោមចំនួន៤ប្រភេទរបស់ក្រុមហ៊ុនដែលឈរឈ្មោះក្នុងបញ្ជីកំណត់ត្រាគឺប្រភេទ អូកាម៉ូតុ 003 Platinum, 003 Real Fit, 003 Aloe និង 003 HA (ហាយ៉ារ៉ូនីកអាស៊ីត)។
អូកាម៉ូតុ គឺជាក្រុមហ៊ុនដែលទទួលសិទ្ធិផ្ដាច់មុខខាងផលិតស្រោមអនាម័យពីជាតិ Sheerlone ដែលស្ដើងទន់ មិនក្ដៅ រលាក និងគ្មានសារធាតុគីមីប៉ះពាល់ដល់សុខភាព។ កត្តាទាំងនេះដើរតួយ៉ាងសំខាន់ក្នុងការទាក់ទាញអតិថិជនឲ្យប្រើប្រាស់វាដើម្បីពន្យារកំណើត ក៏ដូចជាការទទួលការរួមភេទប្រកបដោយសុវត្ថិភាព និងបង្ការជំងឺកាមរោគផ្សេងៗ៕
