ក្រុងញូវយ៉ក: ការសិក្សាថ្មីមួយបានបង្ហាញថា បាត់វេលាដំណេក ២ ម៉ោងក្នុង ១ រាត្រីអាចធ្វើឲ្យអ្នកកាន់តែក្រេវក្រោធ។ វាជាលើកដំបូងនៃទំនាក់ទំនងផ្ទាល់ត្រូវបានបញ្ជាក់រវាងអារម្មណ៍ឆាប់ខឹង និងកង្វះដំណេក។ នេះបើយោងតាមក្រុមចិត្ដវិទូ។
មានភ័ស្ដុតាងបានបញ្ជាក់ថា កង្វះដំណេកអាចបង្កើនភាពក្រេវក្រោធ និងទុក្ខព្រួយ ព្រមទាំងប្រាសចាកសុភមង្គល និងភាពសប្បាយរីករាយ។
យ៉ាងណាមិញ ក្រុមអ្នកស្រាវជ្រាវមកពីសាកលវិទ្យាល័យរដ្ឋអ៊ីអូវ៉ា ចង់បញ្ជាក់អំពីទំនាក់ទំនងរវាងបញ្ហាកង្វះដំណេក និងអារម្មណ៍ក្រោធ។
ការសិក្សា ដែលចុះផ្សាយក្នុងព្រឹត្ដិបត្រចិត្ដវិទ្យាពិសោធន៍បានបែងចែកអ្នកចូលរួមចំនួន ៤២ នាក់ជា ២ ក្រុម។ ១ ក្រុមរក្សាដំណេកដូចប្រក្រតី ខណៈ ១ ក្រុមទៀតកាត់វេលាដំណេកពី ២ ទៅ ៤ ម៉ោងរៀងរាល់រាត្រីរយៈពេល ២ រាត្រី។ ក្រុមអ្នកស្រាវជ្រាវ បានប៉ាន់ប្រមាណថា ក្រុមទី ១ មានវេលាដំណេកជិត ៧ ម៉ោងក្នុង ១ យប់ ខណៈក្រុមទី ២ មានវេលាដំណេកត្រឹមតែ ៤ ម៉ោងកន្លះ។
អារម្មណ៍នឿយហត់ជះឥទ្ធិពលដល់ភាពក្រេវក្រោធរហូតដល់ ៥០ ភាគរយ ដែលកើតឡើងពីការរឹតត្បិតដំណេក។
សាស្ដ្រាចារ្យដឹកនាំការសិក្សា Zlatan Krizan បាននិយាយថា៖ «ជាទូទៅ កំហឹងមានកម្រិតកើនឡើងខ្ពស់ជាងសម្រាប់អ្នកដែលមានដំណេកតិចតួច បើធៀបនឹងអ្នកគេងគ្រប់គ្រាន់»។
ខណៈកង្វះដំណេកអាចបង្កអត្ដចរិតក្រេវក្រោធលើអ្នកដទៃ ដំណេកទៀងទាត់តិចជាង ៦ ឬ ៧ ម៉ោងក្នុង ១ យប់ប៉ះពាល់ដល់ប្រព័ន្ធស៊ាំជំងឺ និងហានិភ័យជំងឺមហារីកខ្ពស់៕HR