.jpg)
បុរសខ្លះចាក់ពង្រីកលិង្គ ទោះជារបស់ខ្លួនមានទំហំសមល្មមហើយ។
ក្រុងញូវយ៉ក: ការវះកាត់ពង្រីកលិង្គកំពុងតែពេញនិយមខ្លាំងនាពេលបច្ចុប្បន្ន តែពេលមានឧប្បត្ដិហេតុអកុសលកើតឡើង ហានិភ័យប្រាកដជាមិនអាចទស្សន៍ទាយបាន។
ក្រុមអ្នកស្រាវជ្រាវសាកលវិទ្យាល័យកាលីហ្វ័រនីញ៉ា ក្នុងក្រុងអ៊ីរវីន បានតាមដានករណីបុរស ១១ នាក់ ដែលជួបបញ្ហាក្រោយពីវះកាត់ពង្រីកលិង្គ ឬហៅថា ភេណូប្លាស្ទី។
នីតិវិធីត្រូវបានធ្វើឡើងដោយការចាក់បញ្ចូលសារធាតុទៅក្នុងកោសិកាលិង្គ ដើម្បីធ្វើឲ្យ តួលិង្គរីកធំ បំណងប្រាថ្នាភាពសម្បើម និងបង្កើនភាពពុះកញ្ជ្រោលផ្លូវភេទ។
បុរសក្នុងការសិក្សានេះ មានអាយុមធ្យម ៤៧ ឆ្នាំ ដោយអ្នកក្មេងបំផុតអាយុ ២៧ ឆ្នាំ និងចាស់បំផុតអាយុ ៧៧ ឆ្នាំ។
ក្នុងចំណោមបុរសរងគ្រោះពីការប្រើសារធាតុចាក់បំប៉ោង ឬការបូមខ្លាញ់ក្នុងខ្លួនយកមកបំពេញលិង្គនោះ បុរសលិង្គតូចជាច្រើនទាមទារការវះកាត់ ដោយករណីខ្លះសាច់លិង្គត្រូវបានកាត់ចេញទាំងស្រុង ឬវះចំហតែម្ដង។
ក្រុមអ្នកនិពន្ធសរសេរការសិក្សានេះ ឲ្យដឹងថា៖ «ការវះកាត់ពង្រីកលិង្គរមែងត្រូវបានផ្សព្វផ្សាយ និងចាត់ទុកជាការវះកាត់ប្រកបដោយសុវត្ថិភាពដែលមានហានិភ័យទាប។ ប៉ុន្ដែតាមពិត យើងឃើញថា វាមានហានិភ័យខ្ពស់»។
ក្រុមអ្នកស្រាវជ្រាវបានលើកឡើងថា កង្វល់អ្នកមានលិង្គតូចគឺជាទម្រង់នៃអាការរិះគន់រាងកាយខ្លួនឯងឥតឈប់ឈរ។ វាទំនងជាវិបត្តិផ្លូវចិត្តដែលបុរសមិនស្កប់នឹងអ្វីដែលខ្លួនមាន។
អ្នកជំនាញបានសរសេរក្នុងព្រឹត្ដិបត្រវេជ្ជសាស្ដ្រផ្លូវភេទថា៖ «អ្នកជំងឺភាគច្រើន ដែលស្វែងរកសេវាកម្មចាក់ពង្រីកលិង្គ តាមពិតពួកគេមានប្រវែងលិង្គ និងរូបរាងធម្មតាទេ»៕HR
