ក្រុងញូវយ៉កៈ ជារៀងរាល់ឆ្នាំគេឃើញប្រជាជនអាមេរិកប្រមាណជា១៤២០០០នាក់មកកាន់ មន្ទីរពេទ្យដើម្បីព្យាបាលរបួសលើប្រដាប់បន្តពូជ នេះបើយើងតាមការសិក្សាស្រាវជ្រាវមួយដែលចុះផ្សាយនៅក្នុងThe Journal of Urology។
តែពេលពួកគេបានទៅព្យាបាលនោះពុំមានមូលហេតុ អ្វីច្រើនបានកើតឡើងឡើយ ក្រៅពីរងរបួសដោយសារឧបត្តិហេតុផ្សេងៗ។ ក្រុមអ្នកស្រាវជ្រាវបានបង្ហើបឲ្យដឹងថាមូលហេតុនៃរបួសត្រង់ ប្រដាប់បន្តពូជនេះវាកើតឡើងដោយសារកត្តានៃការប្រើផលិតផលមួយ ចំនួនដូចជាសម្លៀកបំពាក់ គ្រឿងសង្ហារិម និងឧបករណ៍ប្រើប្រាស់ដទៃទៀត។
គេសង្កេតឃើញថា មានអត្រា៧០ភាគរយគឺជាបុរសដែលជាអ្នកជំងឺទាំងអស់នោះ ដោយមានវ័យចាប់ពី១៨ទៅ២៨ឆ្នាំ។ ពួកគេភាគច្រើនមានរបួសកើតឡើងដោយសារសកម្មភាពលេងកីឡាដូចជារបួស នៃការប៉ះពាល់ក្រលៀនពេលជិះកង់ឡើងភ្នំ ការលេងបាល់ និងការដួលប៉ះទង្គិចលិង្គជាដើម។
ចំណែកបុរសវ័យចំណាស់ជាងនេះ វិញច្រើនមានរបួសលិង្គដោយសារសកម្មភាពប្រចាំថ្ងៃរបស់ពួកគាត់ ដូចជាការរអិលដួលក្នុងបន្ទប់ទឹក និងការប៉ះទង្គិចដល់ពងស្វាសតែម្តង។
រីឯស្រ្តីវិញមានអត្រាទាប ជាងបុរសសម្រាប់ការព្យាបាលរបួសប្រដាប់បន្តពូជនេះដោយរបួសភាគ ច្រើនកើតឡើងពីការកោររោមលើប្រដាប់ភេទ ដែលបណ្ដាលឲ្យមុតចេញឈាម។
វេជ្ជ បណ្ឌិត បេនចាមីន ប្រីយើ ប្រធានក្រុមស្រាវជ្រាវបាននិយាយនៅក្នុងសេចក្តីប្រកាសព័ត៌មានថា បណ្ដាក្រុមហ៊ុនដែលផលិតឧបករណ៍ប្រើប្រាស់ប្រចាំថ្ងៃគួរតែធ្វើការ អប់រំដល់ប្រជាជនដើម្បីចៀសវាងការរងរបួសដល់ប្រដាប់បន្តពូជ ឬប្រដាប់ភេទផងដែរ។ ចំពោះវីធីការពារមានដូចជាការជិះកង់ឲ្យមានរបៀបត្រឹមត្រូវកុំ ឲ្យប៉ះពាល់ដល់ប្រដាប់ភេទ របៀបកាន់ឡាម និងការទិញកម្រាលគ្រើមការពារភាពរអិលក្នុងបន្ទប់ទឹកជាដើម៕ PR
