The Phnom Penh Post Search

Search form

Logo of Phnom Penh Post newspaper Phnom Penh Post - ចិន ជប៉ុន និង​កូរ៉េ​សម្រេច​កិច្ច​ព្រម​ព្រៀង​ដំណាក់​កាល​ទី១




ចិន ជប៉ុន និង​កូរ៉េ​សម្រេច​កិច្ច​ព្រម​ព្រៀង​ដំណាក់​កាល​ទី១

ចិន ជប៉ុន និង​កូរ៉េ​សម្រេច​កិច្ច​ព្រម​ព្រៀង​ដំណាក់​កាល​ទី១

ក្រុង សេអ៊ូលៈ ប្រទេស​ចិន ជប៉ុន និង​កូរ៉េ​ខាង​ត្បូង​កាល​ពី​ថ្ងៃ​ព្រហស្បតិ៍​ម្សិល​មិញ​បាន​បញ្ចប់​កិច្ច​ពិភាក្សា​ជុំ​ទីមួយ​នៃ​កិច្ច​ព្រម​ព្រៀង​ពាណិជ្ជកម្ម​សេរី​ដើម្បី​ចង​ភ្ជាប់​សេដ្ឋកិច្ច​របស់​ប្រទេស​ទាំង​បី​ដែល​មាន​ចំនួន​២០​ភាគ​រយ​នៃ​ផលិត​ផល​ក្នុង​ស្រុក​សរុប​ពិភពលោក​។

កិច្ច​ពិភាក្សា​រយៈ​ពេល​បី​ថ្ងៃ​នៅ​ក្នុង​ទីក្រុង សេអ៊ូល​ដែល​ចាប់​ផ្ដើម​កាល​ពី​ថ្ងៃ​អង្គារ​ដើម​សប្តាហ៍​នេះ​បាន​ផ្តោត​សំខាន់​ទៅ​លើ​នីតិវិធី​ក្នុង​ការ​កំណត់​របៀប​វារៈ​និង​វិសាល​ភាព​នៃ​កិច្ច​ចរចា​ស្តីពី​បញ្ហា​ពាណិជ្ជកម្ម​ជា​បន្ត​បន្ទាប់​សម្រាប់​ពេល​អនាគត​ដែល​នឹង​ត្រូវ​លើក​យក​មក​ពិភាក្សា។

អនុ​រដ្ឋ​មន្ត្រី ពាណិជ្ជកម្ម​កូរ៉េ​ខាង​ត្បូង​លោក Choi Kyong-Lim បាន​ថ្លែង​ថា កិច្ច​ពិភាក្សា​ជុំ​ដំបូង​នេះ​បាន​បង្កើត​ជា​មូលដ្ឋាន​គ្រឹះ​ដ៏​សំខាន់​មួយ​។

លោក Choi បាន​ប្រាប់​ក្រុម​អ្នក​កាសែត​ថា៖ «​ខ្ញុំ​ជឿ​ថា យើង​អាច​ជោគ​ជ័យ​នៅ​ក្នុង​ការ​បង្កើត​ទំនុក​ចិត្ត​រវាង​ក្រុម​ការងារ​ចរចា​មក​ពី​ប្រទេស​ទាំង​បី​ដែល​អាច​ដើរ​តួនាទី​ដ៏​សំខាន់​បំផុត​ខណៈ​ការ​ចរចា​បាន​ប្រពឹត្ត​ទៅ​មុខ​»។

ដោយ​ប្រទេស​ទាំង​បី​មាន​ថ្នាក់​ដឹក​នាំ​ថ្មី​ក្រុម​មន្ត្រី​ពាណិជ្ជកម្ម​សង្ឃឹម​ថា ពួកគេ​អាច​ប្រព្រឹត្ត​ទៅ​ដោយ​មិន​គិត​ពី​ជម្លោះ​ដែន​ដី​ដែល​បាន​ធ្វើ​ឲ្យ​ទំនាក់​ទំនង​ពួកគេ​ជាប់​គាំង​អស់​ពេល​ជា​ច្រើន​ទសវត្សរ៍​មក​នេះ។

គំនិត​បង្កើត​ឲ្យ​មាន​កិច្ច​ព្រម​ព្រៀង​ពាណិជ្ជកម្ម​ត្រីភាគី (FTA) នេះ​ត្រូវ​បាន​លើក​យក​មក​ពិភាក្សា​អស់​ពេល​ជា​ច្រើន​ទសវត្សរ៍​មក​ហើយ​ប៉ុន្តែ​ក្រុម​មន្ត្រី​ការទូត​បាន​និយាយ​ថា​ឥឡូវ​នេះ​រដ្ឋាភិបាល​ចិន​កំពុង​ជំរុញ​យ៉ាង​ខ្លាំង​ដើម្បី​សម្រេច​ឲ្យ​បាន​កិច្ច​ព្រម​ព្រៀង​ពាណិជ្ជកម្ម​មួយ​នេះ​ដែល​មួយ​ផ្នែក​ដើម្បី​ទប់​ស្កាត់​ឥទ្ធិពល​របស់​អាមេរិក​នៅ​អាស៊ី៕ PN

អត្ថបទគួរចាប់អារម្មណ៍