The Phnom Penh Post Search

Search form

Logo of Phnom Penh Post newspaper Phnom Penh Post - BRICS មិន​ទាន់​សម្រេច​បាន​ធនាគារ​អភិវឌ្ឍន៍​រួម




BRICS មិន​ទាន់​សម្រេច​បាន​ធនាគារ​អភិវឌ្ឍន៍​រួម

BRICS មិន​ទាន់​សម្រេច​បាន​ធនាគារ​អភិវឌ្ឍន៍​រួម

130329_16
ក្រុមមេដឹកនាំបណ្ដាប្រទេស BRICS ថតរូបជុំគ្នានៅក្នុងកិច្ចប្រជុំកាលពីថ្ងៃពុធ AFP

ក្រុង​ឌ័របានៈ ក្រុម​មេ​ដឹក​នាំ​បណ្ដា​ប្រទេស​ដែល​មាន​ឧស្សាហកម្ម​កំពុង​ស្ទុះ​ងើប​ខ្លាំង​(BRICS) កាល​ពីថ្ងៃ​ពុធ​បាន​បរាជ័យ​ក្នុង​ការ​ចាប់​ផ្តើម​បង្កើត​ធនាគារ​អភិវឌ្ឍន៍​ថ្មី​មួយ ដែល​គេ​រំពឹង​ថា​អាច​នឹង​បង្កើត​បាន​នោះ។ ធនាគារ​នេះ​ត្រូវ​បាន​បង្កើត​ឡើង​ក្នុង​គោល​បំណង​ទប់​ស្កាត់​ឥទ្ធិពល​របស់​ស្ថាប័ន​ហិរញ្ញវត្ថុ​របស់​ប្រទេស​លោក​ខាង​លិច​ដែល​មាន​ភាព​លើស​លប់ ដូច​ជា​ធនាគារ​ពិភពលោក​ជា​ដើម។

បន្ទាប់​ពី​បើក​កិច្ច​ចរចា​នៅ​ទីក្រុង​កំពង់​ផែ​ឌ័របាន ក្រុម​មេ​ដឹក​នាំ​មក​ពី​ប្រទេស​ប្រេស៊ីល រុស្ស៊ី ឥណ្ឌា ចិន និង​ម្ចាស់​ផ្ទះ​អាហ្វ្រិក​ខាង​ត្បូង បាន​យល់​ព្រម​ជា​គោល​ការណ៍​លើ​ការ​បង្កើត​មូលនិធិ​ផ្តល់​ប្រាក់​កម្ចី​ហេដ្ឋា​រចនា​សម្ព័ន្ធ​រួម​គ្នា​មួយ ប៉ុន្តែ​មេ​ដឹក​នាំ​ទាំង​នោះ​ថ្លែង​ថា កិច្ច​ពិភាក្សា​បន្ថែម​ត្រូវ​ធ្វើ​ឡើង​ជា​ចាំបាច់​ដើម្បី​បញ្ចប់​ផែន​ការ​នេះ។

នៅ​ក្នុង​សុន្ទរកថា ដែល​បង្ហាញ​ឲ្យ​ឃើញ​ពី​ដំណើរ​ការ​ទៅ​មុខ​តិច​តួច​ក្រៅ​ពី​កិច្ច​ព្រម​ព្រៀង​មួយ​ដែល​បាន​សម្រេច​នៅ​ក្នុង​ទីក្រុង​ញូវដែលី​កាល​ពី​មួយ​ឆ្នាំ​មុន លោក​ប្រធានា​ធិបតី​អាហ្វ្រិក​ខាង​ត្បូង Jacob Zuma បាន​ថ្លែង​ថា៖ «យើង​រីករាយ​ថា ធនាគារ​អភិវឌ្ឍន៍​ថ្មី​នេះ​អាច​នឹង​ត្រូវ​បង្កើត​ចេញ​ជា​រូប​រាង​បាន»។ លោក​បន្ថែម​ថា៖ «យើង​បាន​សម្រេច​ចិត្ត​ចរចា​ជា​ផ្លូវ​ការ​ដើម្បី​បង្កើត​ធនាគារ​អភិវឌ្ឍន៍​ថ្មី​មួយ ដែល​ដឹក​នាំ​ដោយ​ក្រុម​ប្រទេស BRICS»។

ជា​ផ្លូវ​ការ​មាន​ការ​រំពឹង​ថា ក្រុម​មេ​ដឹក​នាំ​ទាំង​អស់​នឹង​ពិចារណា​លើ​ការ​បង្កើត​ធនាគារ​នេះ ប៉ុន្តែ​ប្រទេស​អាហ្វ្រិក​ខាង​ត្បូង និង​ប្រទេស​ផ្សេង​ទៀត​សង្ឃឹម​ថា​នឹង​ចាប់​ផ្តើម​មូលនិធិ​ហេដ្ឋា​រចនា​សម្ព័ន្ធ​មួយ​ដែល​មាន​ទឹក​ប្រាក់​ចំនួន​៥០​ពាន់​លាន​ដុល្លារ​នៅ​ក្នុង​កិច្ច​ប្រជុំ​កំពូល​ដែល​មាន​រយៈ​ពេល​ពីរ​ថ្ងៃ​នេះ។

ធនាគារ​ដែល​ត្រូវ​លើក​យក​មក​ពិភាក្សា​នេះ​ត្រូវ​បាន​គេ​មើល​ឃើញ​ថា​ជា​មធ្យោបាយ​មួយ​ដើម្បី​បង្កើន​ឥទ្ធិពល​នៅ​លើ​ឆាក​អន្តរជាតិ​ដោយ​កំពុង​ប្រយុទ្ធ​ប្រឆាំង​នឹង​វិបត្តិ​សេដ្ឋកិច្ច​ដែល​កំពុង​តែ​អូស​បន្លាយ​នៅ​តំបន់​អឺរ៉ុប និង​កំពុង​ដោះ​ស្រាយ​ចំណាយ​លើ​ហេដ្ឋា​រចនា​សម្ព័ន្ធ ៤,៥​ពាន់​ពាន់​លាន​ដុល្លារ ដែល​ក្រុម​ប្រទេស​BRICS បាន​ប៉ាន់​ប្រមាណ​ថា​នឹង​ត្រូវ​ការ​ក្នុង​រយៈ​ពេល​៥​ឆ្នាំ​ខាង​មុខ៕ KC

អត្ថបទគួរចាប់អារម្មណ៍