The Phnom Penh Post Search

Search form




Logo of Phnom Penh Post newspaper Phnom Penh Post - $១,៦​ពាន់​លាន​នាំ​ចូល​ប្រេង​បក្ស​ប្រឆាំង​ថា​បាត់​ចំណូល​

$១,៦​ពាន់​លាន​នាំ​ចូល​ប្រេង​បក្ស​ប្រឆាំង​ថា​បាត់​ចំណូល​

$១,៦​ពាន់​លាន​នាំ​ចូល​ប្រេង​បក្ស​ប្រឆាំង​ថា​បាត់​ចំណូល​

130131_13
អ្នកលក់សាំងដបតាមផ្លូវនៅភ្នំពេញកំពុងចាក់សាំងឲ្យអតិថិជន

ភ្នំពេញៈ ប្រទេស​កម្ពុជា​បាន​ចំណាយ​ទឹក​ប្រាក់​ជាង​១,៦​ពាន់​លាន​ដុល្លារ​លើ​ការ​នាំ​ចូល​ប្រេង​ឥន្ធនៈ​កាល​ពី​ឆ្នាំ​២០១២​ដែល​ចំនួន​នេះ​កើន​ឡើង​ខ្ពស់​ជាង​ឆ្នាំ​២០១១​ដល់​១៧​ភាគ​រយ​។

មន្ត្រី​បក្ស​ប្រឆាំង​ថា​បញ្ហា​ប្រឈម​គឺ​អំពើ​ពុក​រលួយ​ដែល​នាំ​ឲ្យ​មាន​ការ​នាំ​ចូល​ប្រេង​គេច​ពន្ធ​បាត់​ចំណូល​ជាតិ​រាប់​រយ​លាន​ដុល្លារ​។

ទិន្នន័យ​ពី​ក្រសួង​ពាណិជ្ជកម្ម​បាន​បង្ហាញ​ថា​ការ​នាំ​ចូល​ប្រេង​ឥន្ធនៈ​នៅ​ឆ្នាំ​២០១២ មាន​ចំនួន​១,៦​លាន​តោន​ដោយ​បាន​កើន​ឡើង​១២​ភាគ​រយ បើ​ប្រៀប​ធៀប​នឹង​ឆ្នាំ​២០១១ ដែល​មាន​១,៥​លាន​តោន ស្មើ​នឹង​ទឹក​ប្រាក់​១,៤​ពាន់​លាន​ដុល្លារ​។

អ្នក​សេដ្ឋកិច្ច​និង​មន្ត្រី​បាន​និយាយ​ថា កំណើន​នៃ​ការ​នាំ​ចូល​ប្រេង​ឥន្ធនៈ​បណ្តាល​មក​ពី​តម្រូវ​ការ​ប្រើ​ប្រាស់​ក្នុង​ស្រុក​កើន​ឡើង​លោក ចាន់ សុផល ប្រធាន​សមាគម​សេដ្ឋកិច្ច​កម្ពុជា​បាន​លើក​ឡើង​ថា៖​«​យើង​ឃើញ​ថា​ការ​ប្រើ​ប្រាស់​កំពុង​តែ​កើន​ឡើង​ដោយ​សារ​តែ​លក្ខណៈ​ល្អ​ប្រសើរ​នៃ​វិស័យ​ឧស្សាហកម្ម​និង​ផលិតកម្ម​ជា​ពិសេស​ការ​កើន​ឡើង​នៃ​គ្រឿង​យន្ត​កសិកម្ម​។ ទន្ទឹម​នឹង​នេះ​កំណើន​វិនិយោគ​ក៏​កំពុង​រួម​ចំណែក​ឲ្យ​មាន​តម្រូវ​ការ​ប្រើ​ប្រាស់​ប្រេង​ឥន្ធនៈ​ខ្ពស់​ផង​ដែរ​សម្រាប់​ការ​អភិវឌ្ឍ​ហេដ្ឋា​រចនា​សម្ព័ន្ធ​និង​គម្រោង​នានា​»​។

លោក ម៉េង សកិ្ត​ធារ៉ា អគ្គ​នាយក​នៃ​អគ្គ​នាយក​ដ្ឋាន​ឧស្សាហកម្ម​នៃ​ក្រសួង​ឧស្សាហកម្ម​រ៉ែ និង​ថាមពល​បាន​ឲ្យ​ដឹង​ថា​មាន​ការ​កើន​ឡើង​នៃ​ការ​ដឹក​ជញ្ជូន​ក្នុង​ស្រុក ជា​ពិសេស​វិស័យ​សេវាកម្ម​ដែល​ត្រូវ​ការ​ប្រើ​ប្រាស់​ច្រើន​។ លោក​ថ្លែង​ថា៖ «​ពិត​មែន​! នេះ​ជា​សញ្ញា​មួយ​ដ៏​ល្អ​ដែល​បញ្ជាក់​ថា​សេដ្ឋកិច្ច​របស់​យើង​កំពុង​រីក​ចម្រើន​។ បើ​សេដ្ឋកិច្ច​មិន​រីក​ចម្រើន​ការ​ប្រើ​ប្រាស់​ប្រេង​ឥន្ធនៈ​ក៏​មិន​ត្រូវ​ការ​ច្រើន​ដែរ​។ ខ្ញុំ​មាន​អារម្មណ៍​ថា វិស័យ​ដឹក​ជញ្ជូន​របស់​យើង​មាន​ការ​រីក​ចម្រើន​កាល​ពី​ឆ្នាំ​មុន ឥឡូវ​យើង​ឃើញ​ថា​ចរាចរណ៍​ពិត​ជា​កក់​ស្ទះ​មែន​»។

លោក​បន្ថែម​ថា៖​«​ការ​កើន​ឡើង​នេះ​មិន​មែន​មាន​ន័យ​ថា យើង​ខ្វះ​ការ​ផ្គត់​ផ្គង់​ថាមពល​នោះ​ទេ​ព្រោះ​ឥឡូវ​យើង​កំពុង​ទទួល​ថាមពល​ពី​វារី​អគ្គិសនី ថាមពល​ធ្យូង​សម្រាប់​ការ​ផលិត​ដែរ​»​។

របាយ​ការណ៍​របស់​ក្រសួង​ក៏​បង្ហាញ​ដែរ​ថា​កម្ពុជា​បាន​នាំ​ចូល​យាន​យន្ត​សរុប​ជាង​១,៩១​លាន​គ្រឿង​ក្នុង​ឆ្នាំ​២០១២​ដែល​ចំនួន​នេះ​បាន​កើន​ឡើង​ជាង​១៥៧​ភាគ​រយ បើ​ធៀប​នឹង​ឆ្នាំ​២០១១​ដែល​មាន​ចំនួន​ជិត​៦៨​ម៉ឺន​គ្រឿង​។

ទោះ​ជា​យ៉ាង​នេះ​ក្តី លោក ចាន់ សុផល​អះអាង​ថា​ទិន្នន័យ​នៃ​ការ​ការ​នាំ​ចូល​ប្រេង​ឥន្ធនៈ​នេះ នៅ​តែ​ទាប​បើ​ប្រៀប​ធៀប​នឹង​ការ​ប្រើ​ប្រាស់​ជាក់​ស្តែង​។ លោក​បន្ត​ថា ៖​«​ខ្ញុំ​គិត​ថា​របាយ​ការណ៍​ពិត​ប្រាកដ​អាច​ខ្ពស់​ជាង​នេះ ដោយ​សារ​តែ​កម្ពុជា​នៅ​មាន​ប្រេង​ឥន្ធនៈ​គេច​ពន្ធ​ជា​ច្រើន​ទៀត​ដែល​មិន​បាន​កត់​ត្រា​»​។

លោក យឹម សុវណ្ណ អ្នក​នាំ​ពាក្យ​គណបក្ស​សម រង្ស៊ី បាន​ឯកភាព​ចំពោះ​តួ​លេខ​នៃ​ការ​នាំ​ចូល​ប្រេង​នេះ​ប៉ុន្តែ​អះ​អាង​ថា​ការ​នាំ​ចូល​ប្រេង​គេច​ពន្ធ​បាន​ធ្វើ​ឲ្យ​បាត់​បង់​ចំណូល​ពន្ធ​របស់​រដ្ឋ​។

លោក​បន្ត​ថា​រដ្ឋាភិបាល​បាន​យក​ពន្ធ​ពី​ការ​នាំ​ចូល​ប្រេង​៣៤០​ដុល្លារ​ក្នុង​មួយ​តោន​ប៉ុន្តែ​ពន្ធ​ដែល​ប្រមូល​បាន​ជាក់​ស្តែង​មាន​តែ​ជាង​១៦០​លាន​ដុល្លារ​ប៉ុណ្ណោះ​ដោយ​បាត់​ចំណូល​ពន្ធ​រហូត​ដល់​ជា​៣៥០​លាន​ដុល្លារ​។

លោក យឹម សុវណ្ណ ថ្លែង​ថា៖

« មិន​អាច​ដោះ​ស្រាយ​បញ្ហា​នេះ​បាន​ទេ​ដោយ​សារ​តែ​រដ្ឋាភិបាល​ធ្វើ​មិន​ដឹង​អំពី​រឿង​នេះ​ជា​រឿង​អំពើ​ពុក​រលួយ​មាន​តែ​ដូរ​មេ​ដឹក​នាំ​ចេញ​ទេ​។ ការ​គេច​ពន្ធ​នេះ​ពួក​គេ​ការ​ពារ​គ្នា​ជា​ប្រព័ន្ធ​»​។

របាយ​ការណ៍​ក្រសួង​ពាណិជ្ជកម្ម​ក៏​បង្ហាញ​ផង​ដែរ​ថា​ឱនភាព​ពាណិជ្ជកម្ម​កម្ពុជា​នៅ​ឆ្នាំ​២០១២​កន្លង​ទៅ​មាន​ជាង​២,៦៥​ពាន់​លាន​ដុល្លារ​៕ CC​

រាយ​ការណ៍​បន្ថែម ស៊ន សារ៉ាត​

អត្ថបទគួរចាប់អារម្មណ៍