ភ្នំពេញៈ បើទោះបីផែនការប្រគល់វិញ្ញាបនបត្រចុះបញ្ជីផ្លូវការនៃទំនិញម៉ាកសម្គាល់ភូមិសាស្ត្រ «ទឹកឃ្មុំព្រៃមណ្ឌលគិរី» កាលពីថ្ងៃអង្គារម្សិលមិញត្រូវពន្យារពេល ប៉ុន្តែការទទួលបានម៉ាកសម្គាល់ភូមិសាស្ត្រ (GI) ពីក្រសួងពាណិជ្ជកម្មបាននិងកំពុងរួមចំណែកក្នុងការធ្វើឱ្យផលិតផលមួយនេះអាចពង្រីកទីផ្សារកាន់តែធំទាំងក្នុងស្រុក និងអន្តរជាតិ។
«ទឹកឃ្មុំព្រៃមណ្ឌលគិរី» ត្រូវបានក្រសួងពាណិជ្ជកម្មចុះបញ្ជីទៅក្នុងបញ្ជីម៉ាកសម្គាល់ភូមិសាស្ត្រទំនិញកម្ពុជាកាលពីថ្ងៃទី ២៩ ខែមករា ឆ្នាំ ២០២១។ «ទឹកឃ្មុំព្រៃមណ្ឌលគិរី» គឺជាទំនិញទី ៤ ដែលក្រសួងពាណិជ្ជកម្មបានចុះបញ្ជីទំនិញម៉ាកសម្គាល់ភូមិសាស្ត្រ បន្ទាប់ពីម្រេចកំពត, ស្ករត្នោតកំពង់ស្ពឺ, និងក្រូចថ្លុងកោះទ្រង់។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃទី ៦ ខែមេសាថា តាមផែនការលោករដ្ឋមន្ត្រីក្រសួងពាណិជ្ជកម្មនឹងរៀបចំធ្វើពិធីប្រគល់វិញ្ញាបនបត្រចុះបញ្ជីជាផ្លូវការនៃទំនិញម៉ាកសម្គាល់ភូមិសាស្ត្រ «ទឹកឃ្មុំព្រៃមណ្ឌលគិរី» នៅថ្ងៃទី ៦ ខែមេសា ប៉ុន្តែដោយសារការរីករាលដាលព្រឹត្តិកាណ៍សហគមន៍ ២០ កុម្ភៈបានធ្វើឱ្យផែនការនេះត្រូវពន្យារពេល។
ទោះបីយ៉ាងណាក្រសួងបានចុះបញ្ជី «ទឹកឃ្មុំព្រៃមណ្ឌលគិរី»ទៅក្នុងប្រភេទទំនិញ GI រួចរាល់ហើយ។ ការចុះបញ្ជីនេះមានន័យថា «ទឹកឃ្មុំព្រៃមណ្ឌលគិរី» នឹងត្រូវបានការពារដោយមានដើមកំណើតផ្សារភ្ជាប់ជាមួយទីតាំងភូមិសាស្ត្រជាក់លាក់ មានគុណភាព និងគុណតម្លៃច្បាស់លាស់ ព្រមទាំងធ្វើឱ្យប្រជាជន និងផលិតករក្នុងតំបន់អាចធ្វើការផ្ទេរចំណេះ និងជំនាញបន្តពីជំនាន់មួយទៅជំនាន់មួយទៀត។
លោកបន្ថែមថា ការចុះបញ្ជី GI ក៏ជាឧបករណ៍ដ៏សំខាន់ក្នុងការលើកទឹកចិត្តឱ្យសហគមន៍ផលិតនូវទំនិញសម្គាល់ភូមិសាស្ត្រដែលមានគុណភាពខ្ពស់តាមរយៈការពង្រឹង និងពង្រីកចង្វាក់ផលិតកម្ម បង្កើនការត្រួតពិនិត្យគុណភាពជាប្រព័ន្ធឱ្យកាន់តែប្រសើរ និងឈានទៅនាំចេញទៅក្រៅប្រទេស។
លោកថ្លែងថា៖ «ការចុះបញ្ជីនេះវាក៏នឹងជួយជំរុញឱ្យទឹកឃ្មុំព្រៃមណ្ឌលគិរីមានតម្លៃបន្ថែមនៅលើទីផ្សារ ពិសេសតម្លៃលក់នឹងទទួលបានខ្ពស់ ហើយមានការទទួលស្គាល់ទាំងក្នុងទីផ្សារក្នុងស្រុក និងអន្តរជាតិ»។
លោកបន្ថែមថា ការចុះបញ្ជី GI ក៏នឹងរួមចំណែកកាត់បន្ថយ ភាពក្រីក្រ តាមរយៈការបង្កើតភូមិមួយផលិតផលមួយ។
លោក ប្រាក់ សេរីវឌ្ឍន៍ ប្រធានវិទ្យាស្ថានស្រាវជ្រាវ និងអភិវឌ្ឍន៍ជនបទកម្ពុជាបានឱ្យដឹងថា ការទទួលស្គាល់ជា GI មានន័យថា ទឹកឃ្មុំព្រៃមណ្ឌលគិរី គឺជាផលិតផលដែលផលិតឡើងដោយមានការគ្រប់គ្រង មានប្រព័ន្ធត្រួតពិនិត្យ និងការធានាគុណភាពត្រឹមត្រូវ ដែលអាចនឹងធ្វើឱ្យផលិតផលទាំងនេះមានតម្លៃខ្ពស់ជាងមុន។ GI ក៏ជាការបើកឱកាសឱ្យផលិតផលនេះទទួលការបញ្ជាទិញទៅក្រៅប្រទេសផងដែរ។
លោក កើញ បូផាត់ ប្រធានសមាគមអភិរក្សឃ្មុំព្រៃខេត្តមណ្ឌលគិរីនិយាយថា ការចុះបញ្ជីផ្លូវការនៃទំនិញ GI នឹងរួមចំណែកយ៉ាងច្រើនក្នុងការជួយបង្កើនប្រាក់ចំណូលដល់អ្នកនៅក្នុងសហគមន៍។ លោកបន្តថា ទោះយ៉ាងណាទឹកឃ្មុំព្រៃមណ្ឌលគិរីឆ្នាំនេះនឹងមិនមានបរិមាណច្រើនដូចឆ្នាំមុនទេ ដោយអាចបានចន្លោះពី ១០-២០ តោនប៉ុណ្ណោះ ខណៈឆ្នាំមុនទទួលបានជាង ៦០ តោន។
លោកបន្ថែមថា លក្ខណពិសេសរបស់ទឹកឃ្មុំព្រៃមណ្ឌលគិរីគឺមានរសជាតិផ្អែមឆ្ងាញ់ ខាប់ និងមានក្លិនក្រអូប។
បច្ចុប្បន្នសមាគមទិញទឹកឃ្មុំពីសមាជិកក្នុងតម្លៃ ៦០ ០០០ រៀល ក្នុង ១ លីត្រ និងលក់ចេញ ៧ ទៅ ៧ ម៉ឺន ៥ ពាន់រៀល។ នេះបើតាមលោក បូផាត់៕ LA