The Phnom Penh Post Search

Search form




Logo of Phnom Penh Post newspaper Phnom Penh Post - កង្វល់​ក្នុង​វិស័យ​ឯកជន​ត្រូវ​បាន​ដោះស្រាយ

កង្វល់​ក្នុង​វិស័យ​ឯកជន​ត្រូវ​បាន​ដោះស្រាយ

កង្វល់​ក្នុង​វិស័យ​ឯកជន​ត្រូវ​បាន​ដោះស្រាយ

20140305_13a
លោកនាយករដ្ឋមន្ត្រី ហ៊ុន សែន ថ្លែងក្នុងវេទិការាជរដ្ឋាភិបាល វិស័យឯកជនលើកទី១៧កាលពីម្សិលមិញ ហេង ជីវ័ន

ភ្នំពេញ: រាល់​បញ្ហា​ប្រឈម និង​ក្តី​បារម្ភ​នានា​មួយ​ចំនួន​របស់​វិស័យ​ឯកជន​ដែល​ជា​របាំង​នៃ​កំណើន​ត្រូវ​បាន​លោក​នាយក​រដ្ឋ​មន្រ្តី ហ៊ុន សែន ធ្វើ​ការ​ដោះស្រាយ​ភ្លាមៗ​នៅ​ក្នុង​វេទិកា​រាជ​រដ្ឋាភិបាល​និង​ផ្នែក​ឯកជន (G-PSF)លើក ទី១៧ នៅ​វិមាន​រដ្ឋាភិបាល​កាល​ពី​ថ្ងៃ​ម្សិលមិញ បន្ទាប់​ពី​អវត្តមាន​រយៈ​ពីរ​ឆ្នាំ​នៃ​ការ​ប្រារព្ធ​វេទិកា​នេះ​ចាប់​តាំង​ឆ្នាំ ២០១២ មក ដោយ​សារ​តែ កម្ពុជា បាន​ធ្វើ​ជា​ម្ចាស់​ផ្ទះ​កិច្ច​ប្រជុំ​កំពូល​អាស៊ាន និង​កិច្ច​ប្រជុំ​អាស៊ាន​ផ្សេងៗ​ទៀត​កាល​ពី​ឆ្នាំ ២០១២ និង​ការ​បោះឆ្នោត​ថ្នាក់​ជាតិ​កាល​ពី​ឆ្នាំ ២០១៣ កន្លង​មក​ដែល​បណ្ដាល​ឲ្យ​មាន​ការ​ជាប់​គាំង​ផ្នែក​នយោបាយ​រហូត​មក​ដល់​បច្ចុប្បន្ន។

វេទិកា​ឆ្នាំ​នេះ​គឺ​ផ្តោត​លើ​ប្រធានបទ «សហគមន៍​សេដ្ឋកិច្ច​អាស៊ាន​ឆ្នាំ ២០១៥ កាលានុវត្តភាព និង​ការ​ប្រឈម​ចំពោះ កម្ពុជា» ហើយ​ឆ្នាំ​នេះ​ក៏​កាន់​តែ​មាន​ការ​ចូល​រួម​ពី​វិស័យ​ឯកជន​ច្រើន​ជាង​ឆ្នាំ​មុនៗ​ដែរ ដោយ​បាន​បន្ថែម​ក្រុម​ការងារ​ពីរ​ថ្មី​បន្ថែម​ទៀត​ពី​វិស័យ​អង្ករ​និង ក្រុម​មួយ​ទៀត​ពី​វិស័យ​ថាមពល និង​ធនធាន​រ៉ែ។

G-PSF ត្រូវ​បាន​បង្កើត​ឡើង​កាល​ពី​ឆ្នាំ ១៩៩៩ តាម​គំនិត​ផ្ដួច​ផ្ដើម​របស់​រដ្ឋាភិបាល កម្ពុជា ដើម្បី​ផ្ដល់​យន្តការ​សន្ទនា​គួរ​ឲ្យ​ទុក​ចិត្ត​សម្រាប់​ការ​ពិគ្រោះ​យោបល់​រវាង​រដ្ឋាភិបាល និង​វិស័យ​ឯកជន​ស្ដី​ពី​បញ្ហា​បរិយាកាស​ការ​វិនិយោគ​ចេញ​ពី​គោល​នយោបាយ​រយៈ​ពេល​វែង​រហូត​ដល់​ប្រតិបត្តិការ​ប្រចាំ​ថ្ងៃ​ដើម្បី​លើក​ទឹក​ចិត្ត​ដល់​គំនិត​ផ្ដួច​ផ្ដើម​របស់​វិស័យ​ឯកជន​ហើយ​វា​ក៏​ផ្ដល់​កម្មវិធី គួរ​ឲ្យ​ទុក​ចិត្ត​បាន​សម្រាប់​សហគមន៍​អាជីវកម្ម​ដើម្បី​លើក​ឡើង និង​ដោះស្រាយ​បញ្ហា​ជាមួយ​រដ្ឋាភិបាល​នៅ​ក្នុង​ថ្ងៃ​តែ​មួយ។

លោក តែ តាំងប៉ អ្នក​តំណាង​ក្រុម​ការងារ​វិស័យ​ឯកជន​ផ្នែក​កម្មន្តសាល​និង​សហគ្រាស​ធុន​តូច​និង​មធ្យម​និង​សេវាកម្ម ស្នើ​ទៅ​រាជ​រដ្ឋាភិបាល​ឲ្យ​អនុគ្រោះ​ពន្ធ​នាំ​ចូល​ម៉ាស៊ីន សម្ភារ និង​វត្ថុធាតុ​ដើម ដែល​បម្រើ​ដល់​សហគ្រាស​ខ្នាត​តូច​និង​មធ្យម និង​សុំ​ព្យួរ​ពន្ធ​លើ​ប្រាក់​ចំណេញ​រយៈ​ពេល​បី​ឆ្នាំ​សម្រាប់​សហគ្រាស​ដែល​ទើប​នឹង​បង្កើត​ថ្មី។ បន្ថែម​ពី​នេះ លោក​សុំ​ឲ្យ​មាន​ការ​ព្យួរ​ពន្ធ​នាំ​ចូល ហើយ​អាករ​លើ​តម្លៃ​បន្ថែម (VAT) ជា​បន្ទុក​របស់​រដ្ឋ​ក្នុង​ការ​នាំ​ចូល​សរសៃ​សូត្រ តាម​ការ​សន្យា​របស់​រដ្ឋាភិបាល​ក្នុង​វេទិកា ទី១៥។ ពាក់ព័ន្ធ​នឹង​បញ្ហា​ពន្ធ​នេះ​ដែរ លោក​ក៏​បាន​ស្នើ​សុំ​ការ​លុប​បំបាត់​ការ​បង់​ពន្ធ​លើ​តម្លៃ​បន្ថែម​ចំពោះ​ក្រុមហ៊ុន​ដែល​លក់​ទំនិញ​បន្ត​ទៅ​ក្រុមហ៊ុន​នាំ​ចេញ​ដោយ​សុំ​ការ​អនុញ្ញាត​ឲ្យ​អ្នក​លក់​ភ្ជាប់​ឯកសារ​នាំ​ចេញ​នៅ​ពេល​ប្រកាស​ពន្ធ។ ក្នុង​ករណី​នៅ​តែ​អនុវត្ត​តាម​នីតិវិធី​ចាស់​លោក​ស្នើ​ឲ្យ​មាន​ការ​ប្រាក់​អាករ​លើ​តម្លៃ​បន្ថែម​ឲ្យ​បាន​គ្រប់​ចំនួន​ក្នុង​រយៈ​ពេល​មិន​លើស​មួយ​សប្តាហ៍។

ជា​ការ​ឆ្លើយ​តប​លោក​នាយក​រដ្ឋ​មន្ត្រី​ស្នើ​ឲ្យ​ក្រុម​ប្រឹក្សា​អភិវឌ្ឍន៍​កម្ពុជា​នឹង​សិក្សា​ពី​លទ្ធភាព​នៃ​ការ​អនុគ្រោះ​ពន្ធ​សម្រាប់​សហគ្រាស​ធុន​តូច និង​មធ្យម​នៅ កម្ពុជា ដើម្បី​ពិនិត្យ​ថា តើ​សហគ្រាស​ណា​ដែល​ត្រូវ​បាន​ការ​លើក​ទឹក​ចិត្ត។ លោក​បញ្ជាក់​ថា មិន​មែន​អនុគ្រោះ​ទាំង​ស្រុង​នោះ​ទេ។

លោក​បាន​អនុម័ត​លើ​សំណើ​សុំ​ដាក់​អាករ​លើ​តម្លៃ​បន្ថែម​លើ​ការ​ផ្គត់ផ្គង់​អង្កាម​និង​កន្ទក់​ក្នុង​ស្រុក រាជ​រដ្ឋាភិបាល​អាករ​លើ​តម្លៃ​បន្ថែម​សូន្យ​ភាគរយ សំណើ​សុំ​ដាក់​បន្ទុក​លើ​អាករ​លើ​តម្លៃ​បន្ថែម​សម្រាប់​នាំ​ចូល​សរសៃ​សូត្រ​ដែល​នឹង​បន្ត​អនុគ្រោះ​ពន្ធ​រយៈ​ពេល​ពីរ​ឆ្នាំ​បន្ថែម​ទៀត​រហូត​ដល់​ដំណាច់​ឆ្នាំ ២០១៥ ហើយ​ក្រសួង សេដ្ឋកិច្ច​និង​ហរិញ្ញវត្ថុ​រៀបចំ​ប្រកាស​សម្រាប់​ដាក់​អនុវត្ត។ ក្នុង​នោះ​លោក​ក៏​បាន​ពិនិត្យ​លើ​លទ្ធភាព​ក្នុង​ការ​អនុគ្រោះ​ពន្ធ​លើ​ការ​នាំ​ចូល​ម៉ាស៊ីន និង​សម្ភារ ជា​វត្ថុធាតុ​ដើម​សម្រាប់​ផលិតកម្ម​របស់​សហគ្រាស​ធុន​តូច​និង​មធ្យម​ផង​ដែរ។

លោក ហូ វណ្ឌី អ្នក​តំណាង ក្រុម​ការងារ​វិស័យ​ឯកជន ផ្នែក​ទេសចរណ៍​បាន​លើក​ឡើង​នូវ​បញ្ហា​មួយ​ចំនួន​និង​បាន​ស្នើ​សុំ​ឲ្យ​មាន​ការ​បង្កើត​បញ្ជរ​បន្ថែម​នៅ​តាម​ច្រក​ទ្វារ​ដែល​មាន​ភ្ញៀវ​ចេញ​ចូល​ច្រើន។

លោក​នាយក​រដ្ឋ​មន្រ្តី​បាន​ចាត់​ឲ្យ​ក្រសួង ទេសចរណ៍ សហការ​ជាមួយ​ស្នងការ​នគរបាល​ជាតិ ផ្នែក​អន្តោប្រវេសន៍​សិក្សា​អំពី​លទ្ធភាព​ក្នុង​ការ​បង្កើត​បញ្ជរ​គ្រប់​ច្រក ដែល​មាន​ការ​យឺត​យ៉ាវ។ ទិដ្ឋាការ​ពេល​មក​ដល់​ជា​ការ​ងាយ​ស្រួល​ហើយ សម្រាប់​ទេសចរ បញ្ហា​នៅ​ពេល​បោះត្រា​ពេល​មក​ដល់។ លោក​នាយក​រដ្ឋ​មន្រ្តី​បន្ថែម​ថា​ខាង​ក្រុមហ៊ុន​អាកាសចរណ៍ ជប៉ុន ធ្លាប់​បាន​ស្នើ​ឲ្យ​មន្ត្រី​កម្ពុជា​បោះត្រា​នៅ​លើ​យន្តហោះ។ លោក​បាន​ស្នើ​ឲ្យ​លោក ហូ វណ្ឌី សហការ​ជាមួយ​ក្រសួង ទេសចរណ៍ ដើម្បី​ពិនិត្យ​លើ​លទ្ធភាព​នៃ​ការ​បោះត្រា​ទិដ្ឋាការ​លើ​យន្តហោះ​ដែរ។

ក្នុង​កិច្ច​ប្រជុំ លោក លឹម ប៊ុនហេង អ្នក​តំណាង ក្រុម​ការងារ​វិស័យ​ឯកជន​ផ្នែក​ស្រូវ​អង្ករ លើក​ឡើង​ពី​បញ្ហា​ចម្បង​ពីរ​ដែល​កំពុង​ជួប​ប្រទះ។ ដូច​ជា បញ្ហា​ហិរញ្ញប្បទាន។ ការ​មិន​ទទួល​យក​ស្តុក​ស្រូវ​អង្ករ​ជា​របស់​បញ្ចាំ​បាន​ធ្វើ​ឲ្យ​ការ​ទទួល​បាន​ប្រាក់​កម្ចី​នៅ​មាន​កម្រិត។ ការ​រាំង​ស្ទះ​ការ​ដឹក​ជញ្ជូន​ទៅ​កាន់​កំពង់ផែ​ជាដើម។

Content image - Phnom Penh Post

បញ្ហា​នេះ​លោក​នាយក​រដ្ឋ​មន្រ្តី​ថ្លែង​ថា សំណើ​សុំ​ដាក់​អាករ​លើ​តម្លៃ​បន្ថែម​សុំ​ការ​ផ្គត់​ផ្គង់​អង្ករ​ក្នុង​ស្រុក​រាជ​រដ្ឋាភិបាល​ផ្តល់​ជូន​នូវ​លក្ខណៈ​សម្បតិ្ត​ជា​សហគ្រាស​គាំទ្រ ដោយ​អនុវត្ត​អាករ​លើ​តម្លៃ​បន្ថែម​សូន្យ​ភាគរយ ចំពោះ​រោង​ម៉ាស៊ីន​កិន​ស្រូវ និង​សហគ្រាស ដែល​ប្រមូល​ទិញ​ស្រូវ​យក​មក​កែច្នៃ​ជា​អង្ករ សម្រាប់​ផ្គត់​ផ្គង​បន្ត​ឲ្យ​អ្នក​នាំ​ចេញ ដូច​គ្នា​និង​វិស័យ​កាត់ដេរ​ដែរ ប៉ុន្តែ​ត្រូវ​ស្នើ​សុំ​មក​អគ្គ​នាយកដ្ឋាន​ពន្ធដារ​ដោយ​ភ្ជាប់​មក​ជាមួយ​នូវ​ឯកសារ​គាំទ្រ​មួយ​ចំនួន ដូចជា កិច្ចសន្យា​ផ្គត់​ផ្គង់​អង្ករ និង​ប្រតិវេទ​គយ​ជាដើម។

លោក វ៉ាន់ ស៊ូអៀង ប្រធាន​ក្រុម​ការងារ ផ្នែក​ផលិតកម្ម​កែច្នៃ​សម្រាប់​នាំ​ចេញ និង​កិច្ច​សម្រួល​ពាណិជ្ជកម្ម បាន​ស្នើ​ដល់​រដ្ឋាភិបាល​ក្នុង​ការ​រក្សា​សន្តិភាព និង​ស្ថិរភាព​សណ្ឋាប់ធ្នាប់​សង្គម​ដើម្បី​បង្កើន​ទំនុក​ចិត្ត​ក្នុង​ចំណោម​អ្នក​វិនិយោគ។ ជំរុញ​អភិវឌ្ឍ​ធនធាន​មនុស្ស និង​ជំនាញ​ស្រប​តាម​ទីផ្សារ​ត្រូវ​ការ និង​ការ​លើក​កម្ពស់​ផលិតភាព​របស់​កម្មករ។ កែ​លម្អ​ប្រព័ន្ធ​ហេដ្ឋា​រចនា​សម្ព័ន្ធ​ទូរគមនាគមន៍ និង​បន្ត​ផ្គត់​ផ្គង់​ថាមពល​ដែល​មាន​តម្លៃ​ទាប​ជាង​បច្ចុប្បន្ន។

លោក ហ៊ុន សែន ថ្លែង​ថា រដ្ឋាភិបាល​នឹង​លើក​កម្ពស់​កិច្ច​សម្រួល​ពាណិជ្ជកម្ម​ដោយ​កាត់​បន្ថយ​ការ​ត្រួត​ពិនិត្យ​ទំនិញ​នាំ​ចេញ​ទៅ​ប្រទេស​ដែល​កម្ពុជា​ត្រូវ​បង់​ពន្ធ​ឲ្យ​មក​ត្រឹម ២ ភាគរយ​នៃ​ទំនិញ​សរុប​វិញ​ដើម្បី​ធ្វើ​ឲ្យ​ការ​នាំ​ចេញ​បាន​លឿន។ រដ្ឋាភិបាល​ក៏​នឹង​ពង្រឹង​ការ​សម្រប​សម្រួល​ឲ្យ​មាន​ភាព​ស៊ី​ចង្វាក់​គ្នា​រវាង​វិស័យ​អប់រំ បណ្តុះ​បណ្តាល​វិជ្ជាជីវៈ​ឲ្យ​ឆ្លើយ​តប​នឹង​តម្រូវ​ការ​ទីផ្សារ។

ពាក់​ព័ន្ធ​វិស័យ​កសិកម្ម​និង​កសិ-ឧស្សាហកម្ម លោក ម៉ុង ឫទ្ធី បាន​ស្នើ​ទស្សន​វិស័យ​បី​ចំណុច​ទៅ​ដល់​រដ្ឋាភិបាល​ឆ្ពោះ​ទៅ​កាន់​សមាហរណកម្ម​សេដ្ឋកិច្ច​អាស៊ាន។ ក្នុង​នោះ​រួម​មាន ទី​មួយ​ការ​បង្កើត​យន្តការ​ផ្លាស់​ប្តូរ​លើ​វិស័យ​បច្ចេកវិទ្យា​កសិកម្ម និង​កសិ-ឧស្សាហកម្ម​រវាង​បណ្តា​ប្រទេស​ក្នុង​តំបន់​អាស៊ាន ទី​ពីរ​ការ​បង្កើត​ប្រព័ន្ធ​សន្តិសុខ​ស្បៀង​ដើម្បី​ត្រួត​ពិនិត្យ​លើ​យន្តការ​ស្បៀង​អាហារ​ទាំង​មូល និង​ទីបី ការ​បង្កើន​ការ​បណ្តុះ​បណ្តាល ជា​កម្មករ វិស្វករ អ្នក​មាន​វិជ្ជាជីវៈ​ដើម្បី​បំពេញ​តម្រូវ​ការ​របស់​សមាហរណកម្ម​សេដ្ឋកិច្ច អាស៊ាន​នៅ​ឆ្នាំ ២០១៥។

លោក​នាយក​រដ្ឋ​មន្រ្តី​មាន​ប្រសាសន៍​ពាក់​ព័ន្ធ​និង​ទស្សន​វិស័យ​របស់ លោក ឧកញ៉ា ម៉ុង ឫទ្ធី ដូច្នេះ​ថា នៅ​ក្នុង​បរិការណ៍​នៃ​សហគមន៍​អាស៊ាន ការ​ត្រៀម​ខ្លួន​មួយ​ទៀត​ដែល​មិន​អាច​ខ្វះ​បាន​នោះ​គឺ​ការ​អភិវឌ្ឍ​មូលធន​មនុស្ស។

លោក ណាង សុធី សហ​ប្រធាន​ក្រុម​ការងារ​ផ្នែក​ទំនាក់​ទំនង​វិជ្ជាជីវៈ​បាន​ស្នើ​ទៅ​រដ្ឋាភិបាល​ចំណុច​សំខាន់ៗ​រួម​មាន​ទីមួយ​គឺ​ការ​លើក​ទឹក​ចិត្ត​ឲ្យ​មាន​បណ្តុះ​បណ្តាល​ធនធាន​មនុស្ស។ លោក​ក៏​បាន​សុំ​ឲ្យ​មាន​ការ​ពន្លឿន​ក្នុង​ការ​អនុម័ត​ច្បាប់​ស្តី​ពី​សហជីព និង ច្បាប់​តុលាការ​ការងារ ផង​ដែរ។

លោក ហ៊ុន សែន ថ្លែង​ថា ការ​ចូល​រួម​ជា​លក្ខណៈ​ស្ថាបនា និង​មាន​ការ​ទទួល​ខុស​ត្រូវ​ពី​សំណាក់​និយោជិត សហជីព និង​និយោជក​ដោយ​មាន​ការ​ពិគ្រោះ​យោបល់ និង​ការ​ចរចា​ដោយ​ត្រង់ៗ​រវាង​គ្នា​ជា​ការ​ចាំបាច់​ដើម្បី​ឈាន​ទៅ​លទ្ធផល​ល្អ​ក្នុង​ទំនាក់​ទំនង​ផ្នែក​ឧស្សាហកម្ម ផលិតភាព​និង​ប្រាក់​ឈ្នួល​សមរម្យ។

លោក សូ ងួន ប្រធាន​ក្រុម​កាងារ​វិស័យ​ឯកជន​ផ្នែក​ដឹក​ជញ្ជូន និង​ហេដ្ឋា​រចនា​សម្ព័ន្ធ​បាន​លើក​សំណើ​ឲ្យ​មាន​ការ​ជួយ​ជំរុញ និង​គាំទ្រ​ការ​វិនិយោគ​ក្នុង​កម្មវត្ថុ​ជួយ​ពង្រឹង និង​កែ​លម្អ​គុណភាព​សេវាកម្ម​ដឹក​ជញ្ជូន និង​សុំ​មាន​ការ​អនុគ្រោះ​ពន្ធ​នាំ​ចូល​មក​ត្រឹម ០ ភាគរយ​និង​លើក​លែង​ពន្ធអាករ​ពិសេស​នានា​សម្រាប់​រថយន្ត​ដឹក​ជញ្ជូន​ទំនិញ​ធុន​ធ្ងន់ និង​រថយន្ត​ទេសចរណ៍​ធុន​ធំ (Bus) ថ្មីៗ។

លោក​នាយក​រដ្ឋ​មន្រ្តី​បាន​លើក​ឡើង​ថា រាជ​រដ្ឋាភិបាល​បាន​ឯកភាព​ចំពោះ​សំណើ​ដែល​ស្នើ​ឲ្យ​រថយន្ត​ដឹក​ជញ្ជូន​អាច​ឆ្លង​កាត់​ផ្លូវ ៣៧១ តែ​សម្រាប់​តែ​ករណី​ដឹក​ជញ្ជូន​ស្រូវ​អង្ករ​ទេ​ក្នុង​គោល​បំណង​លើក​កម្ពស់​វិស័យ​នាំ​ចេញ​អង្ករ។

រដ្ឋាភិបាល​នឹង​បន្ត​ពិនិត្យ​សម្រួល​បន្ទុក​ពន្ធ​ដល់​ក្រុមហ៊ុន​វិនិយោគ​តាម​ការ​ជាក់ស្តែង តែ​ទន្ទឹម​នេះ​វិស័យ​ឯកជន​ត្រូវ​បន្ត​ខិត​ខំ​កសាង​និង​អភិវឌ្ឍ​សមត្ថភាព​ខ្លួន​ហើយ​ត្រូវ​បោះបង់​ចោល​នូវ​ទម្លាប់​ស្នើ​សុំ​ការ​លើក​ទឹក​ចិត្ត​ផ្នែក​ពន្ធដារ​ពី​រដ្ឋ​ដោយ​ជំនួស​វិញ​នូវ​ការ​ផ្តល់​ព័ត៌មាន និង​អនុសាសន៍​នានា​ជូន​រាជ​រដ្ឋាភិបាល​ពិសេស​ពាក់ព័ន្ធ​នឹង​ការ​ដោះស្រាយ​បញ្ហា​ប្រឈម​នានា និង​ចាប់​យក​ឱកាស​ល្អៗ​ដែល​កើត​ចេញ​ពី​សមាហរណកម្ម​សេដ្ឋកិច្ច​អាស៊ាន​ឆ្នាំ ២០១៥។

តែ​ទោះ​ជា​យ៉ាង​ណា​ក៏​ដោយ​វេទិកា​លើក ទី១៧ នេះ​ក៏​មិន​ទាន់​បាន​ដោះស្រាយ នូវ​បញ្ហា​ទាំង​ឡាយ​ដែល​ត្រូវ​បាន​លើក​ឡើង​ពី​ក្រុម​ការងារ​ទាំង​អស់​នោះ​ឡើយ ដោយ​លោក​នាយក​រដ្ឋ​មន្រ្តី ហ៊ុន សែន ក៏​បាន​ធ្វើ​ការ​អះអាង​យ៉ាង​មុត​មាំ​ថា រាល់​បញ្ហា​ដែល​មិន​ធ្វើ​ការ​ដោះស្រាយ​នា​ពេល​នេះ​នឹង​ទាមទារ​ឲ្យ​ក្រុម​ការងារ​ពី​វិស័យ​ឯកជន​ទាំង ១០ ជួប​ពិភាក្សា​បន្ត​ទៀត​ជាមួយ​នឹង​ប្រធាន​ក្រុម​ការងារ​ដែល​សុទ្ធ​តែ​មាន​សមាសភាព​រដ្ឋ​មន្រ្តី​តំណាង​ក្រសួង​នីមួយៗ៕

អត្ថបទគួរចាប់អារម្មណ៍