.jpg)
រថយន្តកំពុងដឹកស្រូវយកទៅលក់ឲ្យឈ្មួញប្រមូលទិញនៅរោងម៉ាស៊ីន កាលពីពេលកន្លងមក។ ហេង ជីវ័ន
ភ្នំពេញៈ កង្វះទុនក្នុងវិស័យស្រូវអង្ករនៅតែជាបញ្ហាប្រឈមដែលត្រូវបានវិស័យនេះលើកឡើងជាញឹកញាប់អស់រយៈពេលជាច្រើនឆ្នាំមកហើយ បើទោះបីជាធនាគារអភិវឌ្ឍន៍ជនបទ (RDB) គ្រប់គ្រងដោយបានបញ្ចេញកម្ចីសម្រាប់គាំទ្រដល់វិស័យនេះជាច្រើនឆ្នាំមកហើយក្តី។
អ្នកនៅក្នុងវិស័យនេះតែងស្តីបន្ទោសលើកង្វះទុនថាបានរារាំងដល់កំណើននាំចេញអង្កររបស់កម្ពុជាអស់រយៈពេលជាច្រើនឆ្នាំមកដល់នឹងពេលនេះ។
ការលើកឡើងនេះធ្វើឡើងក្នុងកិច្ចប្រជុំរវាងធនាគារអភិវឌ្ឍន៍ជនបទ និងសហព័ន្ធស្រូវអង្ករកម្ពុជាកាលពីថ្ងៃចន្ទ។
លោក កៅ ថាច អគ្គនាយកធនាគារអភិវឌ្ឍន៍ជនបទបានឲ្យដឹងថា បច្ចុប្បន្នក្នុងចំណោមមូលធនរបស់ធនាគារអភិវឌ្ឍន៍ជនបទទាំងជាង ១៦០ លានដុល្លារ គឺប្រមាណជាង ៧០ ភាគរយ ត្រូវបានផ្តល់ទៅឲ្យវិស័យស្រូវអង្ករដែលនេះជាចំនួនដ៏ខ្ពស់រួចទៅហើយ។ ម្យ៉ាងទៀតលទ្ធភាពនៃទុនរបស់ RDB ក៏មានកម្រិតផងដែរ។ លោកថ្លែងថា៖ «យើង [RDB] ស្ទើរតែអស់លទ្ធភាពក្នុងការបញ្ចេញទុនបន្ថែមទៀតទៅក្នុងវិស័យស្រូវអង្ករហើយ អ៊ីចឹងស្នើទៅប្រភពផ្សេងឲ្យជួយទើបទៅរួច»។
បើតាមលោក កៅ ថាច លោកក៏ចង់ឲ្យរដ្ឋាភិបាលកម្ពុជាបង្កើនទុនបន្ថែមទៀតសម្រាប់ឲ្យធនាគារ RDB មានលទ្ធភាពផ្តល់ប្រាក់កម្ចីបានកាន់តែច្រើននៅពេលខាងមុខ។
របាយការណ៍នាំចេញស្រូវអង្កររបស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករបានឲ្យដឹងថា ក្នុងរយៈពេល ៩ ខែ ឆ្នាំ ២០១៩ ការនាំចេញអង្ករកម្ពុជាទៅកាន់ទីផ្សារអន្តរជាតិមានបរិមាណ ៣៩៨ ៥៨៦ តោនកើនឡើង ២,៣ ភាគរយ បើធៀបរយៈពេលដូចគ្នានាឆ្នាំ ២០១៨។
ការនាំចេញទៅទីផ្សារចិនកំពុងនាំមុខក្នុងចំណោមទីផ្សារអន្តរជាតិផ្សេងទៀត ចាប់តាំងពីសហភាពអឺរ៉ុបបានសម្រេចយកពន្ធនាំចូលអង្ករកម្ពុជាពីដើមឆ្នាំ ២០១៩ មក។
របាយការណ៍បង្ហាញថា ការនាំចេញអង្ករទៅចិនក្នុងរយៈពេល ៩ ខែ ឆ្នាំនេះមានបរិមាណ ១៥៧ ៧៩៣ តោន សហភាពអឺរ៉ុបមាន ១៣៥ ៤៧១ តោន និងតំបន់អាស៊ាន មាន ៥៣ ៣៤៧ តោន ក្រៅពីនោះមាននាំចេញទៅអាហ្វ្រិក និងទិសដៅមួយចំនួនទៀត។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) កាលពីម្សិលមិញបានប្រាប់ភ្នំពេញ ប៉ុស្តិ៍ថា វិស័យស្រូវអង្ករកម្ពុជានៅត្រូវការទុនបន្ថែមទៀតដើម្បីធ្វើឲ្យទីផ្សារនេះមានភាពរឹងមាំ។ លោកថ្លែងថា៖ «ជាធម្មតានៅពេលរដូវប្រមូលដំបូងៗម្ចាស់ក្រុមហ៊ុននាំចេញអង្ករ និងរោងម៉ាស៊ីនកិនស្រូវនីមួយៗតែងបញ្ចេញប្រាក់ទិញស្រូវយកមកស្តុកទុក ដែលជាហេតុធ្វើឲ្យពួកគាត់ត្រូវខ្វះខាតប្រាក់នៅចុងរដូវកាល»។
លោកថ្លែងថា៖ «វិស័យស្រូវអង្ករកម្ពុជាត្រូវការទឹកប្រាក់ប្រមាណ ២០០ លានដុល្លារទៀត ដើម្បីធ្វើជាទុនបង្វិល»។
តាមលោក លន់ យ៉េង ទុនវិនិយោគសរុបនៅក្នុងវិស័យស្រូវអង្ករបច្ចុប្បន្នរួមបញ្ចូលគ្នាមានតម្លៃប្រមាណពី ៣០០ លានទៅ ៤០០ លានដុល្លារ។
លោក ហេង ផេង នាយកប្រតិបត្តិក្រុមហ៊ុននាំចេញអង្ករ ថ្មគោល នៅខេត្តបាត់ដំបងបាននិយាយថា បើរោងម៉ាស៊ីនមានទុនគ្រប់គ្រាន់ វាមិនត្រឹមតែអាចជួយទប់ស្កាត់ការហូរចេញស្រូវទៅកាន់ប្រទេសជិតខាងនៅពេលប្រមូលផលប៉ុណ្ណោះទេ តែវាក៏នឹងចូលរួមចំណែកក្នុងការបង្កើនបរិមាណនៃការនាំចេញអង្ករទៅកាន់ទីផ្សារអន្តរជាតិផងដែរ។
លោកថ្លែងថា៖ «ក្នុងនាមជាអ្នកនៅក្នុងវិស័យស្រូវអង្ករ ខ្ញុំស្នើឲ្យ [RDB ] និងធនាគារពាណិជ្ជជួយផ្តល់ប្រាក់កម្ចីបន្ថែម ឬយ៉ាងហោចណាស់ជួយរក្សាប្រាក់កម្ចី និងអត្រាការប្រាក់ដដែល»។
បច្ចុប្បន្នតម្លៃស្រូវនៅខេត្តបាត់ដំបងនៅរដូវប្រមូលផលនេះគឺ ១ ១៨០ រៀល ក្នុង ១ គីឡូក្រាម ធៀបនឹងរយៈពេលដូចគ្នាកាលពីឆ្នាំមុនដែលមានតម្លៃជាង ១ ៣៥០ រៀល៕LA
