ភ្នំពេញ៖ ភ្ញៀវទេសចរប្រមាណ ៩ ពាន់នាក់ បានធ្វើដំណើរកម្សាន្តនៅតាមគោលដៅទេសចរណ៍នានានៅកម្ពុជានៅសប្តាហ៍ដំបូង គិតចាប់តាំងពីរដ្ឋាភិបាលបានប្រកាសបើកឲ្យដំណើរការរមណីយដ្ឋាននៅតាមបណ្តាខេត្តមួយចំនួន។
រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងនៅថ្ងៃទី ៣ ខែ ឧសភា ឆ្នាំ ២០២១ ថា គិតចាប់ពីថ្ងៃទី ២៦ ខែមេសា ដល់ថ្ងៃទី ២ ខែឧសភា នៃការបញ្ចប់បិទរមណីយដ្ឋានទេសចរណ៍ទូទាំងប្រទេសឡើងវិញនោះ មិនទាន់មានភ្ញៀវទេសចរចេញទស្សនាច្រើននៅឡើយទេ។ ម្យ៉ាងទៀត ម្ចាស់រមណីយដ្ឋាន និងគោលដៅទេសចរណ៍មួយចំនួនទៀតក៏នៅមិនទាន់បើកដំណើរការឡើងវិញគួរឲ្យកត់សម្គាល់ផងដែរ។
លោករដ្ឋមន្ត្រីថ្លែងទៀតថា ក្នុងរយៈពេលមួយសប្តាហ៍កន្លងមកនេះ កម្ពុជាទទួលបានភ្ញៀវទេសចរសរុបចំនួន ៨ ៩៦០ នាក់ ក្នុងនោះមានភ្ញៀវទេសចរជាតិ ៨ ៧៥៤ នាក់ និងភ្ញៀវបរទេសផ្ទៃក្នុង ២០៦ នាក់។
លោករដ្ឋមន្រ្តីកត់សម្គាល់ថា ចំនួនភ្ញៀវទេសចរផ្ទៃក្នុង គឺនៅមានចំនួនតិចតួចនៅឡើយ បើប្រៀបធៀបនឹងស្ថានភាពមុនព្រឹត្តិការណ៍ ២០ កុម្ភៈ។ រីឯគោលដៅទេសចរណ៍ទាំងអស់នៅរាជធានីភ្នំពេញ និងខេត្តកណ្តាល ក៏អាជ្ញាធរមិនទាន់អនុញ្ញាតឲ្យបើកឡើងវិញទេ។
លោក ថោង ខុន ឲ្យដឹងទៀតថា៖ «ជាមួយគ្នានេះ តាមបណ្តាខេត្តផ្សេងៗ រដ្ឋបាលខេត្តមានការប្រយ័ត្នប្រយែងខ្លាំងក្នុងការបើករមណីយដ្ឋាន និងគោលដៅទេសចរណ៍ឡើងវិញ ដោយពុំទាន់អនុញ្ញាតឲ្យបើកឡើងវិញទេ និងនៅបន្តអនុវត្តវិធានការរឹតត្បិតការធ្វើដំណើរ និងការចេញចូលតំបន់សំខាន់ៗ ពិសេសគោលដៅទេសចរណ៍»។
លោករដ្ឋមន្ត្រី ថោង ខុន បន្ថែមទៀតថា ក្រសួងទេសចរណ៍នឹងបន្តជំរុញដល់មន្ទីរទេសចរណ៍រាជធានី-ខេត្តឲ្យបន្តពង្រឹង និងបង្កើនកិច្ចសហការជាមួយរដ្ឋបាលខេត្តដែលពាក់ព័ន្ធ និងម្ចាស់មូលដ្ឋានអាជីវកម្ម និងអ្នកគ្រប់គ្រងទាំងអស់ ដើម្បីបង្កើនការអប់រំពន្យល់ណែនាំដល់ភ្ញៀវទេសចរ និងអ្នកផ្តល់សេវាទាំងអស់នៅក្នុងវិស័យទេសចរណ៍ ដើម្បីធានាដល់សុវត្ថិភាព និងសុខភាពសាធារណៈ។
លោកនិយាយថា៖ «ភ្ញៀវទេសចរភាគច្រើនទៅកម្សាន្តជាលក្ខណៈគ្រួសាររបស់គាត់ និងជួបជុំគ្នាតិចតួចបំផុត ហើយភាគច្រើនសុទ្ធតែប្រជាពលរដ្ឋនៅក្នុងតំបន់»។
ប្រធានសមាគមទីភ្នាក់ងារទេសចរណ៍កម្ពុជា (CATA) អ្នកស្រី ឆាយ ស៊ីវលីន ឲ្យដឹងថា បើទោះជាពុំទាន់មានភ្ញៀវទេសចរដើរកម្សាន្តនៅពេលនេះ ប៉ុន្តែវានឹងជួយឲ្យម្ចាស់រមណីយដ្ឋានត្រៀមលក្ខណសម្បត្តិជាមុនក្នុងការទទួលស្វាគមន៍ភ្ញៀវទេសចរនៅពេលមានការបើកទូលាយឡើងវិញ នៅក្នុងវិស័យនេះ។
អ្នកស្រី ស៊ីវលីន និយាយថា៖ «ទោះបីជាក្នុងអំឡុងពេលបើកដំបូងវានឹងមិនទទួលបានភ្ញៀវច្រើន ក៏ប៉ុន្តែវាយ៉ាងហោចណាស់ក៏ពួកគាត់នឹងទទួលបានចំណូល ឬមានសកម្មភាពលក់ដូរកម្រើកឡើងវិញ ដូចនេះ ខ្ញុំគិតថាការបើកឡើងវិញនេះ នឹងជួយដល់អាជីវកម្មនៅថ្នាក់មូលដ្ឋានដែលនេះជាការចាប់ផ្តើមក្នុងវិស័យទេសចរណ៍»។
នៅកម្ពុជាមានរមណីយដ្ឋាន និងគោលដៅទេសចរណ៍ដែលមានសក្តានុពលនៅទូទាំងប្រទេសសរុបចំនួន ៥៥៧ កន្លែង រួមបញ្ជូលទាំងរមណីយដ្ឋានទើបនឹងបង្កើតថ្មីក្នុងដំណាក់កាលជំងឺកូវីដ ១៩។ នេះបើតាមលោក តុប សុភ័ក្រ មន្រ្តីនាំពាក្យក្រសួងទេសចរណ៍។
បើតាមក្រសួងទេសចរណ៍សម្រាប់ការចំណាយរបស់ភ្ញៀវទេសចរក្នុងឆ្នាំ ២០២០ គឺមានចំនួនប្រមាណ ៤០០ លានដុល្លារ។
របាយការណ៍របស់ក្រសួងទេសចរណ៍ឆ្នាំ ២០២០ ឲ្យដឹងថា ភ្ញៀវទេសចរអន្តរជាតិមកប្រទេសកម្ពុជា មានចំនួន ១,៣១ លាននាក់ ថយចុះ ៨០,២ ភាគរយ ធៀបនឹងឆ្នាំ ២០១៩ ដែលមានចំនួន ៦,៦១ លាននាក់។
រីឯ ភ្ញៀវទេសចរក្នុងស្រុកដែលធ្វើដំណើរទៅកម្សាន្តកន្លែងនានា ក្នុងប្រទេសមានចំនួនសរុប ៧,២៣ លាននាក់ ធ្លាក់ចុះ ជិត ៣៦,១ ភាគរយ ពីចំនួន ១១,៣ លាននាក់កាលពីឆ្នាំ ២០១៩៕