ភ្នំពេញៈ កម្ពុជាកំពុងធ្វើយុទ្ធនាការផ្សព្វផ្សាយអង្ករក្រអូបទៅកាន់ទីផ្សារចិន ដើម្បីជំរុញការនាំចេញអង្ករទៅកាន់ទីផ្សារធំជាងគេរបស់ពិភពលោកមួយនេះ។ នេះបើយោងតាមអនុប្រធានសហព័ន្ធស្រូវអង្ករកម្ពុជា។
លោក ចាន់ សុខឃាំង អនុប្រធានសហព័ន្ធស្រូវអង្ករកម្ពុជា (CRF) បានប្រាប់ភ្នំពេញ ប៉ុស្តិ៍កាលពីថ្ងៃព្រហស្បតិ៍ថា វិធានការនេះធ្វើឡើងដើម្បីអាចសម្រេចបានតាមកូតាដែលប្រទេសចិនបានផ្តល់ឲ្យកម្ពុជាចំនួន ៤០ ម៉ឺនតោនក្នុង ១ ឆ្នាំ។
CRF បានប្តេជ្ញាថានឹងនាំចេញអង្ករឲ្យបាន ១ លានតោនត្រឹមឆ្នាំ ២០២២ ក្នុងនោះនឹងនាំចេញទៅចិនឲ្យបាន ៣៥ ភាគរយនៃការនាំចេញសរុបដោយកំណត់ការនាំចេញអង្ករក្រអូបប្រណីត ៣០ ភាគរយ អង្ករក្រអូបធម្មតា ៤០ ភាគរយ និងអង្ករធម្មតា ៣០ ភាគរយ។
លោក ចាន់ សុខឃាំង បានឲ្យដឹងថា CRF កំពុងធ្វើកិច្ចការជាច្រើនដើម្បីបង្កើនការនាំចេញអង្ករក្រអូបទៅកាន់ប្រទេសចិនដែលជាទីផ្សារមានសក្តានុពលខ្ពស់ បន្ទាប់ពីការនាំចេញអង្ករកម្ពុជាទៅកាន់ទីផ្សារអឺរ៉ុបធ្លាក់ចុះ។ លោកបានបន្តថា កិច្ចការទាំងនោះមានដូចជា ការជួបពិភាក្សាជាមួយអាជ្ញាធរ និងក្រុមហ៊ុនចែកចាយ និងការទៅចូលរួមក្នុងកម្មវិធីផ្សេងៗទៀតនៅក្នុងប្រទេសចិន។
លោកថ្លែងថា៖ «ការនាំចេញអង្ករក្រអូបទៅប្រទេសចិនកំពុងមានការកើនឡើង ខណៈអង្ករក្រអូបកម្ពុជាត្រូវបានគេទទួលស្គាល់ថា ជាអង្ករល្អជាងគេលើពិភពលោក ដោយទទួលបានចំណាត់ថ្នាក់លេខ ១ ចំនួន ៤ ឆ្នាំរួចមកហើយ»។
លោកបន្តថាប្រទេសចិនជាទីផ្សារធំដែលមានតម្រូវការអង្ករច្រើនដោយបច្ចុប្បន្ននេះបរិមាណអង្ករកម្ពុជានាំចូលទៅទីនោះមានចំណែកទីផ្សារប្រមាណត្រឹមតែ ៥ ភាគរយប៉ុណ្ណោះ។ លោកបន្តថា៖ «នេះជាឱកាសដ៏ធំសម្រាប់អង្ករក្រអូបកម្ពុជា ខណៈតម្លៃអង្ករក្រអូបរបស់យើងក៏ល្អផងដែរ បើធៀបជាមួយអង្ករក្រអូបរបស់ប្រទេសថៃ»។
បច្ចុប្បន្ននេះតម្លៃអង្ករក្រអូបកម្ពុជានៅលើទីផ្សារចិន មានតម្លៃចន្លោះពី ៩២០ ទៅ ៩៣០ ដុល្លារក្នុង ១ តោន ខណៈអង្ករក្រអូបថៃមានតម្លៃចន្លោះពី ១ ១៥០ ទៅ ១ ២០០ ដុល្លារ។
សម្រាប់រយៈពេល ៩ ខែ ឆ្នាំ ២០១៩ ការនាំចេញអង្ករពីកម្ពុជាទៅកាន់ទីផ្សារអន្តរជាតិមានសរុប ៣៩៨ ៥៨៦ តោន កើនឡើង ២,៣ ភាគរយ បើធៀបនឹងរយៈពេលដូចគ្នាឆ្នាំ ២០១៨។
សម្រាប់ឆ្នាំ ២០១៩ លោក សុខឃាំង ព្យាករថា ការនាំចេញអង្ករទៅកាន់ទីផ្សារអន្តរជាតិនឹងអាចមានកំណើនប្រមាណ ៨ ភាគរយ បើធៀបទៅនឹងឆ្នាំ ២០១៨៕ LA