.jpg)
ភ្នំពេញៈ កម្ពុជាបានឈានមួយជំហានទៀតឆ្ពោះទៅរកការដំណើរការសេដ្ឋកិច្ចតាមឌីជីថលនាពេលខាងមុខ ខណៈរដ្ឋាភិបាលកាលពីថ្មីៗនេះបានអនុម័តលើអនុក្រឹត្យស្តីពី «ហត្ថលេខាឌីជីថល» ដែលបើកផ្លូវឲ្យមានការរៀបចំរចនាសម្ព័ន្ធសម្រាប់បង្កើតប្រព័ន្ធបញ្ជាក់ពីភាពត្រឹមត្រូវនៃឯកសារអេឡិចត្រូនិកតាមអ៊ីនធឺណិត។
បច្ចុប្បន្នបើទោះបីជាស្ថាប័នរដ្ឋាភិបាលមួយចំនួនបានដាក់ឲ្យអនុវត្តប្រព័ន្ធចុះបញ្ជី ឬ ស្នើសុំសិទ្ធិផ្សេងៗតាមអនឡាញ តែកិច្ចការជាក់ស្តែងនៅតែត្រូវការក្រដាសស្នាម ឬ ត្រូវតែធ្វើឡើងដោយដៃនៅក្នុងដំណាក់កាលខ្លះនៅឡើយដោយសារថាវាមានភាពចាំបាច់ដើម្បីបញ្ជាក់ពីភាពត្រឹមត្រូវនៃទម្រង់ឯកសារដែលបានស្នើសុំ និងការមិនអាចប្រកែកបានពីអ្នកស្នើសុំនាពេលបន្ទាប់។
ហត្ថលេខាឌីជីថលសំដៅដល់ទិន្នន័យដែលភ្ជាប់នឹងសារអេឡិចត្រូនិក ដើម្បីបញ្ជាក់អត្ដសញ្ញាណនៃហត្ថលេខីឌីជីថល និងផ្ទៀងផ្ទាត់ស្ថានភាពដើមនៃសារអេឡិចត្រូនិកដែលហត្ថលេខីឌីជីថលបានចុះហត្ថលេខា។
អនុក្រឹត្យស្តីពី «ហត្ថលេខាឌីជីថល» ត្រូវបានចុះហត្ថលេខាអនុម័តដោយនាយករដ្ឋមន្ត្រី ហ៊ុន សែន កាលពីថ្ងៃទី ២៩ ខែធ្នូ ឆ្នាំ ២០១៧។
លោក អ៊ូ ផាន់ណារិទ្ធ ប្រធាននាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មាននៃក្រសួង MPTC បានប្រាប់ក្រុមអ្នកយកព័ត៌មានបន្ទាប់ពីពិធីសិក្ខាសាលាផ្សព្វផ្សាយអនុក្រឹត្យ ស្តីពីហត្ថលេខាឌីជីថល កាលពីម្សិលមិញថា ការដំណើរការប្រព័ន្ធថ្មីនេះត្រូវការបង្កើតតួអង្គសំខាន់មួយទៀតគឺអាជ្ញាធរហត្ថលេខាឌីជីថល ជាភ្នាក់ងារគ្រប់គ្រងផ្តល់ហត្ថលេខាឌីជីថលទៅឲ្យអ្នកប្រើប្រាស់ចុងក្រោយ។
លោកថ្លែងថា៖ «ឥឡូវដោយសារអត់ទាន់មានប្រព័ន្ធហត្ថលេខាឌីជីថលអ៊ីចឹងរាល់ឯកសារដែលផ្ញើវាពិបាកក្នុងការបញ្ជាក់ថាតើ វាជាពាក្យស្នើសុំពីម្ចាស់ដើម ឬ មិនមែនណាស់»។
លោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានលើកឡើងថាខណៈពេលដែលកម្ពុជាកំពុងតែឆ្ពោះទៅកាន់ការធ្វើពាណិជ្ជកម្មអនឡាញកាន់តែច្រើនជាងមុន ក្រុមហ៊ុន សហគ្រាស និងស្ថាប័នហិរញ្ញវត្ថុនឹងក្លាយទៅជាគោលដៅនៃការវាយប្រហារពីសំណាក់ឧក្រិដ្ឋជននានាដោយព័ត៌មានសម្ងាត់ពាណិជ្ជកម្មត្រូវបានលួច កម្មសិទ្ធិបញ្ញាត្រូវបានចម្លង ការបន្លំអត្តសញ្ញាណ និងឯកសារ និងការបោកបញ្ឆោតក្នុងការផ្ទេរប្រាក់ជាដើម។
លោកបន្តថា ដើម្បីជំរុញកំណើនប្រតិបត្តិការអនឡាញឲ្យកាន់តែមានភាពទូលំទូលាយជាងមុន រដ្ឋាភិបាលកម្ពុជាមានផែនការសាងសង់នូវមាត់ច្រកបង់ប្រាក់ជាតិនាពេលអនាគតដ៏ខ្លីខាងមុខនេះ។
លោកបន្តថា៖ «យើងត្រូវមានវិធីការពារ ហើយវិធីការពារមួយក្នុងចំណោមវិធីជាច្រើនគឺដំណើរការហត្ថលេខាឌីជីថលដើម្បីកុំឲ្យមានការបន្លំ»៕LA
