.jpg)
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ ហុង មិនា
ភ្នំពេញៈ រាជរដ្ឋាភិបាលកំពុងរៀបចំសេចក្តីព្រាងច្បាប់ថ្មីស្តីពីមូលបត្ររដ្ឋ (Government Securities) ដើម្បីជំនួសច្បាប់ចាស់ដើម្បីត្រួសត្រាយផ្លូវធ្វើការបោះផ្សាយមូលបត្ររដ្ឋក្នុងការកៀរគរហិរញ្ញប្បទានក្នុងស្រុក និងជាការធ្វើពិពិធកម្មនៃប្រភពទុនរបស់រដ្ឋជាជាងការខ្ចីបុលពីខាងក្រៅ។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុចេញផ្សាយកាលពីថ្ងៃទី ២៨ ខែកក្កដា បានឲ្យដឹងថា ដោយតម្រូវការធនធាន និងហិរញ្ញប្បទានមានការកើនឡើងដែលអាចឆ្លើយតបនឹងតម្រូវការជាក់ស្តែងនៃការអភិវឌ្ឍសេដ្ឋកិច្ច និងសង្គមតាមរយៈបុរេសកម្មក្នុងការគិតគូរដើម្បីពង្រីកវិសាលភាពនៃប្រភពហិរញ្ញប្បទាន ជាពិសេសដោយផ្តោតការយកចិត្តទុកដាក់លើប្រភពហិរញ្ញប្បទានក្នុងស្រុកដែលនៅមានសក្តានុពលខ្ពស់នៅឡើយ ក្រសួងសេដ្ឋកិច្ច និងហិរញ្ញវត្ថុបានរៀបចំ «សេចក្តីព្រាងច្បាប់ស្តីពីមូលបត្ររដ្ឋ (ថ្មី) (Government Securities) ដើម្បីជំនួសឲ្យច្បាប់ចាស់ដែលបានចូលជាធរមានតាំងពីឆ្នាំ ២០០៧ ហើយកំពុងមានសុពលភាពរហូតដល់ពេលបច្ចុប្បន្ន។
សេចក្តីប្រកាសព័ត៌មាននេះបញ្ជាក់ថា៖ «ច្បាប់ថ្មីនេះជាមូលដ្ឋានគតិយុត្ត ដើម្បីអនុញ្ញាតឲ្យរាជរដ្ឋាភិបាលកម្ពុជាអាចបោះផ្សាយមូលបត្រតាមរយៈការកំណត់នូវវិសាលភាព ការសម្រេចលើការបោះផ្សាយ កំណត់ទំហំ និងទម្រង់នៃការបោះផ្សាយមូលបត្ររដ្ឋ ការកំណត់អ្នកចូលរួម និងនីតិវិធីក្នុងការជួញដូរមូលបត្ររដ្ឋ ព្រមទាំងទោសប្បញ្ញត្តិជាដើម»។
សេចក្តីព្រាងច្បាប់ថ្មីនេះមានភាពគ្រប់ជ្រុងជ្រោយ និងឆ្លើយតបខ្ពស់ទៅនឹងបរិបទបច្ចុប្បន្ន និងនិន្នាការ ការប្រែប្រួលនៃការអភិវឌ្ឍរបស់កម្ពុជាតាមរយៈការកំណត់នូវក្របខ័ណ្ឌរួមសម្រាប់គ្រប់គ្រងការបោះផ្សាយ ការជួញដូរ និងការគ្រប់គ្រងមូលបត្ររដ្ឋ និងការកំណត់នូវគោលបំណងជាក់លាក់រួមមាន ការឆ្លើយតបទៅនឹងតម្រូវការហិរញ្ញប្បទាន ជាពិសេសសម្រាប់ការអភិវឌ្ឍហេដ្ឋារចនាសម្ព័ន្ធ ការពង្រឹងការគ្រប់គ្រងតម្រូវការសាច់ប្រាក់ ការអភិវឌ្ឍវិស័យមូលបត្រ និងហិរញ្ញវត្ថុ និងការគាំទ្រគម្រោងអាទិភាព និងចាំបាច់ផ្សេងទៀត។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ភ្នំពេញប៉ុស្តិ៍ថា សេចក្តីព្រាងច្បាប់ថ្មីនេះមានភាពគ្រប់ជ្រុងជ្រោយក្នុងការផ្តល់លទ្ធភាពឲ្យរដ្ឋាភិបាលធ្វើការបោះផ្សាយមូលបត្ររដ្ឋក្នុងការកៀរគរធនធានក្នុងស្រុកដើម្បីធ្វើការអភិវឌ្ឍប្រទេសតាមតម្រូវការជាក់ស្តែង។ ទោះយ៉ាងណា លោកមិនអាចប្រាប់ថា តើសេចក្តីព្រាងច្បាប់ថ្មីនេះនឹងត្រូវបានធ្វើការអនុម័តជាផ្លូវការដោយគណៈរដ្ឋមន្ត្រី និងរដ្ឋសភា នៅពេលណានោះទេ។
លោកថ្លែងថា៖ «ដោយតែច្បាប់ចាស់មិនមានលក្ខណៈគ្រប់ជ្រុងជ្រោយដែលតម្រូវឲ្យយើងធ្វើការពិនិត្យឡើងវិញ និងកែប្រែធ្វើច្បាប់ថ្មីដែលគ្រប់ជ្រុងជ្រោយ និងអនុញ្ញាតឲ្យយើងចាប់ផ្តើមអនុវត្តបាន»។
លោក វង្សី វិស្សុត រដ្ឋលេខាធិកាប្រចាំការនៃក្រសួងសេដ្ឋកិច្ច និងហិរញ្ញវត្ថុ ធ្លាប់បានបញ្ជាក់ផងដែរថា ការបង្កើតឲ្យមានមូលបត្រគឺជាយន្តការមួយក្នុងការកៀរគរធនធានក្នុងស្រុកជាជាងការពឹងផ្អែកទៅលើការផ្តល់ជំនួយបរទេស។
លោកថ្លែងថា៖ «យើងមិនអាចចាំតែពឹងផ្អែកតែទាំងស្រុងទៅលើបំណុលពីក្រៅឡើយដែលវាមានហានិភ័យខ្ពស់»៕ LA
