.jpg)
រឺុម៉កម៉ូតូជិះឆ្លងកាត់ច្រកព្រំដែនបាវិត ខេត្តស្វាយរៀង នាពេលកន្លងមក។ ហ៊ាន រង្សី
ភ្នំពេញៈ រដ្ឋាភិបាលកម្ពុជាកំពុងសិក្សាលទ្ធភាពសាងសង់ហេដ្ឋារចនាសម្ព័ន្ធផ្លូវដែកពីទីក្រុងភ្នំពេញតភ្ជាប់ទៅក្រុងបាវិតដែលជាច្រកទ្វារព្រំដែនអន្តរជាតិកម្ពុជា និងវៀតណាម។
អ្នកនៅក្នុងវិស័យដឹកជញ្ជូនជឿថា គម្រោងនេះនឹងរួមចំណែកជំរុញការដោះដូរទំនិញរវាងប្រទេសទាំង ២ ឱ្យកាន់តែល្អ ប្រសើរថែមទៀត។
លោក លី បូរិន អនុរដ្ឋលេខាធិការក្រសួងសាធារណការ និងដឹកជញ្ជូនប្រាប់ភ្នំពេញប៉ុស្តិ៍កាលពីថ្ងៃចន្ទថា ការសិក្សាគម្រោងសាងសង់ហេដ្ឋារចនាសម្ព័ន្ធផ្លូវដែកថ្មីពីរាជធានី-ភ្នំពេញទៅកាន់ក្រុងបាវិតក្នុងខេត្តស្វាយរៀងកំពុងដំណើរការ។
លោកថ្លែងថា៖ «គេកំពុងតែធ្វើការសិក្សាលើលទ្ធភាពសាងសង់ហេដ្ឋារចនាសម្ព័ន្ធផ្លូវដែក ហើយយើងមិនទាន់ដឹកថា គម្រោងនេះនឹងបញ្ចប់ពេលណានោះទេ។ យើងធ្លាប់បានសិក្សាម្តងរួចមកហើយ ដែលយើងសិក្សាសាងសង់ផ្លូវដែក តភ្ជាប់ពីស្រុកស្នួលខេត្តក្រចះទៅក្រុងបាវិតខេត្តស្វាយរៀង ប៉ុន្តែភាគីវៀតណាមបានស្នើសុំយើងឱ្យសាងសង់ផ្លូវដែកពីភ្នំពេញទៅក្រុងបាវិតវិញ ហើយភាគីវៀតណាមនឹងសាងសង់ពីទីក្រុងហូជីមិញឆ្ពោះមកក្រុងបាវិត ដូច្នេះយើងសិក្សាគម្រោងនេះឡើងវិញ»។
លោក វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូនប្រាប់ ភ្នំពេញ ប៉ុស្តិ៍ ថា ការអភិវឌ្ឍផ្លូវដែកគឺជាអាទិភាពទី ២ របស់រដ្ឋាភិបាល បន្ទាប់ពីផ្លូវថ្នល់ដែលជាការជំរុញលើកកម្ពស់ភាពប្រកួតប្រជែង និងពាណិជ្ជកម្មឆ្លងដែនជាមួយនឹងប្រទេសជិតខាងកម្ពុជា។
លោកថ្លែងថា៖ «យើងត្រូវតែអភិវឌ្ឍផ្លូវដែកដើម្បីដឹកទំនិញនាំចេញរបស់យើងទៅកាន់ទីផ្សារអន្តរជាតិឱ្យបានច្រើន។ យើងឃើញថា ក្រុងបាវិតគឺជាច្រកទ្វារព្រំដែនអន្តរជាតិដែលកំពុងមានសក្តានុពលដឹកជញ្ជូនយ៉ាងខ្លាំងក្លា ហើយសកម្មភាពសេដ្ឋកិច្ចក្នុងខេត្តស្វាយរៀងក៏កំពុងមានសក្តានុពលនៃផលិតផលកសិកម្ម និងឧស្សាហកម្មវាយនភណ្ឌដែលមាននៅក្នុងតំបន់សេដ្ឋកិច្ចពិសេស»។
លោក ស៊ិន ចន្ធី ប្រធានសមាគមបានឱ្យដឹងទៀតថាសព្វថ្ងៃការដឹកជញ្ជូនទំនិញពីប្រទេសចិនមកប្រទេសកម្ពុជា ប្រមាណ ៤០ ភាគរយ ត្រូវបានឆ្លងកាត់ប្រទេសវៀតណាម ដូច្នេះប្រសិនបើគម្រោងសាងសង់ផ្លូវដែកនេះកើតមានឡើងវានឹងជួយលើកកម្ពស់ហេដ្ឋារចនាសម្ព័ន្ធដឹកជញ្ជូនរបស់កម្ពុជាក្នុងការរក្សាភាពប្រកួតប្រជែងក្នុងតំបន់។
លោកនិយាយថា៖ «យើងស្វាគមន៍ និងគាំទ្រចំពោះការអភិវឌ្ឍគម្រោងផ្លូវដែកនេះដែលយើងសង្ឃឹមថា គម្រោងនេះនឹងជួយឱ្យតម្លៃដឹកជញ្ជូនយើងកាន់តែចុះទាប ចំណេញពេលវេលា និងកាត់បន្ថយការកកស្ទះចរាចរណ៍ផងដែរ»។
រដ្ឋាភិបាលនៃប្រទេសទាំង ២ បានសន្យាថា នឹងជំរុញទំហំពាណិជ្ជកម្មទ្វេភាគីឱ្យកើនដល់ ៥ ពាន់លានដុល្លារក្នុងឆ្នាំនេះ ខណៈដែរទំហំពាណិជ្ជកម្មទ្វេភាគីរវាងប្រទេសទាំង ២ គិតត្រឹមខែតុលា ឆ្នាំ ២០១៩ សម្រេចបាន ៤,៤ ពាន់លានដុល្លារ កើនឡើង ១៣,៨ ភាគរយ។
ការនាំចេញរបស់កម្ពុជាទៅកាន់ទីផ្សារវៀតណាមចាប់ពីឆ្នាំ ២០១៥ ដល់ឆ្នាំ ២០១៨ កើនឡើងដល់ជាង ១,១៨ ពាន់លានដុល្លារ ខណៈការនាំចេញទំនិញរបស់វៀតណាមមកកម្ពុជាវិញមានចំនួន ៦,៩៦ ពាន់លានដុល្លារ។ នេះបើតាមទិន្នន័យរបស់ក្រសួងពាណិជ្ជកម្មកម្ពុជា។
ទន្ទឹមនឹងនេះ រដ្ឋាភិបាលក៏កំពុងសិក្សាលទ្ធភាពសាងសង់ផ្លូវល្បឿនលឿនតភ្ជាប់ពីទីក្រុងភ្នំពេញទៅក្រុងបាវិតដែលសិក្សាដោយក្រុមហ៊ុន China Railway International Group Co., Ltd។ កាលពីខែមុនក្នុងកិច្ចប្រជុំជាមួយថ្នាក់ដឹកនាំក្រសួងសាធារណការ និងដឹកជញ្ជូនតំណាងក្រុមហ៊ុននេះ បានឱ្យដឹងថា ការសិក្សាពីស្ថានភាពភូមិសាស្ត្រ និងផលប៉ះពាល់ផ្សេងៗកំពុងដំណើរការទៅមុខជាបន្តបន្ទាប់។
ក្រុមហ៊ុននេះរកឃើញមានជម្រើសចំនួន ៣ សម្រាប់ការសាងសង់គម្រោងនេះ ខណៈរដ្ឋាភិបាលកំពុងរង់ចាំលទ្ធផលរបាយការណ៍សិក្សាផ្នែកហិរញ្ញវត្ថុពីក្រុមហ៊ុននៅពាក់កណ្តាលខែតុលាឆ្នាំនេះ ដើម្បីយកជាមូលដ្ឋានក្នុងការសម្រេចចិត្ត។
កន្លងមកគម្រោងសង់ផ្លូវល្បឿនលឿននេះធ្លាប់ត្រូវបានទីភ្នាក់ងារជប៉ុន JICA ធ្វើការសិក្សាម្តងរួចមកហើយ ដោយផ្លូវនេះអាចនឹងមានចម្ងាយ ១៣៥ គីឡូម៉ែត្រ និងមានតម្លៃជាង ២ ពាន់លានដុល្លារ៕ LA
