ភ្នំពេញៈ រដ្ឋាភិបាលកម្ពុជាកំពុងស៊ើបអង្កេតករណី ដែលថា មានក្រុមហ៊ុនចិនកំពុងប្រើប្រាស់តំបន់សេដ្ឋកិច្ចពិសេសគ្រប់គ្រងដោយវិនិយោគិនចិននៅកម្ពុជាសម្រាប់ការនាំចេញទំនិញទៅអាមេរិក ដើម្បីគេចពីការបង់ពន្ធនាំចូល។ នេះបើយោងតាមមន្ដ្រីក្រសួងពាណិជ្ជកម្មកម្ពុជា។ វិធានការនេះធ្វើឡើងបន្ទាប់ពីលោក Arend Zwartjes អ្នកនាំពាក្យស្ថានទូតអាមេរិកបានឲ្យដឹងថា អាមេរិកបានផាកពិន័យក្រុមហ៊ុនមួយចំនួនពីការនាំចេញទំនិញតាមរយៈតំបន់សេដ្ឋកិច្ចពិសេសគ្រប់គ្រងដោយវិនិយោគិនចិននៅកម្ពុជាក្នុងគោលបំណងគេចពីពន្ធនាំចូលរបស់ប្រធានាធិបតី ដូណាល់ ត្រាំ ដែលបានដាក់លើទំនិញនាំចូលរបស់ប្រទេស ចិន។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់កាសែតភ្នំពេញប៉ុស្ដិ៍កាលពីថ្ងៃម្សិលមិញថា បន្ទាប់ពីការទទួលព័ត៌មាននេះ ក្រសួងបានបញ្ជូនក្រុមការងារកាលពីថ្ងៃព្រហស្បតិ៍ដើម្បីស៊ើបអង្កេតនៅនឹងកន្លែង។
លោកបានថ្លែងថា៖ «យើងបានបញ្ជូនក្រុមការងាររបស់យើងរួចហើយ ទៅតំបន់សេដ្ឋកិច្ចពិសេសក្រុងព្រះសីហនុ ដើម្បីពិនិត្យមើលថាតើវាពិត ឬអត់»។ លោកបន្តថា៖ «យើងនឹងមិនអនុញ្ញាតឲ្យវាកើតឡើងនោះទេ ព្រោះវាផ្ទុយទៅនឹងគោលការណ៍របស់យើងជាមួយអាមេរិក»។
លោក ស៊ាង ថៃ បានឲ្យដឹងថា ប្រសិនបើបានរកឃើញថាពិត ក្រុមហ៊ុនទាំងនោះនឹងត្រូវផាកពិន័យ ឬដកហូតអាជ្ញាប័ណ្ណនាំចេញតែម្តង។
លោកថ្លែងថា៖ «យើងនឹងមិនព្រងើយចំពោះបញ្ហានេះទេ បើមិនអ៊ីចឹងទេយើងនឹងបាត់បង់ [ប្រព័ន្ធអនុគ្រោះ ឬ GSP] ដែលបានផ្ដល់ដោយអាមេរិក ប្រសិនបើយើងមិនចាត់វិធានការណាមួយទេនោះ»។ លោកបន្តថា៖ «ពួកគេផ្ដល់ GSP ដល់ពួកយើង ហេតុអ្វីក៏យើងផ្ដល់ វាឲ្យទៅអ្នកផ្សេងទៀត?»។
លោក Arend Zwartjes អ្នកនាំពាក្យស្ថានទូតអាមេរិក បានប្រាប់ភ្នំពេញប៉ុស្ដិ៍តាមអ៊ីមែលកាលពីម្សិលមិញថា អាមេរិកបានផាកពិន័យក្រុមហ៊ុនជាច្រើនពីបទនាំចេញទំនិញតាមរយៈតំបន់សេដ្ឋកិច្ចពិសេសនៅកម្ពុជាក្នុងគោលបំណងគេចផុតពីពន្ធនាំចូលអាមេរិក។ លោកថ្លែងថា៖ «ពេលខ្លះក្រុមហ៊ុនជាច្រើនស្វែងរកការគេចពន្ធនាំចូល និងនាំផលិតផលទាំងនោះទៅអាមេរិកតាមរយៈដឹកទំនិញឆ្លងកាត់»។
លោកបញ្ជាក់ថា៖ «Department of Homeland Security បានត្រួតពិនិត្យ និងផាកពិន័យក្រុមហ៊ុនមួយចំនួនពីបទគេចពីពន្ធនាំចូលនៅអាមេរិក ដោយដឹកជញ្ជូនទំនិញទាំងនោះកាត់តាមប្រទេស កម្ពុជា»។ លោកបន្តថា នាយកដ្ឋាននេះ ក៏បានសហការជាមួយរដ្ឋាភិបាលកម្ពុជានៅក្នុងកិច្ចខិតខំប្រឹងប្រែងទាំងនេះផងដែរ។
លោក Arend Zwartjes ឲ្យដឹងថា ក្រុមហ៊ុនទាំងនេះមានទីតាំងនៅក្នុងតំបន់សេដ្ឋកិច្ចពិសេសក្រុងព្រះសីហនុរបស់ប្រទេស កម្ពុជា។ ទោះបីយ៉ាងនេះក្តី លោកបដិសេធមិនបង្ហាញប្រភេទទំនិញ ដែលក្រុមហ៊ុនទាំងនេះកំពុងនាំចេញទេ ដោយបង្វែរឲ្យទៅសួរ Homeland Security។
ការនាំចេញរបស់កម្ពុជាទៅអាមេរិកនៅត្រីមាសទី១ ជាលើកដំបូងឆ្នាំនេះបានកើនឡើងលើសពី ១ ពាន់លាន ជាលើកដំបូង ដែលមួយផ្នែកធំដោយសារតែការបង្កើនការនាំចេញទំនិញធ្វើដំណើរ។
វ៉ាលីស និងកាបូប ដែលផលិតនៅកម្ពុជា ត្រូវបានផ្ដល់សិទ្ធិចូលទៅទីផ្សារអាមេរិកស្ថិតក្រោមកម្មវិធីប្រព័ន្ធអនុគ្រោះពន្ធ (GSP) ចាប់តាំងពីខែ កក្កដា ឆ្នាំ ២០១៦។ សិទ្ធិនេះបានរួមចំណែកយ៉ាងសំខាន់ដល់ការបង្កើនតម្លៃការនាំចេញរបស់កម្ពុជាទៅអាមេរិក។
លោក លីម ហេង អនុប្រធានសភាពាណិជ្ជកម្មកម្ពុជា បានគាំទ្រដល់ការអត្ថាធិប្បាយរបស់លោក ស៊ាង ថៃ។ លោកថ្លែងថា៖ «វានឹងប៉ះពាល់ដល់អត្ថប្រយោជន៍របស់កម្ពុជា ប្រសិនបើវាពិត»។ លោកបន្តថា៖ «ពួកគេផ្ដល់ GSP និង EBA ដល់ពួកយើង ដើម្បីបង្កើតការងារសម្រាប់ប្រជាជនរបស់យើង វាមិនទទួលបានអ្វីសោះសម្រាប់ពួកយើង ប្រសិនបើយើងគ្រាន់តែជាកន្លែងដឹកជញ្ជូនទំនិញឆ្លងកាត់នោះ»។
សង្គ្រាមពាណិជ្ជកម្មរវាងប្រទេស ចិន និងអាមេរិក បានជំរុញឲ្យក្រុមហ៊ុនបរទេសជាច្រើនផ្លាស់ប្តូរមូលដ្ឋានផលិតរបស់ពួកគេពីប្រទេស ចិន ទៅបណ្ដាប្រទេសអាស៊ីអាគ្នេយ៍ ដើម្បីគេចពីការហូតពន្ធនាំចូល ខណៈក្រុមហ៊ុនរបស់ចិនមួយចំនួនកំពុងស្វែងរកការគេចពន្ធនាំចូល និងដឹកជញ្ជូនផលិតផលទាំងនោះទៅអាមេរិក តាមរយៈការផ្លាស់ប្តូរទីកន្លែងនាំចេញ។
កាលពីដើមខែនេះប្រទេស វៀតណាម បានប្ដេជ្ញាថា នឹងបង្រ្កាបលើក្រុមហ៊ុនដែលប្រើស្លាកផលិតនៅវៀតណាមលើទំនិញដើម្បីនាំចេញទៅអាមេរិកដោយរួចពន្ធដែលកើតចេញពីសង្គ្រាមពាណិជ្ជកម្មរវាងអាមេរិក និងចិន៕ LA