ភ្នំពេញៈ ប្រទេសកម្ពុជាកំពុងស្វែងរកការគាំទ្រពី Siam Piwat Company Limited ជាក្រុមហ៊ុនពហុផលិតផលរបស់ថៃ ដើម្បីបង្ហាញផលិតផលដែលផលិតនៅក្នុងស្រុកនៅក្នុងផ្សារទំនើបល្បីឈ្មោះ ២ របស់ពួកគេគឺ ICONSIAM និង Siam Paragon ជាកិច្ចខិតខំប្រឹងប្រែងមួយដើម្បីបង្កើនផលិតផលក្នុងស្រុក និងជួយកាត់បន្ថយអតុល្យភាពពាណិជ្ជកម្មជាមួយប្រទេសជិតខាងអាស៊ានរបស់ខ្លួន។
លោក អ៊ុក សោភ័ណ្ឌ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសកម្ពុជាប្រចាំនៅប្រទេសថៃបានប្រាប់ភ្នំពេញប៉ុស្ដិ៍កាលពីថ្ងៃអង្គារថា លោកបានជួបលោក Tanaphat Sirikulvadhana ប្រធាននាយកដ្ឋានទទួលបន្ទុកទំនាក់ទំនងរដ្ឋាភិបាលមកពីក្រុមហ៊ុន Siam Piwat Company កាលពីថ្ងៃចន្ទ ខណៈក្រុមហ៊ុននេះមានផ្សារទំនើបល្បីឈ្មោះ ២ គឺផ្សារ Siam Paragon និងផ្សារ ICONSIAM ដើម្បីបង្ហាញផលិតផលដែលផលិតក្នុងស្រុកដល់ពួកគេដើម្បីតាំងបង្ហាញនៅក្នុងផ្សារទំនើបទាំង ២ របស់ពួកគេ។
លោកបានថ្លែងថា៖ «យើងបានផ្ដល់យោបល់ដល់ពួកគេឲ្យយកទំនិញរបស់យើងលក់នៅក្នុងផ្សារទំនើបរបស់ពួកគេ ហើយពួកគេបានស្នើឲ្យពួកយើងត្រូវធ្វើបញ្ជីប្រភេទមុខទំនិញ រូបភាពរបស់ផលិតផល និងឯកសារបញ្ជាក់អំពីផលិតផលដែលភ្ជាប់ជាមួយបញ្ជីដែលដាក់ជូនដល់ពួកគេសម្រាប់ការពិចារណា និងប្រភេទទំនិញដែលអាចលក់នៅក្នុងទីផ្សារនេះ»។
លោកថ្លែងថា៖ «អាទិភាពដំបូងរបស់យើង គឺធ្វើបញ្ជីឈ្មោះផលិតផល ហើយយើងគ្រោងនឹងដាក់ផលិតផលសម្គាល់ភូមិសាស្ដ្ររបស់យើង ដូចជាម្រេចកំពត ស្ករសកំពង់ស្ពឺ ហើយយើងគ្រោងនឹងបង្ហាញមុនពេលបុណ្យចូលឆ្នាំខ្មែរ ខណៈពួកគេក៏បានរៀបចំពិព័រណ៍ពាណិជ្ជកម្មនៅទីនោះផងដែរ»។
លោកបន្ថែមថា លោកក៏បានផ្ដល់យោបល់ដល់ពួកគេឲ្យផ្ដល់កន្លែងណាមួយនៅក្នុងផ្សារទំនើប ២ នេះ ដើម្បីតាំងបង្ហាញផលិតផលដែលផលិតនៅក្នុងប្រទេសកម្ពុជាដល់អតិថិជន និងភ្ញៀវទេសចរមុនពេលបុណ្យចូលឆ្នាំខ្មែរផងដែរ។
លោក Tanaphat Sirikulvadhana បានសន្យាថានឹងផ្ដល់ដល់ក្រុមហ៊ុនផលិតរបស់កម្ពុជានូវស្ដង់ដែលមានទីតាំងនៅខាងក្នុងផ្សារទំនើប ICONSIAM និងផ្សារ Siam Paragon សម្រាប់ការតាំងបង្ហាញ និងការលក់ផលិតផលខ្មែរ រយៈពេល ៧ ថ្ងៃមុនពេលពិធីបុណ្យចូលឆ្នាំ។ លើសពីនេះទៅទៀតលោកក៏បានបង្ហាញបំណងរបស់លោកក្នុងការវិនិយោគលើការអភិវឌ្ឍផលិតផលដែលមិនប៉ះពាល់ដល់បរិស្ថាននៅក្នុងប្រទេសកម្ពុជាផងដែរ។ នេះបើតាមសេចក្ដីប្រកាសព័ត៌មានបានពីស្ថានទូតរបស់ប្រទេសកម្ពុជាប្រចាំនៅទីក្រុងបាងកក។
លោក អ៊ុក សោភ័ណ្ឌ បានឲ្យដឹងថា នោះគឺជាជំហានវិជ្ជមានមួយដែលប្រទេសកម្ពុជាអាចមានផលិតផលដែលផលិតក្នុងស្រុកកាន់តែច្រើននៅបរទេស ហើយលោកនឹងចូលរួមជាមួយក្រុមហ៊ុនឯកជនរបស់កម្ពុជាដើម្បីធ្វើការងារជាមួយក្រុមហ៊ុន Siam Piwat សម្រាប់ព័ត៌មានលម្អិត។
លោកបញ្ជាក់ថា៖ «បន្ទាប់ពីយើងមានការរៀបចំដ៏ច្បាស់លាស់ជាមួយក្រុមហ៊ុន Siam Piwat យើងនឹងស្នើឲ្យក្រុមហ៊ុនកម្ពុជាធ្វើការងារលើព័ត៌មានលម្អិតជាមួយក្រុមហ៊ុន Siam Piwat រៀងខ្លួន ដូចជាអនុស្សរណៈនៃការយោគយល់គ្នា (MoU) ឬកិច្ចព្រមព្រៀង។ ស្ថានទូតគឺជាស្ពានមួយដើម្បីភ្ជាប់ពួកគេក្នុងការធ្វើជាដៃគូពិតប្រាកដមួយ»។
លោកបន្តថា៖ «យើងខិតខំឲ្យអស់ពីសមត្ថភាពរបស់យើងក្នុងការធ្វើការងារយ៉ាងជិតស្និទ្ធជាមួយអាជ្ញាធរថៃ វិស័យឯកជន និងក្រុមហ៊ុនលើបញ្ហានេះ។ ក្រៅពីក្រុមហ៊ុន Siam Piwat យើងក៏ធ្វើការងារជាមួយក្រុមហ៊ុន CP All ដែលគ្រប់គ្រងហាងលក់ 7-Eleven ដើម្បី ពិចារណាលើផលិតផលរបស់យើងដាក់លក់នៅក្នុងហាងរបស់ពួកគេនៅក្នុងប្រទេសថៃផងដែរ«។
របាយការណ៍ពាណិជ្ជកម្មរវាងកម្ពុជា និងថៃដែលទទួលបានពីស្ថានទូតថៃបានបង្ហាញថានៅឆមាសទី ១ ឆ្នាំ ២០១៩ ទំហំពាណិជ្ជកម្មរវាងប្រទេសទាំង ២ មានតម្លៃ ៤,២ ពាន់លានដុល្លារ កើនឡើង ៧ ភាគរយ ធៀបនឹងរយៈពេលដូចគ្នាកាលពីឆ្នាំ ២០១៨។ កាលពីឆ្នាំ ២០១៨ ទំហំពាណិជ្ជកម្មទ្វេភាគីរវាងប្រទេសកម្ពុជា និងប្រទេសថៃមានទំហំប្រហែល ៨,៣ ពាន់លានដុល្លារអាមេរិក៕ LA