ភ្នំពេញ៖ អ្នកនៅក្នុងវិស័យឧស្សាហកម្មម្រេចទាំងម្រេច GI និងមិនមែន GI មានផែនការនាំចេញម្រេចឲ្យបាន ៥ ០០០ តោន នៅឆ្នាំ ២០២១ នេះ ដើម្បីបំពេញតម្រូវការទីផ្សារកំពុងតែហក់ឡើងទាំងក្នុងតំបន់ និងសហគមអឺរ៉ុប។
លោក ម៉ាក់ នី ប្រធានសហព័ន្ធ និងគ្រឿងទេសកម្ពុជា (CPSF) ប្រាប់ភ្នំពេញ ប៉ុស្តិ៍ថា ក្រុមហ៊ុនដែលជាសមាជិករបស់ CPSF មានផែនការនាំចេញ និងកែច្នៃម្រេចទៅកាន់ទីផ្សារភាគច្រើនទៅប្រទេសវៀតណាម និងប្រទេសអាល្លឺម៉ង់។
លោក ម៉ាក់ នី ក្នុងនោះ ក្រុមហ៊ុន Olam ដែលមូលដ្ឋាននៅប្រទេសវៀតណាម មានផែនការនាំចេញច្រើនជាងគេរហូតដល់ ៣ ០០០ ទៅ ៤ ០០០ តោន សម្រាប់ទីផ្សារវៀតណាម និងក្រុមហ៊ុន Fuchs ដែលជាមូលដ្ឋាននៅប្រទេសអាល្លឺម៉ង់ ក៏មានផែនការនាំចេញម្រេចចំនួន ១ ០០០ តោនផងដែរ។
ក្រៅពីនេះ ក្រុមហ៊ុនស្រុកចំនួន ២ គឺក្រុមហ៊ុន សិលា ផិបភើរ ខូអិលធីឌី និងក្រុមហ៊ុន ស៊ីកនេតឈ័រ អហ្វ អេស៊ា (Signature of Asia ) មានផែនការនាំចេញប្រហែល ១០០ តោន។
កាលពីឆ្នាំ ២០២០ សមាជិករបស់ CPSF ទាំងអស់បាននាំចេញម្រេចទាំងម្រេច GI និងមិនមែន GI ក្នុងបរិមាណជាង ៣ ០០០ តោន។ នេះបើតាមប្រធាន CPSF។
លោក ម៉ាក់ នី ឲ្យដឹងថា៖ «ក្រុមហ៊ុនដែលសមាជិករបស់យើងមានផែនការនាំចេញច្រើននៅឆ្នាំនេះ ដោយទិន្នផលម្រេចពិភពលោកធ្លាក់ចុះ ដូច្នេះសមាជិកម្នាក់ៗនាំគ្នាសម្រុកទិញស្តុកទុកដោយរំពឹងថា នឹងមានទីផ្សារល្អជាបន្តបន្ទាប់ៗពីពេលនេះទៅ»។
លោក ចាន់ ពេជ្រ ប្រធានគ្រប់គ្រងទូទៅក្រុមហ៊ុន ស៊ីកនេតឈ័រ អហ្វ អេស៊ា ប្រាប់ ភ្នំពេញ ប៉ុស្តិ៍ថា ក្រុមហ៊ុនលោកបានដាក់ផែនការទិញម្រេចសរីរាង្គពីខេត្តមណ្ឌលគិរី ចំនួន ១០០ តោន ដើម្បីកែច្នៃនាំចេញទៅប្រទេសហ្វាងឡង់។
លោកសម្គាល់ថា៖ «ឆ្នាំនេះយើងទិញម្រេចច្រើនជាងពីឆ្នាំទៅដែលយើងទិញបានចំនួន ៤០ តោនប៉ុណ្ណោះ ហើយយើងឃើញថា ទីផ្សារម្រេចឆ្នាំនេះបានងើបឡើងបន្តិចធៀបនឹងឆ្នាំមុន ប៉ុន្តែវាមិនប្រសើរប៉ុន្មាននោះទេ»។
តម្លៃម្រេចមិនមែន GI បានហក់ឡើងចន្លោះពី ២០ ទៅ ៣០ ភាគរយ បើធៀបនឹងឆ្នាំមុន។ សព្វថ្ងៃម្រេចមិនមែន GI មានតម្លៃប្រមាណ ១ ៤ ០០០ រៀល ក្នុង ១ គីឡូក្រាម ខណៈឆ្នាំមុនម្រេចមានតម្លៃត្រឹម ១០ ០០០ រៀល ប៉ុណ្ណោះ។ ប្រទេសកម្ពុជា អាចផលិតម្រេចបានប្រមាណ ២ ម៉ឺនតោន ក្នុង ១ ឆ្នាំៗ។ នេះបើតាម លោក ម៉ាក់ នី។
លោកនិយាយថា៖ «គោលដៅយើងធ្វើម៉េចឲ្យវិស័យម្រេចរួមគ្នាដែលវានឹងបង្កលក្ខណៈងាយស្រួលសម្រាប់អ្នកវិនិយោគិនមកពីក្រៅប្រទេសក្នុងការសម្លឹងឃើញសក្តានុពលផលិតផលម្រេចរបស់យើង និងងាយស្រួលក្នុងការផ្តល់ព័ត៌មានអំពីទីផ្សារម្រេចជាដើម»។
សហព័ន្ធមានសមាជិកជាសហគមន៍អ្នកផលិតចំនួន ១៥ ដែលមានផ្ទៃដីប្រមាណ ៧០០ ហិកតា ដែលផលិតម្រេចបានចន្លោះពី ១ ២០០ ទៅ ១ ៥០០ តោន ក្នុង ១ ឆ្នាំ។
កាលពីឆ្នាំ ២០២០ ម្រេចកំពត GI បាននាំចេញប្រមាណ ៧០ តោន ទៅកាន់បណ្តាប្រទេសជាង ៥០ ដែលភាគច្រើននៅទ្វីបអឺរ៉ុប ដោយម្រេចខ្មៅថ្លៃ ១៥ ដុល្លារ ម្រេចក្រហមថ្លៃ ២៥ ដុល្លារ និងម្រេចសថ្លៃ ២៨ ដុល្លារ ក្នុង ១ គីឡូក្រាមដូចគ្នា។ នេះបើតាមលោក ងួន ឡាយ ប្រធានសមាគមលើកកម្ពស់ម្រេចកំពត (KPPA)។
ម្រេចនៅកម្ពុជាមានផ្ទៃដីទូទាំងប្រទេសចំនួនជាង ៦ ៧០០ ហិកតា ដែលផ្តល់ទិន្នផលសរុបជាង ២ ម៉ឺនតោន ក្នុង ១ ឆ្នាំ៕