.jpg)
លោក ជា មានិត រដ្ឋលេខាធិការ MPTC បានដឹកនាំកិច្ចប្រជុំមួយ ស្ដីពីអំពីការងារបច្ចេកទេសសិក្សាស្រាវជ្រាវអំពីយន្តការគ្រប់គ្រង និងដំណើរការមជ្ឈមណ្ឌលជាតិចុះបញ្ជីអ៊ីនធឺណិតកាលពីសប្តាហ៍មុន។ រូបថត ក្រសួងប្រៃសណីយ៍
ភ្នំពេញៈ ក្រសួងប្រៃសណីយ៍ និងទូរគមនាគមន៍ (MPTC) បានបង្កើតក្រុមការងារមួយដើម្បីសិក្សា និងស្រាវជ្រាវលើការបង្កើតមជ្ឈមណ្ឌលជាតិចុះបញ្ជីអ៊ីនធឺណិត (KHNIC) ដែលជាកិច្ចខិតខំ ប្រឹងប្រែងក្នុងការគ្រប់គ្រងការចុះឈ្មោះ Domain Name និង ការជំរុញឲ្យប្រជាជនប្រើប្រាស់ ដែនកម្មសិទ្ធិ ឬ Domain ជាតិ [.KH]។
លោក ជា មានិត រដ្ឋលេខាធិការ MPTC បានដឹកនាំកិច្ចប្រជុំមួយស្ដីពីអំពីការងារបច្ចេកទេសសិក្សាស្រាវជ្រាវអំពីយន្តការគ្រប់គ្រង និងដំណើរការមជ្ឈមណ្ឌលជាតិចុះបញ្ជីអ៊ីនធឺណិតក្នុងសប្តាហ៍មុនដើម្បីពិភាក្សាស្ដីពីទិដ្ឋភាពបច្ចេកទេសទាក់ទងនឹងការគ្រប់គ្រង និងដំណើរការមជ្ឈមណ្ឌលជាតិចុះបញ្ជីអ៊ីនធឺណិត (KHNIC) នេះ។
លោកនិយាយថា នីតិវិធីចុះបញ្ជីរបស់មជ្ឈមណ្ឌលព័ត៌មានចុះបញ្ជីអ៊ីនធឺណិតអាស៊ីប៉ាស៊ីហ្វិក (APNIC) ជាគំរូមួយសម្រាប់ការបង្កើត KHNIC។ KHNIC នឹងចាំបាច់ត្រូវទាក់ទងជាមួយអង្គការ Internet Corporation for Assigned Names and Numbers (ICANN) និងអង្គការ Internet Assigned Number Authority (IANA)។ នៅក្នុងតំបន់អាស៊ីប៉ាស៊ីហ្វិក ប្រទេសជាច្រើនដូចជាវៀតណាម និងថៃបានបង្កើតមជ្ឈមណ្ឌលជាតិចុះបញ្ជី អ៊ីនធឺណិតផ្ទាល់ខ្លួនរបស់ពួកគេរួចហើយ។
លោកថ្លែងថា បច្ចុប្បន្ននិយតករទូរគមនាគមន៍កម្ពុជា (TRC) គ្រប់គ្រងការចុះឈ្មោះអ៊ីនធឺណិតគេហទំព័រខ្មែរ [.KH] ដែលត្រូវការរយៈពេល ១០ ថ្ងៃ ខណៈដែលទូរគមនាគមន៍កម្ពុជាជាអ្នកអនុវត្តការងារនេះ។
លោក មានិត ថ្លែងថា៖ «ការរៀបចំ KHNIC ជាប់ទាក់ទងនឹងនីតិវិធីចុះឈ្មោះ និងការគ្រប់គ្រង IP address។ ក្រុមការងារនេះនឹងបន្តសិក្សាគំរូ NIC របស់ប្រទេសថៃ វៀតណាម និងបណ្ដាប្រទេសផ្សេងទៀតនៅក្នុងតំបន់ ដើម្បីដំណើរការចុះឈ្មោះបានលឿន និងឆាប់រហ័សដោយប្រើប្រព័ន្ធចុះបញ្ជីតាមអ៊ីនធឺណិត»។
លោក អ៊ឹម វុត្ថា អ្នកនាំពាក្យ TRC ដែលបានចូលរួមកិច្ចប្រជុំនោះបានប្រាប់ភ្នំពេញប៉ុស្ដិ៍ម្សិលមិញថា ក្រុមការងារនេះនឹងសិក្សាលម្អិតសម្រាប់ការបង្កើត KHNIC ក្នុងពេលខាងមុខ។
លោកបញ្ជាក់ថា៖ «នៅពេលនេះយើងកំពុងស្ថិតក្នុងដំណាក់កាលសិក្សាសម្រាប់ការបង្កើត KHNIC ឲ្យស្របគ្នានឹងរដ្ឋជាសមាជិកអាស៊ានផ្សេងទៀត។ យន្តការប្រភេទនេះ យើងចង់យកគំរូតាមបណ្ដាប្រទេសដែលកំពុងធ្វើវាក្នុងរៀបចំមជ្ឈមណ្ឌលជាតិចុះបញ្ជីអ៊ីនធឺណិតនេះ»។
លោកបន្ថែមថា៖ «យើងចង់ជំរុញឲ្យប្រជាជនទាំងអស់នៅកម្ពុជា ប្រើប្រាស់ Domain ជាតិ។ នៅពេលនេះយើងកំពុងស្ថិតក្នុងដំណាក់កាលដំបូងក្នុងការរៀបចំបទប្បញ្ញត្តិស្ដីពីការគ្រប់គ្រងដំណើរការ KHNIC នេះ។ រហូតមកដល់ពេលនេះ យើងមានការចុះបញ្ជី Domain ក្នុងស្រុកប្រហែល ៣ ០០០ កំពុងត្រូវបានប្រើប្រាស់»។
ទោះយ៉ាងណាលោកឲ្យដឹងថា មិនទាន់មានការកំណត់ពេលវេលា និងការសម្រេចចិត្តណាមួយត្រូវបានសម្រេចនោះទេ ខណៈដែលការងារនៅតែត្រូវការពេលវេលា ដើម្បីសិក្សាលម្អិតជុំវិញការបង្កើត KHNIC នេះ។
របាយការណ៍ពី TRC បង្ហាញថាការប្រើប្រាស់អ៊ីនធឺណិតចល័តបានកើនឡើងយ៉ាងរហ័សដោយមានគណនី ១៦,១២ លានក្នុងឆ្នាំមុនកើនឡើង ១៨,៤៧ ភាគរយ។ ចំនួនគណនីហ្វេសប៊ុកដែលចុះបញ្ជីក៏បានកើនឡើង ២៩ ភាគរយដល់ ៨,៨ លានកាលពីឆ្នាំមុន។ បច្ចុប្បន្នក្រុមហ៊ុនទូរស័ព្ទចល័ត ៦ កំពុងប្រតិបត្តិការនៅកម្ពុជា រួមមាន CellCard, Metfone, Smart Axiata, qb, Seatel និង CooTel៕ LA
