ភ្នំពេញៈ កម្ពុជាកំពុងចរចាដើម្បីសម្រេចកិច្ចព្រមព្រៀងពាណិជ្ជកម្មសេរី (FTA) ជាមួយសហភាព អឺរ៉ុប-អាស៊ី (EAEU) ជាប្លុកសេដ្ឋកិច្ចសេរីមួយមានប្រទេស ៥ ដែលសុទ្ធតែជាអតីត សហភាពសូវៀត ដោយរំពឹងថា ទីផ្សារថ្មីនេះនឹងរួមចំណែករក្សាកំណើនសេដ្ឋកិច្ចកម្ពុជា។ EAEU រួមមានប្រទេស ៥ ដូចជា អាមេនី បេឡារុស កាហ្សាក់ស្ថាន និងកៀហ្ស៊ីស៊ីស្ថាន គឺជាទីផ្សារថ្មីមួយមានប្រជាជន ១៨៣ លាននាក់ ដោយមានផលិតផលក្នុងស្រុក (GDP) រួមចំនួន ២,២ ពាន់ពាន់លានដុល្លារ។
ថ្លែងទៅកាន់ក្រុមអ្នកយកព័ត៌មាននៅក្នុងសិក្ខាសាលាមួយ ស្តីពីការផ្សព្វផ្សាយប្រព័ន្ធអនុគ្រោះពាណិជ្ជកម្មពី EAEU ដល់ប្រទេស កម្ពុជាកាលពីម្សិលមិញ លោកស្រី តឹករ៉េត កម្រង បានឲ្យដឹងថា EAEU បានផ្ដល់ការរួចពន្ធនាំចូលសម្រាប់ផលិតផល ៤៦ ប្រភេទ ដែលផលិតនៅក្នុងប្រទេស កម្ពុជា ចាប់តាំងពី ៣ ឆ្នាំកន្លងមកហើយ ក្នុងនាមជាប្រទេសអភិវឌ្ឍន៍តិចតួចបំផុត (LDC)។ ខណៈប្រព័ន្ធអនុគ្រោះពន្ធនេះ នឹងមានរយៈពេលរហូតដល់ប្រទេស កម្ពុជា ចេញផុតពីប្រទេសអភិវឌ្ឍន៍តិចតួចបំផុត លោកស្រី កម្រង បានឲ្យដឹងថា ការចរចាកិច្ចព្រមព្រៀងពាណិជ្ជកម្មសេរី ជាមួយប្លុកនេះគឺជាគំនិតផ្តួចផ្ដើមដ៏ល្អ។
លោកស្រីថ្លែងថា៖ «នៅពេលអាចបើកចំហទីផ្សារថ្មី និងពង្រីកវា យើងអាចនាំចេញផលិតផលកាន់តែច្រើនទៅបរទេស»។
លោកស្រីបន្តថា៖ «គ្រប់ទីផ្សារថ្មីៗ គឺតែងតែមានសក្ដានុពល និងទទួលបានកិច្ចព្រមព្រៀងពាណិជ្ជប្រកបដោយជោគជ័យ វាត្រូវការកិច្ចខិតខំប្រឹងប្រែងបន្ថែមទៀត ពីភាគីពាក់ព័ន្ធទាំងអស់រួមមានស្ថាប័នរដ្ឋាភិបាល និងវិស័យឯកជន»។
ការអនុគ្រោះពន្ធនាំចូលរបស់ EAEU ដែលបានផ្ដល់ដល់ទំនិញកម្ពុជា រួមមានអង្ករ សូត្រ វាយនភណ្ឌ សាច់ បន្លែ កាហ្វេ និងទំនិញជាច្រើនផ្សេងទៀត។
នៅក្នុងប្លុកអាស៊ាន មានតែវៀតណាមប៉ុណ្ណោះ ដែលសម្រេចបានកិច្ចព្រមព្រៀងពាណិជ្ជកម្មសេរី (FTA) ជាមួយ EAEU ចាប់តាំងពីឆ្នាំ ២០១៦ ខណៈប្រទេស សិង្ហបុរី កំពុងបន្តការចរចា។
បើយោងតាមរបាយការណ៍បានពីសារព័ត៌មានវៀតណាម បន្ទាប់ពី FTA ត្រូវសម្រេចបាន ពាណិជ្ជកម្មទ្វេភាគីរវាងវៀតណាម និង EAEU បានកើនឡើង ៣២ ភាគរយកាលពីឆ្នាំ ២០១៧ ធៀបនឹងឆ្នាំ ២០១៦។
ពាណិជ្ជកម្មទ្វេភាគីកាលពីឆ្នាំ ២០១៧ មានចំនួន ៣,៩ ពាន់លានដុល្លារ។ ប្រទេស រុស្ស៊ី គឺជាដៃគូពាណិជ្ជកម្មដ៏សំខាន់ នៅក្នុងប្លុកនេះ ដែលមានចំនួនជិត ៩០ ភាគរយនៃពាណិជ្ជកម្មជាមួយវៀតណាម។
ខណៈមានការទទួលស្គាល់ថា ការនាំចេញរបស់ប្រទេស កម្ពុជា ទៅ EAEU នៅមានកម្រិតតូច អនុប្រធានសភាពាណិជ្ជកម្មកម្ពុជា (CCC) លោក លឹម ហេង បានឲ្យដឹងកាលពីម្សិលមិញថា វាល្អសម្រាប់ប្រទេស កម្ពុជា ក្នុងការរក្សាទីផ្សារដែលមានស្រាប់របស់ខ្លួន ជាមួយនឹងសិទ្ធិទទួលបានការអនុគ្រោះផ្នែកពាណិជ្ជកម្ម និងស្របគ្នានឹងការចរចាសម្រាប់ការបើកចំហទីផ្សារថ្មី។
លោកបន្ថែមថា គំនិតផ្ដួចផ្ដើមសម្រាប់ការសម្រេចបានកិច្ចព្រមព្រៀងជាមួយ EAEU ជាវិធានការដ៏ល្អមួយ។ លោកថ្លែងថា៖ «ផលិតផលកសិកម្មរបស់ប្រទេស កម្ពុជា ត្រូវការយ៉ាងខ្លាំងសម្រាប់ទីផ្សារថ្មីៗ។ តាមពាក្យនៃការធ្វើសកលភាវូបនីយកម្ម វាល្អក្នុងការរក្សាទីផ្សារដែលមានស្រាប់ ស្របនឹងកិច្ចខិតខំប្រឹងប្រែង ដើម្បីទទួលបានទីផ្សារថ្មីៗ»៕LA