ភ្នំពេញ: រដ្ឋាភិបាលកំពុងរៀបចំផែនការក្នុងការកំណត់ប្រភេទនៃផលិតផលសក្ដានុពល និងអាទិភាពដើម្បីបង្កើនការនាំចេញក្នុងការចាប់យកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីដែលចុះហត្ថលេខានៅពេលថ្មីៗ ជាមួយចិន និងជាប្រទេសមួយចំណោមប្រទេសផ្សេងៗទៀតក្នុងតំបន់ និងពិភពលោកក្នុងក្របខ័ណ្ឌទ្វេភាគី និងពហុភាគី។
លោក ស៊ាង ថៃ រដ្ឋលេខាធិការក្រសួងពាណិជ្ជកម្មបានដឹកនាំកិច្ចប្រជុំលើកទី៤ ជាមួយនាយកដ្ឋានពាក់ព័ន្ធរបស់ក្រសួងកាលពីថ្ងៃសុក្រមុនស្ដីពីការលើកកម្ពស់ការផលិត និងជំរុញការនាំចេញនៅក្នុងតំបន់ និងទ្វេភាគីនៅទីស្តីការក្រសួងបានថ្លែងថា បន្ទាប់ពីមានកិច្ចប្រជុំ ៣ លើករួចមកហើយ ក្រសួងបានបង្កើតក្រុមការងារមួយចំនួនមានដូចជា លេខាធិការដ្ឋាន ស្រាវជ្រាវ និងការអភិវឌ្ឍ និងផលិតផលអាទិភាព ព្រមទាំងរៀបចំរបាយការណ៍ ដើម្បីបង្កើនល្បឿនការងារនេះ។
លោកថ្លែងបន្តថា៖ «គោលបំណងនៃកិច្ចប្រជុំលើកទី៤ នេះគឺដើម្បីត្រួតពិនិត្យ និងបញ្ចប់ការធ្វើបញ្ជីផលិតផល និងផលិតផលមានសក្ដានុពលរបស់កម្ពុជា ដើម្បីរៀបចំផែនការបង្កើនការនាំចេញទៅទីផ្សារអន្តរជាតិស្ថិតក្រោមក្របខ័ណ្ឌក្នុងតំបន់ និងទ្វេភាគី ជាពិសេសដើម្បីទាញយកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីដែលមានស្រាប់ និងកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី ដើម្បីលើកកម្ពស់ផលិតផលក្នុងស្រុក និងបង្កើនការនាំចេញ»។
ថ្លែងមកកាន់ ភ្នំពេញ ប៉ុស្តិ៍ កាលពីថ្ងៃចន្ទលោក ស៊ាង ថៃ ថា ក្រសួងកំពុងសិក្សា និងត្រូវស្រាវជ្រាវបន្តសិន (ត្រូវការពេលវេលាថែមទៀត) ទើបកំណត់បាននូវមុខទំនិញទាំងនោះ។ លោកថា៖ «គោលដៅនាំចេញរបស់យើង គឺសម្រាប់ទីផ្សារដែលកម្ពុជាមានទាំងអស់ ហើយអាចចង្អុលបង្ហាញទីផ្សារជាក់ស្ដែងមួយចំនួន»។
លោក លឹម ហេង អនុប្រធានសភាពាណិជ្ជកម្មកម្ពុជាបានឱ្យដឹងថា គំនិតផ្តួចផ្ដើមនេះគឺជាការឆ្លើយតបនឹងស្ថានការណ៍បច្ចុប្បន្ន ដែលពិភពលោកកំពុងផ្ដោតការយកចិត្តទុកដាក់លើការបង្កើនផលិតផលកសិកម្ម ដែលកំពុងស្ថិតនៅក្នុងរបៀបវារៈដ៏សំខាន់ អំឡុងពេលនៃការរីករាលដាលជំងឺកូវីដ ១៩ នាពេលបច្ចុប្បន្ន។
លោកថា៖ «ក្នុងអំឡុងពេលការរីករាលដាលជំងឺកូវីដ ១៩ ផលិតផលកសិកម្មកំពុងមានការចាប់អារម្មណ៍លើពិភពលោក។ ដោយសារតែយើងជាប្រទេសមានមូលដ្ឋានលើកសិកម្ម ដូច្នេះនេះគឺជារឿងដ៏ល្អដែលរដ្ឋាភិបាលកំណត់ផលិតផលអាទិភាព ដើម្បីជំរុញការផលិត និងការនាំចេញ»។ «នៅពេលយើងកំណត់ផលិតផលអាទិភាពរួចហើយ យើងនឹងមានផែនទីចង្អុលផ្លូវ និងគោលនយោបាយ ពិតប្រាកដ ដូច្នេះយើងមិនគ្រាន់តែបង្កើនការផលិតសម្រាប់ការនាំចេញប៉ុណ្ណោះទេ ប៉ុន្តែក៏ទាក់ទាញការវិនិយោគកាន់តែច្រើនថែមទៀតនៅក្នុងការកែច្នៃអាហារ ខណៈដែលនៅពេលនេះ យើងនាំចេញវត្ថុធាតុដើមសំខាន់ៗ»។
ក្រសួងកសិកម្មបង្ហាញថា កម្ពុជានាំចេញផលិតផលកសិកម្មជាង ៣ លានតោន ទៅទីផ្សារអន្តរជាតិ គិតត្រឹមពាក់កណ្ដាលខែកញ្ញា។ ទិន្នន័យនេះបង្ហាញថា គិតត្រឹមថ្ងៃទី ១១ ខែកញ្ញា កម្ពុជាបាននាំចេញផលិតផលកសិកម្មសម្រេចជាច្រើន ដែលរួមមានអង្ករ ដំឡូងមី ម្រេច កៅស៊ូ ផ្លែស្វាយស្រស់ សា្វយចន្ទី ចេក ពោត សណ្ដែកសៀង បន្លែ និងថ្នាំជក់។
ផលិតផលកសិកម្មទាំងនោះត្រូវបាននាំចេញទៅប្រទេសថៃ វៀតណាម ចិន ជប៉ុន កូរ៉េខាងត្បូង សិង្ហបុរី ហ្វីលីពីន ម៉ាឡេស៊ី ឥណ្ឌូនេស៊ី ឥណ្ឌា ស្រីលង្កា អូស្ត្រាលី ប៉ាគីស្ថាន រុស្ស៊ី បារាំង បែលហ្ស៊ិក អ៊ីតាលី សាធារណរដ្ឋឆែក ក្រូអាស៊ី ស្វ៊ីស ហូឡង់ អាល្លឺម៉ង់ អាមេរិក ចក្រភពអង់គ្លេស បេឡារុស នូវែលសេឡង់ ស៊ុយអែត និងហុងគ្រី៕ LA