.jpg)
ផ្លែស្វាយស្រស់កម្ពុជាប្រមាណ ១០០ តោនត្រូវបាននាំចេញទៅកាន់ទីផ្សារចិនដោយផ្ទាល់ជាលើកដំបូង។ រូបថត សហការី
ភ្នំពេញៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា ផ្លែស្វាយស្រស់កម្ពុជាប្រមាណ ១០០ តោនត្រូវបាននាំចេញទៅកាន់ទីផ្សារចិនដោយផ្ទាល់ជាលើកដំបូង។
ការថ្លែងរបស់លោករដ្ឋមន្ត្រីត្រូវបានធ្វើឡើងនៅក្នុងកម្មវិធីសម្ពោធនាំចេញផ្លែស្វាយស្រស់ទៅកាន់ប្រទេសចិនជាផ្លូវការកាលពីថ្ងៃទី ៧ ឧសភា នៅទីក្រុងភ្នំពេញ។
លោកថ្លែងទៀតថា៖ «ដោយសារក្នុងបរិបទនៃជំងឺកូវីដ១៩គឺយើងអនុញ្ញាតក្រុមហ៊ុននីមួយៗបានរៀបចំ ផ្លែស្វាយស្រស់ចំនួន ១ កុងតឺន័រដែលមានបរិមាណ ២០ តោនក្នុង ១ កុងតឺន័រ ដើម្បីនាំចេញទៅកាន់ប្រទេសចិន យើងជឿថាបន្ទាប់ពីនេះទៅក្រុមហ៊ុននីមួយៗនឹងបង្កើនការនាំចេញរបស់ខ្លួនបន្ថែមទៀត»។
ការនាំចេញផ្លូវការនេះ បន្ទាប់ពីរដ្ឋបាលគយចិនកាលពីថ្ងៃទី ២៦ ខែមេសា ឆ្នាំនេះបានអនុម័តទទួលស្គាល់ជាផ្លូវការបញ្ជីឈ្មោះចម្ការស្វាយចំនួន ៣៧ និងរោងចក្រវេចខ្ចប់ចំនួន ៥ អាចនាំចេញផ្លែស្វាយស្រស់ទៅកាន់ប្រទេសចិន។
លោក អ៊ុ សាវឿន ប្រធានសមាគមកសិកម្មស្វាយកែវរមៀតគិរីរម្យដែលមានសមាជិកដាំស្វាយជាង ២ ០០០ ហិកតានៅខេត្តកំពង់ស្ពឺ បានស្វាគមន៍ចំពោះកម្ពុជាបានសម្ពោធការនាំចេញស្វាយស្រស់ជាលើកដំបូងទៅកាន់ទីផ្សារប្រទេសចិន។
លោក សាវឿន ប្រាប់ភ្នំពេញ ប៉ុស្តិ៍ថា៖ «យើងសប្បាយរីករាយណាស់ដែលស្វាយកម្ពុជាអាចមានទីផ្សារនៅចិន។ ខ្ញុំសូមថ្លែងអំណរគុណរាជរដ្ឋាភិបាលបានខិតខំប្រឹងប្រែងបើកទីផ្សារឲ្យស្វាយកែវរមៀតទៅប្រទេសចិន»។
លោក សាវឿន បានឱ្យដឹងថា សមាជិករបស់លោកចំនួន ៧ ចម្ការស្មើនឹង ១ ០០០ ហិកតា ត្រូវបានរដ្ឋបាលគយចិនអនុម័តឲ្យនាំចេញដោយផ្ទាល់ទៅកាន់ទីផ្សារប្រទេសចិន ប៉ុន្តែមិនទាន់បាននាំចេញនៅថ្ងៃទី ៧ ឧសភានេះទេ។
លោកនិយាយថា៖ «យើងពុំទាន់បាននាំចេញលើកដំបូងនេះទេ ព្រោះយើងអត់បានណាត់ជាមួយអ្នកទិញជាមុន ហើយយើងក៏ជាប់ម៉ៅចម្ការឲ្យគេរួចទៅហើយ ប្រហែលឆ្នាំក្រោយទើបយើងអាចចាប់ផ្តើមបាន»។
កម្ពុជាបាននាំចេញផ្លែស្វាយស្រស់ចំនួន ១៤២ ៥៥៦ តោនក្នុងរយៈពេល ៤ ខែដំបូងឆ្នាំ ២០២១ កើនឡើង ២៣៩,១៣ ភាគរយ ធៀបនឹងរយៈពេលដូចគ្នាឆ្នាំមុន។
គិតត្រឹមឆ្នាំ ២០២០ កម្ពុជាមានផ្ទៃដីដាំស្វាយប្រមាណ ១៣ ម៉ឺនហិកតា ក្នុងនោះ ផ្ទៃដីប្រមូលចំនួន ៩១ ១០៤ ហិកតា ដែលអាចផ្តល់ផលជាមធ្យមប្រមាណជាង ១,៣៨ លានតោនក្នុង ១ រដូវ៕
