.jpg)
លោក ប៉ាន សូរស័ក្តិ (ឆ្វេងទី ៣) អំឡុងពេលជួបពិភាក្សាការងារជាមួយលោកស្រី Manika Jain (ឆ្វេងទី ២ ) កាលពីថ្ងៃពុធ។ រូបថត សហការី
ភ្នំពេញៈ ប្រទេសកម្ពុជា កំពុងសិក្សាពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរីជាមួយនឹងប្រទេសឥណ្ឌា ដើម្បីជាការបើកទីផ្សារថ្មីមួយទៀតទៅកាន់ប្រទេសដែលមានសេដ្ឋកិច្ចធំក្នុងតំបន់ បន្ទាប់ពីកិច្ចចរចាពាណិជ្ជកម្មសេរីជាមួយប្រទេសចិនគ្រោងនឹងបញ្ចប់ក្នុងខែសីហាខាងមុខ។
ការលើកឡើងនេះត្រូវបានធ្វើឡើងក្នុងជំនួបពិភាក្សាការងារ និងពិសាអាហារថ្ងៃត្រង់ជាមួយនឹងលោកស្រី Manika Jain ឯកអគ្គរដ្ឋទូតប្រទេសឥណ្ឌា ប្រចាំនៅកម្ពុជាកាលពីថ្ងៃពុធនៅទីក្រុងភ្នំពេញ។
លោក ប៉ាន សូរស័ក្តិ បានថ្លែងថា៖ «ខ្ញុំពិភាក្សាជាមួយលោកជំទាវឯកអគ្គរដ្ឋទូតពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា ឥណ្ឌា ដើម្បីបង្កើនទំហំពាណិជ្ជកម្ម និងផលប្រយោជន៍ទ្វេភាគីរវាងប្រទេសទាំង ២»។
លោកបន្តថា ក្នុងជំនួបនេះលោកស្រី Manika Jain បានឯកភាពលើការពង្រឹងទំនាក់ទំនងពាណិជ្ជកម្មទ្វេភាគីតាមរយៈការបង្កើតក្រុមការងាររួមពាណិជ្ជកម្ម និងការវិនិយោគកម្ពុជា ឥណ្ឌា ដើម្បីសម្រួលដល់កិច្ចការវិនិយោគ និងការធ្វើពាណិជ្ជកម្មរវាងប្រទេសទាំង ២។
លោកបានឲ្យដឹងថា៖ «យើងក៏បានពិភាក្សាគ្នាពីទំហំពាណិជ្ជកម្មនៃប្រទេសទាំង ២ ដែលកំពុងមានការរីកចម្រើនជាបន្តបន្ទាប់»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ក្រុមចរចាលើកិច្ចព្រមព្រៀងពាណិជ្ជកម្មសេរីរបស់ក្រសួងនឹងជួបពិភាក្សាជាមួយភាគីឥណ្ឌា ដើម្បីពិភាក្សាពីលទ្ធភាពនៃការបង្កើតកិច្ចព្រមព្រៀងនេះ។
លោកថ្លែងថា៖ «ការសិក្សាពីលទ្ធភាពនេះខាងកម្ពុជាយើងបានបង្កើតក្រុមការងារចរចារួចហើយ ដោយពួកគាត់នឹងធ្វើការពិភាក្សាជាមួយឥណ្ឌាពីលទ្ធភាពកិច្ចព្រមព្រៀងពាណិជ្ជកម្មនេះថា តើវានឹងផ្តល់ផលចំណេញ ឬក៏ខាតអ្វីខ្លះ បន្ទាប់មករាយការណ៍ជូនរដ្ឋមន្ត្រី។ ប្រសិនបើយើងមើលឃើញពីផលប្រយោជន៍ ភាគីទាំង ២ នឹងចាប់ផ្តើមចរចា តែយើងមិនទាន់អាចដឹងថាធ្វើនៅពេលណានោះទេ»។
លោកបន្តថា ប្រទេសកម្ពុជា ចង់បានកិច្ចព្រមព្រៀងពាណិជ្ជកម្មជាមួយឥណ្ឌា ព្រោះទីផ្សារប្រទេសនេះធំដែលវានឹងផ្តល់ប្រយោជន៍យ៉ាងច្រើនដល់សេដ្ឋកិច្ចប្រទេសកម្ពុជា។
លោក លឹម ហេង អនុប្រធានសភាពាណិជ្ជកម្មកម្ពុជាប្រាប់ភ្នំពេញប៉ុស្តិ៍ថា បើកម្ពុជាអាចបានកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសឥណ្ឌា កម្ពុជានឹងក្លាយជាគោលដៅទាក់ទាញវិនិយោគិនពីបរទេសកាន់តែច្រើនថែមទៀត។ លោកបន្ថែមថា៖ «បើយើងមានកិច្ចព្រមព្រៀងនេះក្រុមហ៊ុនសហគ្រាសរបស់ឥណ្ឌានឹងសម្លឹងមកកាន់កម្ពុជា ដើម្បីបង្កើតរោងចក្រផលិតកែច្នៃនាំចេញទៅឥណ្ឌា និងនាំចេញទៅទិសផ្សេងទៀតផងដែរ»។
យោងតាមទិន្នន័យពីស្ថានទូតឥណ្ឌាប្រចាំនៅកម្ពុជា ទំហំពាណិជ្ជកម្មរវាងប្រទេសកម្ពុជា ជាមួយនឹងឥណ្ឌាសម្រេចបាន ២៤៩,៩២ លានដុល្លារ កាលពីឆ្នាំ ២០១៩ កើន ១០,២៤ ភាគរយធៀបនឹងឆ្នាំ ២០១៨ ដែលមានតម្លៃ ២២៦,៦៩ លានដុល្លារ។
ទិន្នន័យនេះបង្ហាញថា ប្រទេសកម្ពុជា បាននាំចេញទំនិញទៅប្រទេសឥណ្ឌាមានចំនួន ៨២,០៩ លានដុល្លារកាលពីឆ្នាំ ២០១៩ កើនឡើង ៦៩,៤៣ ភាគរយ បើធៀបនឹងឆ្នាំ ២០១៨ ខណៈកម្ពុជានាំចូលទំនិញមកវិញមានតម្លៃ ១៦៧,៨៣ លានដុល្លារធ្លាក់ចុះ ៥,៨៤ ភាគរយ។
ការវិនិយោគរបស់ឥណ្ឌាមានតម្លៃ ១៩,៨ លានដុល្លារដែលស្ថិតនៅក្នុងលំដាប់កំពូលទាំង ១០ នៃវិនិយោគិនបរទេសនៅកម្ពុជា។ ការវិនិយោគចម្បងពីឥណ្ឌាគឺក្នុងវិស័យគ្រឿងយន្តកសិកម្ម ថាមពល សំណង់ និងរ៉ែ។
បើតាមលោក ស៊ាង ថៃ ប្រទេសកម្ពុជា បានចាប់ផ្តើមការចរចាជាលើកដំបូងលើកិច្ចព្រមព្រៀងពាណិជ្ជកម្មសេរីរវាងប្រទេសកម្ពុជា និងកូរ៉េខាងត្បូង កាលពីថ្ងៃព្រហស្បតិ៍ម្សិលមិញ ខណៈលោកនាយករដ្ឋមន្ត្រី ហ៊ុន សែន គ្រោងនឹងទៅទីក្រុងប៉េកាំង ប្រទេសចិន នៅមុនថ្ងៃទី ១២ ខែសីហា ដើម្បីធ្វើជាសាក្សីលើការចុះហត្ថលេខាលើកិច្ចព្រមព្រមព្រៀងពាណិជ្ជកម្មទ្វេភាគីរវាងប្រទេសកម្ពុជា និងចិន៕LA
