ភ្នំពេញ: ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានចុះអនុស្សរណៈយោគយល់គ្នា (MoU) ជាមួយគណៈកម្មាធិការវិទ្យាសាស្ត្រ និងបច្ចេកវិទ្យាទីក្រុងស៊ាងហៃនៃសាធារណរដ្ឋប្រជាមានិតចិនស្តីពីកិច្ចសហប្រតិបត្តិការលើវិស័យវិទ្យាសាស្ត្រ បច្ចេកវិទ្យា និងនវានុវត្តន៍។
ការចុះ MoU រវាងលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ជាមួយលោក ZHANG QUAN អគ្គនាយកគ្រប់គ្រងគណៈកម្មាធិការវិទ្យាសាស្ត្រ និងបច្ចេកវិទ្យាទីក្រុងស៊ាងហៃដែលត្រូវធ្វើឡើងតាមប្រព័ន្ធអនឡាញកាលពីថ្ងៃទី ២៩ ខែតុលា កន្លងមក។
លោក ប្រសិទ្ធ បានឱ្យដឹងថា MoU នេះនឹងបង្កើននូវឱកាសសហការរួមគ្នាក្នុងការអនុវត្តគម្រោងពាក់ព័ន្ធនឹងកិច្ចការអាទិភាពមួយចំនួនមានដូចជា ការបណ្តុះបណ្តាលសមត្ថភាពផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ កសិកម្ម និងការកែច្នៃកសិផល អនាម័យ សុខភាព បរិស្ថាន ព័ត៌មានវិទ្យា និងទូរគមនាគមន៍។
លោកថ្លែងថា៖ «យើងសូមស្វាគមន៍ការចុះអនុស្សរណៈយោគយល់នៅលើវិស័យវិទ្យាសាស្ត្រ បច្ចេកវិទ្យា និងនវានុវត្តន៍រវាងកម្ពុជា និងចិនដែលវានឹងជួយដល់ការជំរុញអភិវឌ្ឍន៍លើកិច្ចការស្រាវជ្រាវរួមគ្នាថ្មីៗរវាងអ្នកស្រាវជ្រាវកម្ពុជា និងចិនព្រមទាំងការផ្លាស់ប្តូរបទពិសោធ ការផ្លាស់ប្តូរបច្ចេកទេស និងបច្ចេកវិទ្យា របកគំហើញថ្មីៗ និងការសហការអនុវត្តគម្រោងថ្មីផងដែរ»។
លោករដ្ឋមន្ត្រីបានឱ្យដឹងទៀតថា ក្រសួងនឹងបន្តអនុវត្តយ៉ាងយកចិត្តទុកដាក់ជាអាទិភាពលើការជំរុញអភិវឌ្ឍន៍ផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីគាំទ្រការអភិវឌ្ឍឧស្សាហកម្ម សហគ្រិនភាព និងការអភិវឌ្ឍបៃតង។
លោកបញ្ជាក់ថា៖ «អនុស្សរណៈយោគយល់នេះក៏បានបង្ហាញនូវសមិទ្ធផលថ្មីមួយរបស់កម្ពុជាស្របតាមផែនការយុទ្ធសាស្ត្ររបស់រាជរដ្ឋាភិបាលដែលខិតខំប្រឹងប្រែងធ្វើកំណែទម្រង់ខាងក្នុង និងការស្វាគមន៍នូវកិច្ចសហប្រតិបត្តិការខាងក្រៅរបស់កម្ពុជា»។
តាមរយៈការចុះ MoU នេះ ភាគីទាំង ២ ក៏បង្ហាញពីគំនិតផ្តួចផ្តើមក្នុងការបង្កើតសាខាធនាគារបច្ចេកវិទ្យាបៃតងនៅកម្ពុជាផងដែរ។
ការបង្កើតធនាគារបច្ចេកវិទ្យាបៃតងធ្វើឡើងក្នុងគោលបំណងដើម្បីកៀរគរ ចាត់ចែង និងសម្របសម្រួលទៅដល់ការប្រើប្រាស់មូលនិធិ ឬឥណទានបៃតងដើម្បីគាំទ្រដល់ការអនុវត្តគម្រោងវិនិយោគបៃតងខ្នាតធំមានដូចជាការវិនិយោគលើគម្រោងវារីអគ្គីសនី ថាមពលព្រះអាទិត្យ គម្រោងកាត់បន្ថយការបំភាយឧស្ម័នកាបូនក្នុងវិស័យឧស្សាហកម្ម និងផលប៉ះពាល់បរិស្ថាន៕ LA