The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ជំរុញ​ការធ្វើ​ទំនើបកម្ម​ ដើម្បី​ក្លាយ​ជា​មជ្ឈមណ្ឌល​ភ័ស្តុភារកម្ម

កម្ពុជា​ជំរុញ​ការធ្វើ​ទំនើបកម្ម​ ដើម្បី​ក្លាយ​ជា​មជ្ឈមណ្ឌល​ភ័ស្តុភារកម្ម

Content image - Phnom Penh Post
លោក ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន​ ​ចុះទៅពិនិត្យ​ការរៀបចំ​ច្រកទ្វារព្រំដែន​អន្តរជាតិ «​ព្រៃវល្លិ​» ​ស្ថិត​ក្នុង​ខេត្ត​ស្វាយរៀង​ព្រំដែន​កម្ពុជា-វៀតណាម​ កាលពីម្សិលមិញ។ រូបថត MPWT

កម្ពុជា​ជំរុញ​ការធ្វើ​ទំនើបកម្ម​ ដើម្បី​ក្លាយ​ជា​មជ្ឈមណ្ឌល​ភ័ស្តុភារកម្ម

ភ្នំពេញៈ កម្ពុជា​កំពុង​ជំរុញ​ការធ្វើ​ទំនើបកម្ម​ហេដ្ឋារចនាសម្ព័ន្ធ​ដឹកជញ្ជូន​ទាំង​ផ្នែក​រឹង និង​ផ្នែក​ទន់​ឲ្យ​ប្រសើរ​ឡើង ជាពិសេស​ចរាចរណ៍​តាម​ច្រកទ្វារ​ព្រំដែន​អន្តរជាតិ រួមទាំង​ការបើក​ច្រកទ្វារ​អន្តរជាតិ​ថ្មីៗ​ជាមួយ​ប្រទេស​ជិតខាង​នៅក្នុង​គោលបំណង​ដើម្បី​ប្រែក្លាយ​ខ្លួន​ទៅជា​មជ្ឈមណ្ឌល​ភ័ស្តុភារកម្ម​នៅក្នុង​តំបន់​អាស៊ាន​។ នេះ​បើតាម​លោក ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន​។

នៅក្នុង​ពេល​ចុះទៅពិនិត្យ​ការរៀបចំ​ច្រកទ្វារព្រំដែន​អន្តរជាតិ «​ព្រៃវល្លិ​» ​ស្ថិត​ក្នុង​ខេត្ត​ស្វាយរៀង​ព្រំដែន​កម្ពុជា-វៀតណាម​កាលពី​ថ្ងៃ​ព្រហស្បតិ៍ ទី​ ១០ ខែកញ្ញា នេះ​លោក ស៊ុន ចាន់ថុល បាន​និយាយថា បច្ចុប្បន្ន​រដ្ឋាភិបាល​កម្ពុជា​កំពុង​ប្រឹងប្រែង​ក្នុង​ការកសាង​ប្រព័ន្ធ​ហេដ្ឋារចនាសម្ព័ន្ធ​ផ្លូវថ្នល់​នៅ​គ្រប់​ទីកន្លែង ព្រម​ជាមួយ​នឹង​ការបន្ត​រៀបចំ​បើក​ច្រកទ្វារ​ព្រំដែន​ជា​បន្តបន្ទាប់​។

លោក​បន្តថា នៅពេល​ប្រព័ន្ធ​ហេដ្ឋារចនាសម្ព័ន្ធ​ផ្លូវថ្នល់ និង​កន្លែង​ឆ្លងកាត់​ទំនិញ​មាន​ភាពងាយស្រួល វា​នឹង​រួមចំណែក​ជួយ​លើកកម្ពស់​កំណើន​សេដ្ឋកិច្ច​ជាតិ​កម្ពុជា​បាន​មួយចំណែក​បន្ថែមទៀត​។

លោក​ប្រាប់​ទៀត​ថា ក្នុង​មហិច្ឆតា​ប្រែក្លាយ​មុខមាត់​ប្រទេស​លើ​ឆាក​អន្តរជាតិ ព្រមទាំង​បង្កើន​កម្រិត​ប្រាក់​ចំណូល​ក្នុង​សេដ្ឋកិច្ចជាតិ​នោះ គម្រោង​សាងសង់​ហេដ្ឋារចនាសម្ព័ន្ធ​ថ្មីៗ​បាន​លេច​ឡើង​ជា​បន្តបន្ទាប់ ទោះបី​សេដ្ឋកិច្ច​ពិភពលោក​កំពុង​ធ្លាក់​ក្នុង​បរិបទ​នៃ​ការឆ្លង​រាលដាល​កូវីដ​ ១៩ ក៏ដោយ​។

លោក​ថ្លែងថា​៖ «​ទោះបី​ជំងឺ​កូវីដ​ ១៩ កំពុង​បន្ត​ការរីករាលដាល​ក៏​រដ្ឋាភិបាល​មិនបាន​ផ្អាក ឬ​លុបចោល​គម្រោង​សាងសង់​ហេដ្ឋារចនាសម្ព័ន្ធ​ថ្មីៗ​ណាមួយ​នោះទេ ដោយ​រដ្ឋាភិបាល​មានលទ្ធភាព​គ្រប់គ្រាន់​ក្នុង​ការបន្ត​កសាង​ហេដ្ឋារចនាសម្ព័ន្ធ ដែល​ជា​កត្តា​ដ៏សំខាន់​ក្នុង​ការជំរុញ​កំណើន​សេដ្ឋកិច្ច​ជាតិ​ឲ្យ​មាន​ការរីកចម្រើន​»​។

អភិបាលខេត្ត​ស្វាយរៀង​លោក ម៉ែន វិបុល បាន​ប្រាប់ថា បន្ថែម​លើ​ហេដ្ឋារចនាសម្ព័ន្ធ​ផ្លូវថ្នល់​ល្អប្រសើរ ការបើក​ច្រកទ្វារព្រំដែន​បន្ថែម​ជាមួយ​ប្រទេស​ជិតខាង​គឺ​ពិតជា​មាន​សារៈសំខាន់​ក្នុង​ការបង្កើន​ភាពទាក់ទាញ​ឲ្យ​មាន​ការចូល​មក​បណ្តាក់​ទុនវិនិយោគ​កាន់តែ​ច្រើន​នៅ​កម្ពុជា​។

លោក​ថ្លែងថា​៖ «​ជាមួយ​នឹង​ការបើក​ច្រក​នេះ​​ (​ព្រៃវល្លិ៍​) ខ្ញុំ​រំពឹងថា នឹង​អាច​ស្រូប​បាន​នូវ​កំណើន​អ្នកវិនិយោគ​បន្ថែមទៀត​មកកាន់​ទីនេះ​ដែល​នឹង​អាចឈាន​ទៅដល់​ការបង្កើត​តំបន់​សេដ្ឋកិច្ច​ពិសេស​ថ្មីៗ​បន្ថែមទៀត​នៅពេល​ខាងមុខ​»​។

ប្រធាន​សមាគម​ភ័ស្តុភារកម្ម​កម្ពុជា​លោក ស៊ិន ចន្ធី បាន​ប្រាប់ថា ការចាប់យក​ឱកាស​ក្នុង​ការប្រែក្លាយ​ខ្លួន​ទៅ​ជា​មណ្ឌល​ភ័ស្តុភារកម្ម​ក្នុង​តំបន់ គឺជា​ការចាំបាច់​សម្រាប់​កម្ពុជា ខណៈ​កម្ពុជា​ជា​ប្រទេស​ស្ថិត​នៅ​ចំ​ទីតាំង​អំណោយផល​ល្អ​។ លោក​បន្តថា ទោះយ៉ាងណា​ដោយសារ​ការខិតខំ​ជំរុញ​របស់​រដ្ឋាភិបាល​ទើប​ចាប់ផ្តើម​នោះ ដូច្នេះ​វា​ត្រូវការ​ពេលវេលា​បន្ថែមទៀត​។

លោក​និយាយ​ថា​៖ «​សម្រាប់​ផែនការ​រយៈពេល​វែង យើង​ពិតជា​ចង់​ធ្វើឲ្យ​កម្ពុជា​ក្លាយ​ទៅ​ជា​ទីតាំង​នៃ​មណ្ឌល​ភ័ស្តុភារកម្ម​ក្នុង​តំបន់​អាស៊ាន ដែល​ទាក់ទាញ​ឲ្យ​អ្នកវិនិយោគ​កាន់តែ​ច្រើន​មូលមក​បើក​ដំណើរការ​រោងចក្រ និង​អាជីវកម្ម​នានា​នៅ​កម្ពុជា​»​។

លោក​ប្រាប់​ទៀត​ថា តាម​ការសិក្សា​របស់ JICA កន្លងមក​បាន​ព្យាករ​ថា សកម្មភាព​ដឹកជញ្ជូន​ទំនិញ​នៅ​កម្ពុជា​នឹង​មាន​សម្ទុះ​ឡើង​ជាង​ទ្វេដង​នៅ​អំឡុង​ឆ្នាំ​ ២០២៣-២០២៥​។

ក្នុង​ជំនួប​ជាមួយ​ទីភ្នាក់ងារ​សហប្រតិបត្តិការ​អន្តរជាតិ​ជប៉ុន​ (JICA) ​ស្តីពី​ «​កិច្ចសហប្រតិបត្តិការ​បច្ចេកទេស​សម្រាប់​គម្រោង​ធ្វើឲ្យ​ប្រសើរ​ឡើង​ប្រព័ន្ធ​ភ័ស្តុភារកម្ម​នៅ​កម្ពុជា ដំណាក់កាល​ទី ​២» កាលពី​ថ្ងៃ​ពុធ លោក ស៊ុន ចាន់ថុល ក៏​បាន​លើកឡើង​ដែរ​ថា ការធ្វើ​ទំនើបកម្ម​ហេដ្ឋារចនាសម្ព័ន្ធ​ដឹកជញ្ជូន និង​ការធ្វើឲ្យ​ប្រសើរឡើង​ច្រកទ្វារ​ព្រំដែន​អន្តរជាតិ​ថ្មី​ជាមួយ​ប្រទេស​ជិតខាង គឺជា​កម្លាំង​ចលករ​ក្នុង​ការលើក​កម្ពស់​វិស័យ​ភ័ស្តុភារកម្ម​ដែល​អាច​ប្រកួតប្រជែង​បាន​ជាមួយ​ប្រទេស​ក្នុង​តំបន់​៕ LA

អត្ថបទគួរចាប់អារម្មណ៍

  • ភ្នំពេញ៖ រដ្ឋមន្ត្រី​ក្រសួង​យុត្តិធម៌​លោក​ កើត ​រិទ្ធ​ បាន​ប្រាប់​ឯកអគ្គ​រាជទូត​អូស្ត្រាលី​លោក ​Pablo​ Kang ​នៅ​ក្នុង​ជំនួប​កាល​ពី​ថ្ងៃ​អង្គារ នៅ​ក្រសួង​យុត្តិធម៌​ថា​ ការ​ចាប់​ខ្លួន​បុគ្គល​ណា​មួយ​ដោយ​សមត្ថកិច្ច គឺ​ធ្វើ​ទ្បើង​ដោយ​អនុលោម​តាម​ច្បាប់​​កម្ពុជា។​

  • ភ្នំពេញ៖ ដោយ​សង្កេត​ឃើញ​ពី​ការ​ប្រឈម​របស់​​ប្រជាកសិករ​កម្ពុជា​​មួយ​ចំនួន​ ជាពិសេស​អ្នក​នៅ​ទី​ដាច់​ស្រយាល​ ដែល​បាត់បង់​ទីផ្សារ​​​​ព្រោះ​តែ​វិបត្តិ​កូវីដ យុវជន ​១ ក្រុម ​បាន​រួមគ្នា​បង្កើត​គម្រោង​ COVID Farmer Hacker ដើម្បី​ជួយ​​អ្នក​ខិតខំ​ដាំដុះ​តែ​ត្រូវ​រងគ្រោះ​ពី​ការ​រំខាន​ដល់​​​សេដ្ឋកិច្ច​​បង្ក​ដោយ​វីរុស​កូរ៉ូណា។​

  • ភ្នំពេញ៖ គ្រឹះស្ថាន​មីក្រូហិរញ្ញវត្ថុ ប្រាសាក់ ​​ដែល​ចុះ​បញ្ជី​សញ្ញាប័ណ្ណ​សាជីវកម្ម​នៅ​ផ្សារ​មូលបត្រ​កម្ពុជា ​(CSX) បាន​រាយការណ៍​អំពី​ប្រតិបត្តិការ​អាជីវកម្ម​ដ៏​ល្អ​ប្រសើរ​នៅ​ត្រីមាស​ទី​២ ​ឆ្នាំ​នេះ ទោះបី​ជា​​ខ្លួន​ទទួល​រង​នូវ​សម្ពាធ​ខ្លះៗ​ពី​ការ​រីក​រាលដាល​ជំងឺ​កូវីដ ​១៩ ​ដែល​បណ្ដាល​ឱ្យ​សេដ្ឋកិច្ច​របស់​កម្ពុជា មាន​ការ​ធ្លាក់ចុះ​ក៏​ដោយ​។​

  • ភ្នំពេញ៖ ​លោកស្រី​ ​ភឿង​ សកុណា ​រដ្ឋមន្រ្តី​ក្រសួង​វប្បធម៌​ និង​វិចិត្រ​សិល្បៈ​បាន​ចេញ​សេចក្ដី​ណែនាំ​ដល់​គ្រប់​អង្គភាព​ពាក់ព័ន្ធ​ក្រោម​ឱវាទ​ក្រសួង​វប្បធម៌ ​និង​គ្រប់​រដ្ឋបាល​ថ្នាក់​ក្រោម​ជាតិ ​អនុវត្ត​នីតិវិធី​ និង​ទម្រង់​បែបបទ​នៃ​ការ​គ្រប់គ្រង​អាជីវកម្ម​កាត់សក់​ ​អ៊ុត​សក់​ និង​លម្អ​ក្រចក

  • ភ្នំពេញ៖ ​រដ្ឋមន្រ្តី​ក្រសួង​សុខាភិបាល​លោក ​ម៉ម​ ប៊ុន​ហេង បាន​ជំរុញ​ឱ្យ​គ្រប់​ភាគី​ពាក់ព័ន្ធ​ទាំង​អស់​ ដែល​ធ្វើ​ការ​ផ្នែក​គាំពារ​មាតា​ និង​ទារក​ ត្រូវ​​បង្កើន​យុទ្ធនាការ​អប់រំ​ផ្សព្វផ្សាយ​អំពី​សារៈសំខាន់​នៃ​ការ​បំបៅ​កូន​ដោយ​ទឹក​ដោះ​ម្តាយ​ និង​ហានិភ័យ​ពី​ការ​បំបៅ​កូន​ដោយ​ទឹក​ដោះ​គោ​ម្សៅ​ផ្សំ​តាម​រូបមន្ត​ទាំង​នៅ​ថ្នាក់​ជាតិ​ និង​ថ្នាក់​ក្រោម​ជាតិ។

  • មណ្ឌលគិរី៖ សាលា​ដំបូង​ខេត្ត​មណ្ឌលគិរី ពី​ម្សិលមិញ​បាន​សម្រេច​ឃុំ​ខ្លួន​ចាងហ្វាង​សារព័ត៌មាន​អនឡាញ​ម្នាក់​នៅ​ពន្ធនាគារ​​ខេត្ត​ក្រោម​បទ​ចោទ ​«ឈូស​ឆាយ​ដី​ព្រៃ​ដោយ​គ្មាន​ការ​អនុញ្ញាត​» បន្ទាប់​ពី​សមត្ថកិច្ច​ឃាត់​ខ្លួន​កាល​ពី​​ថ្ងៃទី ២២ កញ្ញា ​តាម​ដីកា​តុលាការ​ពាក់ព័ន្ធ​ការ​ឈូស​ឆាយ​ដី​ព្រៃ ​និង​ប្រើប្រាស់​សារធាតុ​ញៀន។