.jpg)
គ្រឿងចក្រកំពុងប្រមូលដើមប្រេងខ្យល់យកដាក់ក្នុងម៉ាស៊ីនកិនកម្ទេច។ សហការី ហុង មិនា
ភ្នំពេញៈ កម្ពុជាបានលើកទឹកចិត្ត និងស្នើឲ្យក្រុមហ៊ុនវិនិយោគ Paper Tree Investment Cambodia Co., Ltd បង្កើតរោងចក្រកែច្នៃផលិតក្រដាសនៅកម្ពុជា ខណៈបច្ចុប្បន្ននេះផលិតផលដែលក្រុមហ៊ុនកំពុងដាំដុះ និងប្រមូលទិញពីអ្នកដាំដុះនៅកម្ពុជា សុទ្ធតែត្រូវនាំចេញទៅរោងចក្រនៅប្រទេសថៃ។
Paper Tree Investment Cambodia Co., គឺបុត្រសម្ព័ន្ធរបស់ក្រុមហ៊ុន Paper Tree Holding Co., Ltd ដែលមានមូលដ្ឋានក្នុងប្រទេសថៃ។ ក្រុមហ៊ុននេះត្រូវបានបង្កើតនៅកម្ពុជាក្នុងឆ្នាំ ២០១៣ ដោយមកដល់ពេលនេះក្រុមហ៊ុនកំពុងដាំដុះលើផ្ទៃដីសរុប ១ ០៥៦ ហិកតានៅទីតាំង ៤ កន្លែងផ្សេងៗគ្នារួមមាន ២ ទីតាំងស្ថិតក្នុងខេត្តបន្ទាយមានជ័យ ១ នៅខេត្តបាត់ដំបង និង ១ នៅខេត្តប៉ៃលិន។
ក្នុងពេលចុះទៅពិនិត្យទិដ្ឋភាពផ្ទាល់នៅក្រុមហ៊ុន Paper Tree Investment Cambodia Co., Ltd កាលពីថ្ងៃអាទិត្យលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានស្នើឲ្យក្រុមហ៊ុននេះបង្កើនលទ្ធភាពដាំដុះ និងពង្រីកផ្ទៃដីដាំដុះដើមប្រេងខ្យល់ឲ្យកាន់តែច្រើនបន្ថែមទៀត ហើយក៏សូមឲ្យក្រុមហ៊ុនសិក្សាពីលទ្ធភាពក្នុងការធ្វើកិច្ចសន្យាកសិកម្មជាមួយប្រជាជន ដើម្បីជួយលើកស្ទួយជីវភាពពួកគេនៅមូលដ្ឋានឲ្យបានកាន់តែល្អ។ ទន្ទឹមនឹងនេះលោកក៏បានស្នើឲ្យក្រុមហ៊ុនពិនិត្យលទ្ធភាពក្នុងការបង្កើតរោងចក្រកែច្នៃក្រដាសនៅកម្ពុជាផងដែរ។
លោកថ្លែងថា៖ «ខ្ញុំសូមស្នើឲ្យក្រុមហ៊ុនពិនិត្យលទ្ធភាពបង្កើតរោងចក្រកែច្នៃ ឬផលិតក្រដាសនៅកម្ពុជាតែម្តង ប្រសើរជាងដឹកជញ្ជូនវត្ថុធាតុដើមទៅប្រទេសថៃ»។
លោក តឹក សុភក្តិ ប្រធានគម្រោងក្រុមហ៊ុន Paper Tree Investment Cambodia Co., Ltd បានប្រាប់ភ្នំពេញប៉ុស្តិ៍កាលពីថ្ងៃចន្ទថា បច្ចុប្បន្នក្រុមហ៊ុនកំពុងខិតខំពង្រីកការដាំដុះដើមប្រេងខ្យល់ដោយខ្លួនឯង និងប្រមូលទិញពីអ្នកដាំដុះតាមបណ្តាខេត្តនានាដើម្បីយកមកកិនជាចំណិតតូចៗ (Wood Chip) មុននឹងយកទៅផ្គត់ផ្គង់បន្តឲ្យក្រុមហ៊ុននៅថៃ។ លោកបន្តថា ដើមប្រេងខ្យល់ គឺជាវត្ថុធាតុដ៏សំខាន់សម្រាប់យកទៅកិនធ្វើក្រដាស និងផលិតផលមួយចំនួនទៀត។
លោកបន្ថែមថា បើទោះបីមានតម្រូវការទីផ្សារខ្ពស់ ប៉ុន្តែបរិមាណដើមប្រេងខ្យល់នៅកម្ពុជាពេលនេះគឺមានចំនួនតិចតួចនៅឡើយ ដែលទាមទារឲ្យមានការវិនិយោគលើការដាំដុះបន្ថែមទៀតមុននឹងក្រុមហ៊ុនសម្រេចចិត្តវិនិយោគលើរោងចក្រកែច្នៃផលិតផលសម្រេចដូចនៅប្រទេសថៃ។ លោកបញ្ជាក់ថា៖ «ប្រសិនបើមានវត្ថុធាតុដើមគ្រប់គ្រាន់ ក្រុមហ៊ុនគ្រោងនឹងបង្កើតរោងចក្រផលិតក្រដាស និងរោងចក្រផលិតការ៉ូធ្វើពីឈើផងដែរ»។
ទោះបីយ៉ាងណាលោកអះអាងថា យោងតាមស្ថានភាពបច្ចុប្បន្នកម្ពុជាអាចនឹងត្រូវការពេលចន្លោះពី ៣-៥ ឆ្នាំទៀត ក្នុងការពង្រីកការដាំដុះដើមប្រេងខ្យល់ឲ្យបានច្រើនដើម្បីឆ្លើយតបទៅនឹងតម្រូវការបង្កើតរោងចក្រ។
បើតាមលោក សុភក្តិ បច្ចុប្បន្នក្រុមហ៊ុនរបស់លោកបានប្រមូលទិញដើមប្រេងខ្យល់ក្នុងតម្លៃចន្លោះពី ២៥-៣០ ដុល្លារក្នុង ១ តោន។
អភិបាលរងខេត្តបន្ទាយមានជ័យលោក លី សារី បានប្រាប់ថា បច្ចុប្បន្នខេត្តបន្ទាយមានជ័យមានកសិដ្ឋានដាំដើមប្រេងខ្យល់ចំនួន ៣ កន្លែងធំៗ។ ដើមប្រេងខ្យល់មិនត្រឹមតែជារុក្ខជាតិងាយដាំប៉ុណ្ណោះទេ តែវាថែមទាំងមានសក្តានុពលច្រើនសម្រាប់សេដ្ឋកិច្ចទៀតផង។
លោកបន្តថា ដោយសារនៅកម្ពុជាមិនទាន់មានការវិនិយោគលើរោងចក្រកែច្នៃដើមប្រេងខ្យល់ទៅជាផលិតផលសម្រេច ហេតុនេះផលដែលប្រមូលបានតែងត្រូវក្រុមហ៊ុនយកទៅលក់បន្តនៅប្រទេសថៃ។
លោកថ្លែងថា៖ «ក្នុងនាមអាជ្ញាធរមូលដ្ឋាន យើងតែងជំរុញឲ្យអ្នកវិនិយោគ និងប្រជាជនធ្វើការដាំដើមឈើឲ្យបានច្រើន ព្រោះក្រៅពីជួយបង្កើតការងារថ្មីៗ និងប្រាក់ចំណូលសម្រាប់ក្រុមគ្រួសារ វាក៏បានចូលរួមជួយដល់ផ្នែកបរិស្ថានផងដែរ»៕ LA
