ភ្នំពេញៈ លោករដ្ឋមន្ត្រី ចម ប្រសិទ្ធ បានជំរុញ និងលើកទឹកចិត្តដល់ក្រុមហ៊ុន TCU Polys Enterprise Co., Ltd ដែលវិនិយោគដោយជនជាតិចិនធ្វើការពង្រីកខ្សែចង្វាក់ផលិតកម្មការផលិតបំពង់ទឹកដើម្បីបំពេញតម្រូវការទីផ្សារ និងចូលរួមកាត់បន្ថយការនាំចូល។
ការស្នើរបស់លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នេះធ្វើឡើងក្នុងពេលលោកដឹកនាំប្រតិភូចុះពិនិត្យរោងចក្រផលិតបំពង់ទឹកខាងលើនៅខេត្តកំពង់ស្ពឺពីថ្ងៃទី ៣១ ខែកក្កដា ។
លោករដ្ឋមន្ត្រីបានថ្លែងថា ផលិតផលបំពង់ទឹកទាំងនេះគឺជាប្រភេទផលិតផលដែលរាជរដ្ឋាភិបាលលើកទឹកចិត្ត ដើម្បីចូលរួមអភិវឌ្ឍវិស័យទឹកស្អាតនៅកម្ពុជា។ លោកបានចាត់ទុកគម្រោងវិនិយោគនេះមានសារៈសំខាន់ណាស់ក្នុងការរួមចំណែកបំពេញតម្រូវការក្នុងវិស័យទឹកស្អាតនៅកម្ពុជា ដោយមើលឃើញថា ក្រុមហ៊ុនបានអភិវឌ្ឍផលិតផលរបស់ខ្លួនឈរលើគុណភាពជាចម្បង តាមរយៈការប្រើប្រាស់វត្ថុធាតុដើមសុទ្ធពិតប្រាកដ ដោយមានប្រព័ន្ធត្រួតពិនិត្យគុណភាព និងស្តង់ដានៃប្រព័ន្ធគ្រប់គ្រងផលិតកម្មបានល្អ។
លោក ចម ប្រសិទ្ធ បន្ថែមថា៖ «ការចុះទស្សនកិច្ចនេះ ក្រៅពីសិក្សាស្វែងយល់លើកទឹកចិត្ត យើងក៏បានគិតគូរពិនិត្យលទ្ធភាពជួយសហការគាំទ្រ និងតម្រង់ទិសផ្នែកអាជីវកម្មរបស់ក្រុមហ៊ុន ហើយក៏នឹងស្តាប់ពីតម្រូវការក៏ដូចជាបញ្ហាប្រឈមនានារបស់ក្រុមហ៊ុនផងដែរ»។
«ជារួម យើងសង្កេតឃើញថា ក្រុមហ៊ុនអនុវត្តបានត្រឹមត្រូវតាមក្រឹត្យក្រមច្បាប់របស់កម្ពុជា ដូច្នេះក្នុងនាមក្រសួងសូមអបអរសាទរ និងលើកទឹកចិត្តបន្ថែមទៀត ពីព្រោះជាផលិតផលកំពុងមានតម្រូវការលើទីផ្សារកម្ពុជា ហើយក៏អាចផលិតធ្វើការនាំចេញដែរ »។ នេះបើយោងតាមការថ្លែងរបស់លោក។
លោក ចម ប្រសិទ្ធ ក៏បានណែនាំឲ្យក្រុមហ៊ុនពិនិត្យលទ្ធភាពតាមរយៈផលរបររបស់ខ្លួនក្នុងការចូលរួមដេញថ្លៃផ្គត់ផ្គង់ឧបករណ៍សម្ភារទឹកស្អាតនៅក្នុងប្រទេសកម្ពុជា។
បើយោងតាមអ្នកតំណាងក្រុមហ៊ុនបានបញ្ជាក់ថា ក្រុមហ៊ុន TCU Polys Enterprise Co., Ltd ត្រូវបានបង្កើតឡើងនៅកម្ពុជាក្នុងឆ្នាំ ២០១៦ និងបានបម្រើសេវាផលិត និងផ្គត់ផ្គង់បំពង់ទឹកស្អាត និងទឹកលូមកទល់ពេលនេះមានរយៈពេលជិត ៥ ឆ្នាំហើយ ដែលមានដើមទុនវិនិយោគសរុបប្រហែល ១០ លានដុល្លារ។
ចំពោះផលិតផលរបស់រោងចក្រមានបំពង់បង្ហូរទឹកលូមុខកាត់ពី ៣០០ មម- ២ ០០០ មម បំពង់ទឹកស្អាត HDPE មុខកាត់ពី ២០ មម-៨០០ មម ប្រភេទបំពង់ PPR (Polypropylene-Random) មុខកាត់ពី ២០ មម-២០០ មម ដែលប្រើសម្រាប់ទឹកត្រជាក់ ទឹកក្តៅ និងមានផលិតបំពង់សម្រាប់ដាក់ខ្សែភ្លើង បំពង់ UPVC និង PVC។ល។
លោកបានថ្លែងថា៖ «ក្រុមហ៊ុនបានផ្គត់ផ្គង់ផលិតផលដែលមានគុណភាព ដោយប្រើវត្ថុធាតុដើមជាប្រភេទគ្រាប់ជ័រថ្មីនាំចូលពីប្រទេសថៃ (ប្រភពដើមពីប្រទេសអារ៉ាប់) ដែលមានបន្ទប់ពិសោធន៍ និងធ្វើតេស្តត្រួតពិនិត្យគុណភាពផលិតផលតាមបទដ្ឋានបច្ចេកទេស និងស្តង់ដាអន្តរជាតិ។ បច្ចុប្បន្នក្រុមហ៊ុនបានផលិតសម្ភារបំពង់គ្រប់ប្រភេទ ដើម្បីបម្រើសេចក្តីត្រូវការក្នុងស្រុក ជាពិសេសបំពង់ទឹកកខ្វក់កំពុងត្រូវបានប្រើប្រាស់សម្រាប់ប្រព័ន្ធលូនៅខេត្តព្រះសីហនុ»៕ LA