ភ្នំពេញៈ កម្ពុជាប្រកាសផ្សព្វផ្សាយជាផ្លូវការនូវ «គោលនយោបាយជាតិស្តីពីដំឡូងមី ២០២០-២០២៥» ដើម្បីបង្កើនផលិតកម្ម និងធ្វើឱ្យវាកាន់តែមានលក្ខណៈពាណិជ្ជកម្មសម្រាប់ការនាំចេញទៅទីផ្សារអន្តរជាតិ ស្របជាមួយគោលនយោបាយអភិវឌ្ឍន៍ឧស្សាហកម្មឆ្នាំ ២០១៥-២០២៥ របស់រដ្ឋាភិបាល។
គោលនយោបាយនេះដែលបានដាក់ឱ្យដំណើរការកាលពីថ្ងៃទី ១៤ ខែមករា ត្រូវបានអភិវឌ្ឍដោយក្រុមការងារដំឡូងមីរបស់រដ្ឋាភិបាល និងបានអនុម័តដោយរដ្ឋាភិបាលកម្ពុជាកាលពីថ្ងៃទី ១៤ ខែសីហាឆ្នាំ ២០២០។
ការដាក់ឱ្យដំណើរការគោលនយោបាយនេះបង្ហាញពីការចាប់ផ្ដើមដំណើរថ្មីក្នុងការអភិវឌ្ឍកសិពាណិជ្ជកម្មរបស់កម្ពុជាសម្រាប់កំណើន រួមចំណែកកាត់បន្ថយភាពក្រីក្រ និងការសម្រេចបានគោលនយោបាយអភិវឌ្ឍន៍ឧស្សាហកម្មឆ្នាំ ២០១៥-២០២៥ របស់រដ្ឋាភិបាល។
ការអភិវឌ្ឍគោលនយោបាយនេះគឺជាកិច្ចខិតខំប្រឹងប្រែងរួមដោយក្រសួងពាណិជ្ជកម្ម ក្រសួងកសិកម្ម រុក្ខាប្រមាញ់ និងនេសាទ និងកម្មវិធីអភិវឌ្ឍន៍អង្គការសហប្រជាជាតិ (UNDP)។
លោក ម៉ម អំណត់ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានឱ្យដឹងក្នុងអំឡុងពេលការដាក់ឱ្យដំណើរការជាផ្លូវការនៃគោលនយោបាយនេះនៅក្រសួងពាណិជ្ជកម្មថា ដោយមានការផលិតបាន ១២ លានតោនក្នុង ១ ឆ្នាំ ដំឡូងមីគឺជាដំណាំកសិឧស្សាហកម្មមួយ ដែលមានសក្ដានុពលពេញលេញ សម្រាប់ការកែលម្អជីវភាពរស់នៅរបស់កសិករ និងនាំចេញ។
លោកថ្លែងថា៖ «ដោយពឹងផ្អែកលើចក្ខុវិស័យដែលបានកំណត់នៅក្នុងគោលនយោបាយដំឡូងមី ក្រសួងកសិកម្ម រុក្ខាប្រមាញ់ និងនេសាទនឹងធ្វើការជាមួយភាគីពាក់ព័ន្ធដើម្បីដោះស្រាយបញ្ហាប្រឈមនៅក្នុងវិស័យនេះ ស្របជាមួយនឹងក្របខ័ណ្ឌការងារនៃផែនការអភិវឌ្ឍន៍យុទ្ធសាស្ដ្រ វិស័យកសិកម្មឆ្នាំ ២០១៩-២០២៣ របស់ក្រសួង»។
លោក Nick Beresford តំណាង UNDP ប្រចាំប្រទេសកម្ពុជា មានប្រសាសន៍ថា ដំណាំដំឡូងមីផ្ដល់ឱកាសដ៏ធំធេង ដើម្បីឱ្យកម្ពុជាឈានជើងចូលទៅក្នុងច្រវាក់ផ្គត់ផ្គង់ថ្នាក់តំបន់ក្នុងនាមជាអ្នកផ្គត់ផ្គង់ដោយផ្ទាល់ និងជាអ្នកកែច្នៃផលិតផលពាក់កណ្ដាលសម្រេច និងផលិតផលសម្រេចសម្រាប់ទីផ្សារក្នុងស្រុក និងទីផ្សារសកលលោក។
លោកថា៖ «ការរៀបចំខ្លួនជាយុទ្ធសាស្ត្របែបនេះផ្ដល់លទ្ធភាពឱ្យកម្ពុជាអាចបង្កើនពាណិជ្ជកម្ម និងការនាំចេញធានាលំនឹងជីវភាពរស់នៅរបស់ប្រជាពលរដ្ឋរាប់ពាន់នាក់ លើកកម្ពស់កំណើនប្រកបដោយបរិយាប័ន្ន និងជំរុញការអភិវឌ្ឍប្រកបដោយចីរភាព»។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មថ្លែងក្នុងពិធីប្រកាសផ្សព្វផ្សាយជាផ្លូវការនូវគោលនយោបាយជាតិនោះថា៖ «ដំណាំដំឡូងមីគឺជាដំណាំកសិឧស្សាហកម្ម និងជាផលិតផលនាំចេញដ៏សំខាន់របស់កម្ពុជាដែលបានរួមចំណែកពី ៣% ទៅ ៤% នៃ GDP និងក្នុង ១ ឆ្នាំៗវិស័យដំឡូងមីបានទទួលការវិនិយោគជាទឹកប្រាក់ប្រមាណ ៣០០ លានដុល្លារ និងជាផ្ទៃដីដាំដុះដំឡូងមីទំហំប្រមាណជាង ៦០ ០០០ ហិកតា។
ក្នុងឆ្នាំ ២០១៩ កម្ពុជាបាននាំចេញដំឡូងមីស្រស់ ក្រៀម និងម្សៅប្រមាណ ៣,៣០ លានតោនដែលគិតជាទឹកប្រាក់មានតម្លៃជាង ២៦,៤០ លានដុល្លារ។
យោងតាមរបាយការណ៍របស់ UNDP ការអភិវឌ្ឍក្នុងវិស័យដំឡូងមីកម្ពុជាត្រូវការកញ្ចប់ថវិកាវិនិយោគសាធារណៈចំនួន ២៩៦ លានដុល្លារ ខណៈការអភិវឌ្ឍក្នុងវិស័យនេះភាគច្រើនគឺមិនទាន់យកចិត្តទុកដាក់ខ្ពស់លើការកែច្នៃក្នុងប្រទេសនៅឡើយ៕ LA