ភ្នំពេញៈ នាយករដ្ឋមន្ត្រី ហ៊ុន សែន កាលពីថ្ងៃទី ១ ខែមេសា បានអនុម័តលើផែនទីចង្អុលផ្លូវ (Roadmap) ដើម្បីស្តារ និងលើកស្ទួយវិស័យទេសចរណ៍កម្ពុជា ក្នុងអំឡុងពេល និងក្រោយពេលវិបត្តិជំងឺកូវីដ ១៩។
សេចក្តីប្រកាសព័ត៌មានរបស់ក្រសួងទេសចរណ៍បានឲ្យដឹងថា ផែនទីចង្អុលផ្លូវត្រូវបង្កើតឡើងស្របពេលរដ្ឋាភិបាលអនុម័តផែនការមេអភិវឌ្ឍទេសចរណ៍ខេត្តសៀមរាប ២០២១-២០៣៥ ដោយកំណត់ចក្ខុវិស័យទាក់ទាញភ្ញៀវទេសចរជាតិ និងអន្តរជាតិចំនួន ១៨,៤ លាននាក់។
សេចក្តីប្រកាសព័ត៌មានបន្តថា ផែនទីចង្អុលផ្លូវ (Roadmap) ស្តីពីផែនការស្តារ និងលើកស្ទួយវិស័យទេសចរណ៍កម្ពុជាក្នងអំឡុងពេលនិងក្រោយវិបត្តិជំងឺកូវីដ ១៩ គឺជាអាទិភាពក្នុងការរួមចំណែកអភិវឌ្ឍន៍សេដ្ឋកិច្ចនិងសង្គមកម្ពុជា។
វិស័យទេសចរណ៍ ក៏ដូចជា វិស័យកាត់ដេរ សម្លៀកបំពាក់ សំណង់ ត្រូវបានទទួលរងផលប៉ះពាល់យ៉ាងខ្លាំងពីវិបត្តិជំងឺកូវីដ ១៩។
Roadmap នេះនឹងក្លាយជាត្រីវិស័យ និងជាផែនការយុទ្ធសាស្ត្រមួយដ៏សំខាន់ ដើម្បីធានានូវ វិធានការអន្តរាគមន៍ទាន់ពេលវេលានិងប្រែក្លាយវិបត្តិជំងឺកូវីដ ១៩ ទៅជាកាលានុវត្តភាពសម្រាប់ការកែទម្រង់ក្នុងវិស័យទេសចរណ៍កម្ពុជាឱ្យទៅជាគោលដៅទេសចរណ៍គុណភាព សុវត្ថិភាព និងនិរន្តរភាពក្នុងការទាញយកមកវិញនូវចំនួនភ្ញៀវទេសចរអន្តរជាតិ និងជំរុញសកម្មភាពទេសចរណ៍ក្នុងស្រុក។
ផែនការស្តារ និងលើកស្ទួយវិស័យទេសចរណ៍នេះ នឹងត្រូវអនុវត្តជា ៣ ដំណាក់កាល គឺដំណាក់កាលទី១ (Resilience & Restart) ការគ្រប់គ្រងវិបត្តិក្នុងដំណាក់កាលទម្លាប់ថ្មី (New Normal) និងរៀបចំផែនការសម្រាប់ការស្ដារឡើងវិញ (២០២១)។
ដំណាក់កាលទី២ (Recovery) គឺ ការស្ដារឡើងវិញនៃវិស័យទេសចរណ៍កម្ពុជា ក្រោយវិបត្តិជំងឺកូវីដ ១៩ (២០២២-២០២៣) និងដំណាក់កាលទី៣ (Relaunch) ការរៀបចំឆ្ពោះទៅកាន់អនាគតថ្មីនៃវិស័យទេសចរណ៍កម្ពុជា (២០២៤-២០២៥)។
ផែនទីចង្អុលផ្លូវនេះមានយុទ្ធសាស្រ្ដសរុបចំនួន ៩ សកម្មភាពយុទ្ធសាស្រ្ដចំនួន ៤៩ និងសកម្មភាពយុទ្ធសាស្រ្ដលម្អិតចំនួន ១៨០ រួមជាមួយគម្រោងកម្មវិធីអាទិភាពចំនួន ១៧។
ជាមួយគ្នានាយករដ្ឋមន្ត្រី ហ៊ុន សែន កាលពីថ្ងៃទី ៣០ ខែមីនា បានអនុម័តផែនការមេអភិវឌ្ឍន៍ទេសចរណ៍ខេត្តសៀមរាប ២០២១-២០៣៥។
ផែនការមេអភិវឌ្ឍន៍ទេសចរណ៍ខេត្តសៀមរាប មានគោលដៅធ្វើឱ្យខេត្តនេះអាចក្តាប់យកមកវិញនូវមោទនភាពជាគោលដៅទេសចរណ៍ចម្បងក្នុងប្រទេសកម្ពុជា និងក្នុងតំបន់អាស៊ីអាគ្នេយ៍ក្នុងរយៈពេលមធ្យម និងវែងខាងមុខ។
ផែនការមេនេះ បានកំណត់ចក្ខុវិស័យឱ្យខេត្តសៀមរាបទាក់ទាញភ្ញៀវទេសចរជាតិ និងអន្តរជាតិចំនួន ១៨,៤ លាននាក់ ក្នុងនោះភ្ញៀវទេសចរជាតិចំនួន ១០,៩ លាននាក់ និងទេសចរអន្តរជាតិចំនួន ៧,៥ លាននាក់។
ព្រមទាំងបង្កើតការងារប្រមាណ ៩៤ ម៉ឺននាក់ និងបង្កើតចំណូលហូរចូលក្នុងចរន្តសេដ្ឋកិច្ចខេត្តសៀមរាបប្រមាណ ៦ ពាន់លានដុល្លារ៕