ភ្នំពេញ: រដ្ឋាភិបាលកម្ពុជា និងអង្គការកម្មវិធីអភិវឌ្ឍន៍របស់អង្គការសហប្រជាជាតិ (UNDP) បានជំរុញឲ្យប្រជាកសិករដាំដំណាំដំឡូងមី ខណៈក្រសួងពាណិជ្ជកម្មកំពុងរៀបចំគោលនយោបាយជាតិវិនិយោគលើដំឡូងមីក្នុងគោលបំណងជំរុញផលិតកម្ម និងការនាំចេញ។
បើយោងតាមការសិក្សាស្រាវជ្រាវរបស់អង្គការ UNDP ស្តីពីការរៀបចំករណីវិនិយោគសម្រាប់ដំឡូងមីបានរកឃើញថា ការវិនិយោគលើដំណាំដំឡូងមី អាចទទួលបានផលច្រើនជាងការវិនិយោគក្នុងវិស័យផលិតកម្មស្រូវ ចិញ្ចឹមសត្វ ស្បៀងអាហារ និងវិស័យទេសចរណ៍។
របាយការណ៍ដដែលបានឲ្យដឹងថា កំណើនចំណូលពីសារពើពន្ធផ្ទាល់សម្រាប់វិស័យដំឡូងមីទទួលបានប្រមាណ ១៣០ លានដុល្លារក្នុងរយៈពេល ១០ ឆ្នាំដែលប្រហាក់ប្រហែលនឹងចំណូលពីស្រូវ ការចិញ្ចឹមសត្វ និងស្បៀងអាហារ។ លើកលែងតែវិស័យទេសចរណ៍ដែលបានផ្តល់ចំណេញច្រើនជាងគេគឺ ១៥១ លានដុល្លារ។
លោក លាង រ័ត្នម៉ាណា ប្រធានគម្រោងរបស់អង្គការ UNDP ថ្លែងក្នុងពិធីប្រកាសផ្សព្វផ្សាយរបាយការណ៍ស្តីពីការរៀបចំករណីការវិនិយោគសម្រាប់ដំឡូងមីរបស់អង្គការ UNDP កាលពីថ្ងៃសុក្រថា មាននិន្នាការកើនឡើងនូវតម្រូវការដំឡូងពីទីផ្សារពិភពលោក និងពីប្រទេសចិន ហើយរដ្ឋាភិបាល និងវិស័យឯកជនចាំបាច់ត្រូវវិនិយោគលើវិស័យដំឡូងមី។
លោកថ្លែងថា៖ «ការវិនិយោគ [ណាមួយដែលអាចធ្វើឡើង] គឺជាការលើកទឹកចិត្ត និងជួយប្រជាពលរដ្ឋដែលរស់នៅតាមតំបន់សមស្របក្នុងការដាំដំឡូងមីឲ្យគាត់ដាំដុះដំឡូងមី ហើយ [យករោងចក្រ] សម្រាប់កែច្នៃទៅដាក់នៅតំបន់សមស្របនោះ»។
លោកបន្ថែមថា៖ «ចំណុចខ្លាំងរបស់កម្ពុជាគឺទី ១ ផលិតកម្មយើងធំ ទី ២ យើងមានលទ្ធភាពពង្រីកផ្ទៃដីដាំដុះ ទី ៣ ដីដែលយើងប្រើប្រាស់ដាំដំឡូងមីនៅមានគុណភាពល្អ បើធៀបជាមួយថៃ និងវៀតណាម»។
បើយោងតាមរបាយការណ៍របស់អង្គការ UNDP ការអភិវឌ្ឍក្នុងវិស័យដំឡូងមី កម្ពុជាត្រូវការកញ្ចប់ថវិកាវិនិយោគសាធារណៈចំនួន ២៩៦ លានដុល្លារ ខណៈដែលការអភិវឌ្ឍក្នុងវិស័យនេះភាគច្រើនគឺមិនទាន់យកចិត្តទុកដាក់ខ្ពស់លើការកែច្នៃក្នុងប្រទេសនៅឡើយទេ។
ស្របពេលនេះដែរក្រសួងពាណិជ្ជកម្មក៏កំពុងរៀបចំគោលនយោបាយជាតិសម្រាប់វិស័យដំឡូងមីផងដែរក្នុងគោលបំណងជំរុញការនាំចេញ។
លោក ម៉ៅ ថូរ៉ា រដ្ឋលេខាធិការក្រសួងពាណិជ្ជកម្មបានថ្លែងក្នុងពិធីប្រកាសរបាយការណ៍នេះថា ការរៀបចំគោលនយោបាយនេះគឺដោយសារដំណាំដំឡូងមី គឺជាដំណាំកសិកម្មធំទី ២ បន្ទាប់ពីដំណាំស្រូវរបស់កម្ពុជា។
លោកថ្លែងថា៖ «យើងមើលឃើញថា ប្រជាពលរដ្ឋជាច្រើនបានដាំដំឡូងមីដែលមានជាងកន្លះលានគ្រួសារ។ វានឹងអាចជួយជីវភាពគាត់កាន់តែល្អប្រសើរដល់ពួកគាត់»។
ទាក់ទងនឹងឯកសារគោលនយោបាយនេះ លោកថ្លែងថា៖ «ឯកសារយើងបានដាក់ទៅកាន់ទីស្តីការគណៈរដ្ឋមន្ត្រីហើយដោយទីស្តីការគណៈរដ្ឋមន្ត្រីបានទទួលឯកភាពលើខ្លឹមសារ ប៉ុន្តែមិនទាន់ឆ្លងទីស្តីការនៅឡើយទេ ដោយសារឯកសារមិនទាន់ត្រូវតាមលក្ខខណ្ឌកំណត់របស់រដ្ឋាភិបាល»។
លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំបានប្រាប់ភ្នំពេញប៉ុស្តិ៍ថា សម្រាប់ខេត្តនេះការដាំដុះដំឡូងមីនៅឆ្នាំនេះ មានចំនួន ៥ ម៉ឺនហិកតាដោយទទួលបានទិន្នផលប្រហែល ១ លានតោនក្នុង ១ ឆ្នាំ។ លោកបន្ថែមថា ទីផ្សារដំឡូងមីរបស់កសិករភាគច្រើនលក់ទៅទីផ្សារនៅប្រទេសវៀតណាម។ លោកបន្តថា តម្លៃដំឡូងមីសម្រាប់ខេត្តត្បូងឃ្មុំអាចមានក្នុងរង្វង់ ៣៤០ រៀលក្នុង ១ គីឡូក្រាមនៅដើមរដូវប្រមូលផលឆ្នាំនេះ។
លោកថ្លែងថា៖« ដើម្បីទទួលបានទិន្នផលខ្ពស់មន្ទីរបានផ្សព្វផ្សាយដល់កសិករដាំដំឡូងមីឲ្យត្រូវចេះជ្រើសរើសពូជ ការថែទាំ ហើយមន្ទីរក៏បានជំរុញឲ្យកសិកររៀបចំថ្នាលសម្រាប់បណ្តុះពូជដំឡូង ដោយសារពូជដំឡូងមីមួយចំនួននាំចូលពីក្រៅមក»។
ទោះយ៉ាងណាលោកអះអាងថា បញ្ហាប្រឈមរបស់កសិករគឺជំងឺកើតលើដំឡូងមី និងគ្រោះរាំងស្ងួតជាដើម។ លោកថា៖ «យើងកំពុងចងក្រងកសិករជាក្រុម ដើម្បីលក់ដំឡូងទៅឲ្យអ្នកប្រមូលទិញតាមរយៈតម្លៃព្រមព្រៀងគ្នាណាមួយតាមទីផ្សារជាក់ស្តែង»។
របាយការណ៍នេះបានបង្ហាញទៀតថា ដើម្បីសម្រេចបាននូវគោលដៅសម្រាប់វិស័យនេះចាំបាច់ត្រូវមានកិច្ចអន្តរាគមន៍ពីវិស័យសាធារណៈតាមរយៈការផ្តល់ធនធាន ដើម្បីគាំទ្រដល់ការដាំដុះ ការកែច្នៃ និងស្វែងរកទីផ្សារ និងការអនុវត្តគម្រោងកសាងហេដ្ឋារចនាសម្ព័ន្ធគាំទ្រជាដើម។
តាមទិន្នន័យរបស់ក្រសួងពាណិជ្ជកម្ម ការនាំចេញដំឡូងមីរបស់កម្ពុជាមានតម្លៃ ១៧,៨ លាន ដុល្លារក្នុងឆ្នាំ ២០១៧ ខណៈការនាំចេញនៅឆ្នាំ ២០១៨ បានធ្លាក់មកត្រឹម ១២,៦ លានដុល្លារ៕ LA
វីដេអូ៖