.jpg)
លោក ស៊ុយ សែម ក្នុងកិច្ចប្រជុំក្រុមប្រឹក្សាធុរកិច្ចអាមេរិក-អាស៊ានកាលពីសប្តាហ៍មុន។ រូបថត សហការី
ភ្នំពេញ: អគ្គនាយកទទួលបន្ទុកអគ្គនាយកដ្ឋានប្រេងកាតនៃក្រសួងរ៉ែ និងថាមពលបានឱ្យដឹងថា កម្ពុជាត្រៀមខ្លួនរួចរាល់ក្នុងការចរចាជាមួយសមភាគីថៃអំពីការបែងចែកអត្ថប្រយោជន៍នៃតំបន់ដែលអះអាងថាត្រួតស៊ីគ្នា (OCA) នៅក្នុងឈូងសមុទ្រថៃ។
លោក ជៀប សួរ អគ្គនាយកទទួលបន្ទុកអគ្គនាយកដ្ឋានប្រេងកាតនៃក្រសួងរ៉ែ និងថាមពលបានប្រាប់ភ្នំពេញ ប៉ុស្ដិ៍ កាលពីថ្ងៃចន្ទថា រហូតមកដល់ពេលនេះក្រសួងកំពុងរង់ចាំការឆ្លើយតបពីភាគីថៃ ដើម្បីចាប់ផ្ដើមការចរចាឡើងវិញអំពី OCA ដើម្បីពន្លឿនអត្ថប្រយោជន៍របស់ប្រទេសទាំង ២។
លោកបានឱ្យដឹងថា រដ្ឋមន្ដ្រីក្រសួងរបស់លោកបានជូនដំណឹងដល់ក្រុមហ៊ុនអាមេរិកមួយចំនួនរួចហើយ ដែលបានចូលរួមនៅក្នុងកិច្ចប្រជុំក្រុមប្រឹក្សាធុរកិច្ចអាមេរិក អាស៊ាន ស្ដីពីថាមពលតាមរយៈវីដេអូខន់ហ្វើរិនថា ភាគីកម្ពុជាស្វាគមន៍ការចរចានេះកាលពីសប្តាហ៍មុន។
លោកថ្លែងថា៖ «លោករដ្ឋមន្ដ្រីរបស់ខ្ញុំបានជូនដំណឹងដល់ក្រុមហ៊ុនអាមេរិកទាំងអស់ដែលបានចូលរួមនៅក្នុងកិច្ចប្រជុំក្រុមប្រឹក្សាធុរកិច្ចអាមេរិក-អាស៊ានថា កាលពីសប្តាហ៍មុនយើងបានធ្វើការងារជាមួយរដ្ឋមន្ដ្រីថាមពលរបស់ប្រទេសថៃ នៅឯកិច្ចប្រជុំរដ្ឋមន្ដ្រីក្រសួងថាមពលអាស៊ានកាលពីឆ្នាំ ២០១៩ ហើយក្រោយមកយើងបានបន្តធ្វើការងារជាមួយពួកគេដើម្បីបង្កើនល្បឿនការងារនេះ»។
ទោះយ៉ាងណាលោក ជៀប សួរ បានឱ្យដឹងថាថ្មីៗនេះ រដ្ឋមន្ដ្រីក្រសួងថាមពលថៃបានផ្លាស់ប្តូរ ដូច្នេះភាគីកម្ពុជានឹងបន្តការងារជាមួយរដ្ឋមន្ដ្រីថ្មីទៅលើរបាយការណ៍ដែលបានពិភាក្សាគ្នារួច ហើយជាមួយអតីតរដ្ឋមន្ដ្រី «នៅពេលនេះយើងមិនដឹងថា តើរដ្ឋមន្ដ្រីថាមពលថ្មីរបស់ប្រទេសថៃនឹងបន្តការចរចាជាថ្មីទៅលើឯកសារមុននោះ ឬយ៉ាងណានោះទេ ឬក៏លោកនឹងត្រូវការពេលវេលាក្នុងការសិក្សាបន្ថែមលើឯកសារទាំងនោះឡើងវិញ»។
លោកលើកឡើងថា៖ «នៅពេលនេះ ដូចយើងដឹងហើយថានៅប្រទេសថៃគឺមានបញ្ហាផ្ទៃក្នុងទាក់ទង និងស្ថានការណ៍សង្គម និងនយោបាយ ដូច្នេះយើងមិនទាន់បានកំណត់ពេលវេលាណាមួយសម្រាប់កិច្ចប្រជុំបន្ទាប់នោះទេ ហើយនៅពេលនេះយើងរង់ចាំមើលពីភាគីថៃ»។
កាលពីខែកញ្ញា ឆ្នាំ ២០១៩ លោក ស៊ុយ សែម បានជួបពិភាក្សាជាមួយលោករដ្ឋមន្ដ្រីក្រសួងថាមពលថៃ Sontirat Sontijirawong នៅក្រៅជំនួបកិច្ចប្រជុំថ្នាក់រដ្ឋមន្ដ្រីអាស៊ានលើកទី ៣៧ ស្ដីពីថាមពលនៅទីក្រុងបាងកក ដោយភាគីទាំង ២ បានឯកភាពគ្នាក្នុងការបន្តកិច្ចពិភាក្សា និងស្វែងរកដំណោះស្រាយនៅក្នុង OCA រវាងប្រទេសកម្ពុជា និងថៃ។
ការអភិវឌ្ឍទៅលើតំបន់ OCA ដែលមានប្រវែង ២៦ ០០០ គីឡូម៉ែត្រការ៉េ ដែលត្រួតស៊ីគ្នានៅព្រំដែនកម្ពុជា និងថៃនៅឈូងសមុទ្រថៃជាចំណុចវិវាទរវាងប្រទេសជិតខាងគ្នាទាំង ២ នេះដែលបានអះអាងយកតំបន់នេះរៀងៗខ្លួនចាប់តាំងពីដើមទសវត្សរ៍ឆ្នាំ ១៩៧០។
អនុស្សរណៈនៃការយោគយល់គ្នា ដើម្បីរុករករួមគ្នានៅតំបន់នេះត្រូវបានចុះហត្ថលេខាកាលពីឆ្នាំ ២០០១ ប៉ុន្តែក្រោយមកត្រូវបានផ្អាកដំណើរការដោយរដ្ឋាភិបាលថៃកាលពីឆ្នាំ ២០០៩។ ការចរចាលើកិច្ចព្រមព្រៀងរួមដើម្បីស្វែងរកតំបន់នេះបានកើតឡើងជាថ្មីនៅពេលលោកស្រី Yingluck Shinawatra អតីតនាយករដ្ឋមន្ដ្រីថៃបានឡើងកាន់អំណាចកាលពីឆ្នាំ ២០១១។
ក្រោយពីការផ្តួលរំលំរដ្ឋាភិបាលលោកស្រី Yingluck កាលពីខែឧសភា ឆ្នាំ ២០១៤ ក្រុមមេដឹកនាំរបស់ប្រទេសទាំង ២ បានស្វែងរកការបន្តការចរចានេះឡើងវិញ។
OCA ត្រូវបានប៉ាន់ប្រមាណថា នឹងមានកំណប់ប្រេង និងឧស្ម័នរហូតដល់ ៥០០ លានបារ៉ែលដែលស្ថិតនៅក្រោមបាតសមុទ្រ។
បើយោងតាមអត្ថបទរបស់ទីភ្នាក់ងារថាមពលអន្តរជាតិ (IEA) អំពីចក្ខុវិស័យថាមពលអាស៊ីអាគ្នេយ៍ខែកញ្ញា ឆ្នាំ ២០១៣ បានឱ្យដឹងថា ការផលិតឧស្ម័នរបស់ប្រទេសថៃត្រូវបានរំពឹងថា នឹងធ្លាក់ចុះ ៧៥ ភាគរយ ត្រឹមឆ្នាំ ២០៣៥ ខណៈដែលតម្រូវការឧស្ម័នធម្មជាតិក្នុងស្រុកត្រូវបានរំពឹងថានឹងកើនឡើងក្នុងអំឡុងពេលនោះ។
IEA ក៏បានលើកឡើងពីដំណោះស្រាយនៃជម្លោះរយៈពេលយូររវាងប្រទេសកម្ពុជា និងប្រទេសថៃ លើតំបន់ OCA ដែលនឹងជាទ្រព្យសកម្មដ៏មានតម្លៃ និងមានរយៈពេលយូរចំពោះចក្ខុវិស័យថាមពលរបស់ប្រទេសថៃ ដល់ឆ្នាំ ២០៣៥៕ LA
