ភ្នំពេញ: រដ្ឋាភិបាលកម្ពុជាកំពុងសិក្សាលទ្ធភាពបង្កើតកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា និងម៉ុងហ្គោលីដែលជាការខិតខំប្រឹងប្រែងរបស់រដ្ឋាភិបាលក្នុងការធ្វើពិពិធកម្មទីផ្សារនៅក្នុងតំបន់ និងពិភពលោកក្នុងអំឡុងពេល និងក្រោយពេលនៃការរីករាលដាលជាសកលនៃជំងឺកូវីដ ១៩។
មន្ត្រីអន្តរក្រសួងមកពីក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្មរុក្ខាប្រមាញ់ និងនេសាទ ក្រសួងការងារ និងបណ្ដុះបណ្ដាលវិជ្ជាជីវៈ និងក្រុមប្រឹក្សាអភិវឌ្ឍន៍កម្ពុជាបានជួបប្រជុំនៅដើមសប្តាហ៍នេះ ក្រោមកិច្ចសម្របសម្រួលរបស់លោក រាជ រ៉ា រដ្ឋលេខាធិការក្រសួងពាណិជ្ជកម្ម ដើម្បីពិនិត្យលើទស្សនទាននៃការសិក្សាស្រាវជ្រាវពីលទ្ធភាពបង្កើតកិច្ចព្រមព្រៀងពាណិជ្ជកម្មសេរីនេះ។
លោក រាជ រ៉ា បានលើកឡើងថា កិច្ចប្រជុំនេះធ្វើឡើងក្នុងគោលបំណងដើម្បីពិភាក្សា និងប្រមូលធាតុចូលពីសមាជិកក្រុមការងារអន្តរក្រសួងលើឯកសារទស្សនទានដែលរៀបចំដោយវិទ្យាស្ថានស្រាវជ្រាវសេដ្ឋកិច្ចសម្រាប់បណ្តាប្រទេសអាស៊ីអាគ្នេយ៍ និងអាស៊ីបូព៌ា (ERIA)។
លោកថ្លែងថា៖ «យើងនឹងជំរុញឲ្យក្រុមការងារបន្តខិតខំប្រឹងប្រែងដើម្បីឲ្យការសិក្សាលទ្ធភាពបង្កើតកិច្ចព្រមព្រៀងពាណិជ្ជកម្មសេរីនេះទទួលបានជោគជ័យ។ ខ្ញុំសង្ឃឹមយ៉ាងមុតមាំថាកិច្ចប្រជុំជាមួយវិទ្យាស្ថាន ERIA នឹងទទួលបានលទ្ធផលផ្លែផ្កា»។
លោក ប៉ែន សុវិជាតិ អ្នកនាំពាក្យឆ្លាស់វេននៃក្រសួងពាណិជ្ជកម្មប្រាប់ភ្នំពេញប៉ុស្តិ៍កាលពីថ្ងៃពុធថា ការសិក្សាលទ្ធភាពបង្កើតកិច្ចព្រមព្រៀងពាណិជ្ជកម្មសេរីនេះដែលជាវិធានការអនុវត្តគោលនយោបាយ និងយុទ្ធសាស្ត្រសមាហរណកម្មពាណិជ្ជកម្មរបស់កម្ពុជា ដើម្បីធ្វើពិពិធកម្មទីផ្សារនៅក្នុងតំបន់ និងពិភពលោក។
លោកបន្តថា សព្វថ្ងៃក្រសួងពាណិជ្ជកម្មកំពុងចរចាពាណិជ្ជកម្មជាមួយកូរ៉េខាងត្បូង និងកំពុងរៀបចំសិក្សាលទ្ធភាពបង្កើតកិច្ចព្រមព្រៀងពាណិជ្ជកម្មជាមួយតំបន់សហភាពសេដ្ឋកិច្ចអឺរ៉ុប-អាស៊ី (EAEU) រួមមាន សាធារណរដ្ឋអាមេនី សាធារណរដ្ឋបេឡារុស សាធារណរដ្ឋកាហ្សាក់ស្ថាន សាធារណរដ្ឋកៀហ្ស៊ីស៊ីស្ថាន និងសហព័ន្ធរុស្ស៊ី។
លោកថ្លែងថា៖ «យើងបាន និងកំពុងខិតខំប្រឹងប្រែងពង្រីកទីផ្សារថ្មីបន្ថែមទៀត។ យើងជាប្រទេសមានសក្តានុពលផ្នែកកសិកម្ម ដែលមានលទ្ធភាពច្រើនក្នុងការពង្រីកកសិកម្មយើងទៅជាកសិឧស្សាហកម្ម។ យើងគិតថា យើងមានលទ្ធភាពនាំចេញផលិតផលកសិកម្មទៅកាន់ទីផ្សារពិភពលោកក្នុងនោះក៏មានម៉ុងហ្គោលីផងដែរ»។
កាលពីឆ្នាំ ២០១៤ ប្រទេសកម្ពុជា និងម៉ុងហ្គោលីបានចុះអនុស្សរណៈយោគយល់គ្នា (MoU) ស្តីពីការបង្កើតនៃពិគ្រោះយោបល់ទ្វេភាគីក្នុងបំណងដើម្បីពង្រឹងកិច្ចសហប្រតិបត្តិការទ្វេភាគីលើវិស័យសេដ្ឋកិច្ច ពាណិជ្ជកម្ម វិនិយោគ និងទេសចរណ៍។
ក្រៅពីកិច្ចព្រមព្រៀងពាណិជ្ជកម្មសេរីជាមួយចិន និងកូរ៉េខាងត្បូង រដ្ឋាភិបាលកម្ពុជាក៏កំពុងសម្លឹងមើលពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរីជាមួយប្រទេសឥណ្ឌា អូស្ត្រាលី អាមេរិក កាណាដា ចក្រភពអង់គ្លេស នូវែលសេឡង់ និងជប៉ុន។
យោងតាមរបាយការណ៍របស់ធនាគារពិភពលោក រដ្ឋាភិបាលកម្ពុជាត្រូវត្រៀមខ្លួនឲ្យបានល្អសម្រាប់ស្តារសេដ្ឋកិច្ចឲ្យរើបឡើងវិញក្រោយជំងឺកូវីដ១៩ដែលចាំបាច់ផ្តោតការយកចិត្តទុកដាក់ឲ្យបានដិតដល់លើការវិនិយោគក្នុងតំបន់ និងពង្រីកលទ្ធភាពធ្វើពាណិជ្ជកម្មដែលកើតចេញពីកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា-ចិន ដោយមានភាពចាំបាច់គួរធ្វើដើម្បីសម្រួលដល់ការវិនិយោគក្នុងស្រុក និងបរទេស បង្កើនតម្លៃបន្ថែមក្នុងស្រុក និងបង្កើតការងារធ្វើថែមទៀត៕ LA