The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ទទួល​ចំណាត់​ថ្នាក់​ខ្ពស់​នៃ​ប្រាក់​ចំណូល​ក្នុង​ចំណោម CLMV

កម្ពុជា​ទទួល​ចំណាត់​ថ្នាក់​ខ្ពស់​នៃ​ប្រាក់​ចំណូល​ក្នុង​ចំណោម CLMV

ការ​អភិវឌ្ឍ​ផលិតកម្ម​ក្នុង​ស្រុក​គឺជា​ចលករ​ដ៏​សំខាន់​នៃ​កំណើន​សេដ្ឋកិច្ច​ជាតិ។
ការ​អភិវឌ្ឍ​ផលិតកម្ម​ក្នុង​ស្រុក​គឺជា​ចលករ​ដ៏​សំខាន់​នៃ​កំណើន​សេដ្ឋកិច្ច​ជាតិ។ ម៉ៃ វីរៈ

កម្ពុជា​ទទួល​ចំណាត់​ថ្នាក់​ខ្ពស់​នៃ​ប្រាក់​ចំណូល​ក្នុង​ចំណោម CLMV

ភ្នំពេញ:កម្ពុជា​បាន​ទទួល​ចំណាត់​ថ្នាក់​នាំ​មុខ​ចំពោះ​ការ​ត្រៀម​ខ្លួន​អភិវឌ្ឍ​ក្នុង​ចំណោម​ប្រទេស​ដែល​មាន​ចំណូល​ទាប​កម្រិត​មធ្យម​ទាំង​បួន​នៅ​អាស៊ី​អាគ្នេយ៍ កម្ពុជា ឡាវ វៀតណាម និង​មីយ៉ាន់ម៉ា (CLVM)។ នេះ​បើ​យោង​តាម​របាយការណ៍​សន្ទស្សន៍​ត្រៀម​ខ្លួន​ផ្លាស់​ប្តូរ​ដែល​បាន​ចេញ​ផ្សាយ​កាល​ពី​ដើម​សប្តាហ៍​នេះ​ដោយ​ក្រុមហ៊ុន KPMG ដែល​ជា​ក្រុមហ៊ុន​សវនកម្ម​អន្តរជាតិ​មួយ។

ក្នុង​ចំណោម​ប្រទេស​ចំនួន​ ១២៧ ក្នុង​ការ​អង្កេត​នេះ កម្ពុជា ជាប់​ក្នុង​ចំណាត់​ថ្នាក់​កំពូល​ ៥០ នៅ​ក្នុង សន្ទស្សន៍​ត្រៀម​ខ្លួន​ផ្លាស់​ប្តូរ ពោល​គឺជា​ចំណាត់​ថ្នាក់​នាំ​មុខ​មួយ​ក្នុង​ចំណោម​ប្រទេស​មាន​ប្រាក់​ចំណូល​ទាប​កម្រិត​មធ្យម បន្ទាប់​មក​ប្រទេស​មីយ៉ាន់ម៉ា ដែល​បាន​ជាប់​ចំណាត់​ថ្នាក់​ទី ​៩៧ និង​វៀតណាម​ជាប់​ចំណាត់​ថ្នាក់​ទី​ ៩៨ និង​ឡាវ ជាប់​ចំណាត់​ថ្នាក់​ទី​ ១១៥។

ចំណាត់​ថ្នាក់​នេះ​ត្រូវ​បាន​កំណត់​ដោយ​ពិន្ទុ​របស់​ប្រទេស​នីមួយៗ​ស្តីពី​សមត្ថភាព​សហគ្រាស សមត្ថភាព​រដ្ឋាភិបាល​ស្តីពី​បរិយាកាស​ធុរកិច្ច​នៅ​ប្រទេស​មួយ មាន​ដូច​ជា ចក្ខុវិស័យ​សារ​ពើពន្ធ ច្បាប់ ​សន្តិសុខ ​មនុស្ស​និង​សមត្ថភាព​សង្គម​ស៊ីវិល គ្រឹះ​ស្ថាន​សង្គម​ស៊ីវិល កម្រិត​កំណើន វិស័យ​អប់រំ លទ្ធភាព​ទទួល​បាន​សេវា​សុខាភិបាល និង​ប្រើប្រាស់​បច្ចេកវិទ្យា។

កម្ពុជា​ទទួល​បាន​ចំណាត់​ថ្នាក់​ទី​៣៤​ផ្នែក​សមត្ថភាព​សហគ្រាស ចំណាត់​ថ្នាក់​ទី ៥១ ផ្នែក​សមត្ថភាព​រដ្ឋាភិបាល និង​ចំណាត់​ថ្នាក់​ទី៦៩ ផ្នែក​សមត្ថភាព​មនុស្ស និង​សង្គម​ស៊ីវិល ធៀប​នឹង​ប្រទេស​ចំនួន ១២៧ មក​ពី​ជុំវិញ​ពិភពលោក។

របាយការណ៍​នេះ បាន​បន្ត​ឲ្យ​ដឹង​ទៀត​ថា៖«ប្រទេស​នានា ដែល​មាន​ពិន្ទុ​ត្រៀម​ខ្លួន​ផ្លាស់​ប្តូរ​ខ្ពស់​ជាង​ការ​រំពឹង​ទុក​ដោយ​ផ្អែក​លើ​ចំណូល​សរុប​ក្នុង​មនុស្ស​ម្នាក់ៗ មាន​ប្រទេស​ម៉ូហ្សំប៊ិក ប្រទេស​រ្វ៉ាន់ដា ប្រទេស​អ៊ូហ្គង់ដា និង​កម្ពុជា»។

របាយការណ៍​នេះ​បាន​សរសេរ​ថា​៖ «កម្ពុជា​នាំ​មុខ​ប្រទេស​មាន​ប្រាក់​ចំណូល​ទាប​នានា ដោយ​ខ្ពស់​ជាង ១៥​ចំណាត់​ថ្នាក់​ធៀប​នឹង​ប្រទេស​ផ្សេង​ទៀត​នៅ​ក្នុង​តារាង។ សមិទ្ធផល​នេះ​គឺ​ទទួល​បាន​ជា​ចម្បង​ដោយ​សារ​ចំណាត់​ថ្នាក់​ទី​ ៣៤ នៃ​សសរ​ស្តុម្ភ​សហគ្រាស ដោយ​មាន​ចំណាត់​ថ្នាក់​ទី៤ ក្នុង​អនុសន្ទស្សន៍​ពិពិធកម្ម​សេដ្ឋកិច្ច និង​ចំណាត់​ថ្នាក់​ទី១ នៅ​ក្នុង​សន្ទស្សន៍​វិស័យ​ក្រៅ​ផ្លូវ​ការ។ កម្ពុជា​អាច​នឹង​ក្លាយ​ជា​ប្រទេស​ថ្មី​មួយ​ក្នុង​ចំណោម​ប្រទេស​ដែល​មាន​ការ​អភិវឌ្ឍ​ខ្លាំង​នៅ​អាស៊ី ដោយ​ផ្លាស់​ប្តូរ​ពី​ប្រទេស​មាន​ប្រាក់​ចំណូល​ទាប​ទៅ​ជា​ទីផ្សារ​កំពុង​លូត​លាស់​ខ្លាំង។

ទោះជា​វៀតណាម និង​ឡាវ​មិន​ត្រូវ​បាន​ផ្តល់​ព័ត៌មាន​លម្អិត​ក្នុង​របាយការណ៍​នេះ​ក្តី ក៏​អ្វី​ដែល​គួរ​ឲ្យ​កត់​សម្គាល់​នោះ​គឺ​ចំណាត់​ថ្នាក់​របស់​មីយ៉ាន់ម៉ា​បាន​ធ្លាក់​ចុះ​ពី​៥២ ទល់​៧២​ក្នុង​សន្ទស្សន័ CRI កាលពី​ឆ្នាំ​២០១៣។

លោក Trevor Davies នាយក​ប្រតិបត្តិ IDAS Center of Excellence នៃ​ក្រុមហ៊ុន KPMG International ត្រូវ​បាន​ដក​ស្រង់​សម្ដី​ដោយ​គេហទំព័រ Consultant News ដែល​មាន​មូលដ្ឋាន​នៅ​ទីក្រុង​ញូវយ៉ក​ថា៖ «ប្រទេស​ផ្សេង​ទៀត ដូចជា កម្ពុជា និង​រ៉្វាន់ដា បង្ហាញ​ពី​វឌ្ឍនភាព​ក្នុង​វិស័យ​នានា ដែល​សម្រេច​បាន​តាមរ​យៈ​កិច្ច​ប្រឹងប្រែង​របស់​សហគមន៍​អភិវឌ្ឍន៍​សកល​លោក ធ្វើ​ការងារ​ទាក់​ទង​នឹង​រដ្ឋាភិបាល​ថ្នាក់​ជាតិ និង​ថ្នាក់​មូលដ្ឋាន ដើម្បី​ធ្វើ​ឲ្យ​មាន​ការ​ផ្លាស់​ប្តូរ​ដោយ​វិជ្ជមាន​ប្រកប​ដោយ​ប្រសិទ្ធភាព»។

លោក ស្រី ចន្ឋី អ្នក​វិភាគ​សេដ្ឋកិច្ច​ឯករាជ្យ បាន​ឲ្យ​ដឹង​ដែរ​ថា ​ចំពោះ​ភាព​នាំ​មុខ​គេ​របស់​កម្ពុជា​ធៀប​ទៅ​បណ្តា​ CLMV គឺ​បាន​ឆ្លុះ​បញ្ចាំង​អំពី​សមិទ្ធផល​កំណែ​ទម្រង់​របស់​រដ្ឋាភិបាល​នាពេល​កន្លង​មក។

តំណាងរាស្ត្រ​គណបក្ស​សង្គ្រោះ​ជាតិ លោក​ សុន ឆ័យ កាលពី​ម្សិលមិញ​បាន​ស្វាគមន៍​ចំពោះ​ចំណាត់​ថ្នាក់​ល្អ​ដែល​កម្ពុជា​បាន​នាំ​មុខ​គេ​ក្នុង​ចំណោម​ប្រទេស​កម្ពុជា មីយ៉ាន់ម៉ា និង​វៀតណាម ដោយ​បាន​លើក​ឡើង​ថា ចំណាត់​ថ្នាក់​នេះ​នឹង​ជួយ​លើក​ទឹក​ចិត្ត​ដល់​ការងារ​កំណែទម្រង់​បន្ថែម​និង​ការ​ធ្វើ​ពិពិធកម្ម សេដ្ឋកិច្ច​បន្ថែម​ទៀត​ពី​រដ្ឋាភិបាល តែ​បាន​និយាយ​ថា កម្រិត​ត្រៀម​ខ្លួន​របស់​កម្ពុជា​ដើម្បី​ឈាន​ទៅ​ជា​ប្រទេស​មាន​សេដ្ឋកិច្ច​ចំណូល​មធ្យម​នៅ​មាន​កម្រិត។

លោក​ថា៖ «យន្តការ​នឹង​រៀបចំ​សម្រាប់​សេដ្ឋកិច្ច​កម្ពុជា​ទៅ​ជា​សេដ្ឋកិច្ច​មាន​ប្រាក់​ចំណូល​មធ្យម​នៅ​មាន​កម្រិត។ ធៀប​នឹង​ប្រទេស​វៀតណាម បើ​ទោះ​បី​ជា​បាន​ទទួល​ចំណោម​ថ្នាក់​ទាប​ជាង​កម្ពុជា តែ​សេដ្ឋកិច្ច​វៀតណាម​មាន​រចនា​សម្ព័ន្ធ​រឹងមាំ​ជាង​កម្ពុជា»។

យោង​តាម​របាយការណ៍​យុទ្ធសាស្ត្រ​កៀរគរ​ចំណូល​រយៈពេល​មធ្យម ២០១៤-២០១៨ របស់​រដ្ឋាភិបាល​ឲ្យ​ដឹង​ថា កម្ពុជា​សម្រេច​បាន​នូវ​កំណើន​សេដ្ឋកិច្ច​ខ្ពស់​ជា​មធ្យម​ប្រមាណ​៨​ភាគរយ​ក្នុង​មួយ​ឆ្នាំ​ដែល​អាច​ជួយ​កាត់​បន្ថយ​នូវ​អត្រា​ភាពក្រីក្រ​បាន​ប្រមាណ​២​ភាគ​រយ​ក្នុង​មួយ​ឆ្នាំ។

របាយការណ៍​នេះ​សរសេរ​ថា៖ «ដើម្បី​បន្ត​ធានា​ឲ្យ​បាន​នូវ​ចីរភាព និង​វឌ្ឍនភាព​ទាំង​នេះ ក្នុង​ទិសដៅ​ប្រែ​ក្លាយ​កម្ពុជា​ឲ្យ​ទៅ​ជា​ប្រទេស​មាន​ចំណូល​មធ្យម​កម្រិត​ខ្ពស់​នៅ​ឆ្នាំ​២០៣០ [ចំណូល​ក្នុង​មនុស្ស​ម្នាក់ៗ​មាន​ប្រមាណ​ ៤០០០ ទៅ​ ៥០០០ ដុល្លារ]»៕ BP/KC

អត្ថបទគួរចាប់អារម្មណ៍

  • លោក អូន ព័ន្ធមុនីរ័ត្ន សុំ​ឲ្យ​​អ្នក​ការ៉ាតេ រួម​គ្នា ដើម្បី​ឆ្ពោះ​ទៅ​រក​ភាព​ជោគជ័យ

    ភ្នំពេញ៖ ​លោក​អគ្គ​បណ្ឌិតសភាចារ្យ អូន ព័ន្ធមុនីរ័ត្ន ឧបនាយក​រដ្ឋមន្រ្តី រដ្ឋមន្រ្តី​ក្រសួង​សេដ្ឋកិច្ច និង​ហិរញ្ញវត្ថុ ​បាន​​ជំរុញ​ឲ្យ​​ថ្នាក់​ដឹកនាំ​គ្រូ​បង្វឹក និង​ក្រុម​អត្តពលិក​ព្រម​ទាំង​ភាគី​ពាក់ព័ន្ធ​ផ្សេង​ទៀត រួបរួម​គ្នា​ជួយ​អភិវឌ្ឍ​វិស័យ​កីឡា​ការ៉ាតេ​ឲ្យ​កាន់​តែ​មាន​ភាព​រីក​ចម្រើន និង​មាន​គុណភាព

  • សាឡង់​​បំពាក់​ថាមពល​សូឡា ​ផ្ដើម​ប្រមាញ់​ប្លាស្ទិក​លើ​ដង​ទន្លេ​ម៉ាឡេស៊ី​

    ក្រុង​គូឡាឡាំពួ៖ ដោយ​មាន​សមត្ថភាព​ដង​សំរាម​ចេញ​ពី​ទន្លេ​ម៉ាឡេស៊ី​ ដើម្បី​បញ្ឈប់​ការ​ហូរ​ចូល​សមុទ្រ សាឡង់​បំពាក់​ថាមពល​សូឡា​ឈ្មោះ «​អ្នក​រារាំង​» គឺ​ជា​អាវុធ​ចុង​ក្រោយ​បំផុត​ក្នុង​ការ​ប្រយុទ្ធ​ប្រឆាំង​នឹង​កាក​សំណល់​ប្លាស្ទិក​លើ​ផ្ទៃ​ទឹក​នៅ​ជុំវិញ​ពិភព​លោក​។

  • សហភាព​អឺរ៉ុប​ ស្នើ​ឲ្យ​មីយ៉ាន់ម៉ាចាត់​វិធានការ​ទៅ​លើ​អំពើ​ឧក្រិដ្ឋកម្ម​សង្គ្រាម

    ក្រុង​យ៉ាំងហ្គោន៖ កាល​ពី​ថ្ងៃ​ចន្ទ​ សហភាព​អឺរ៉ុប​បាន​អំពាវនាវ​ឲ្យ​រដ្ឋាភិបាល​មីយ៉ាន់ម៉ា​ ធ្វើ​តាម​​​​របាយការណ៍​មួយ​​របស់​គណៈកម្មាធិការ​អន្តរជាតិ​ដែល​បាន​បង្កើត​ឡើង​ដោយ​រដ្ឋាភិបាល​ ដែល​​បាន​​ឃើញ​​អំពើ​​​ឧក្រិដ្ឋកម្ម​សង្គ្រាម​ និង​ការ​រំលោភ​សិទ្ធិ​មនុស្ស​យ៉ាង​ធ្ងន់ធ្ងរ​ ត្រូវ​បាន​ធ្វើ​ឡើង​នៅ​ក្នុង​រដ្ឋ​រ៉ាក់ឃីន​កាល​ពី​ឆ្នាំ ​២០១៧​ កន្លង​ទៅ​។​

  • ផ្សារហ៊ុន​អាស៊ី​បន្ត​ធ្លាក់​ថ្លៃ ដោយសារ​ក្តីបារម្ភ​វីរុស​កូរ៉ូណា

    ក្រុងហុងកុងៈ ផ្សារហ៊ុន​អាស៊ី​បាន​ធ្លាក់ចុះ​ជាថ្មី​កាលពី​ថ្ងៃ​អង្គារ​ដែល​បន្ត​លក់​ចេញ​ភាគហ៊ុន​នៅ​ទូទាំង​ពិភពលោក ខណៈ​ដែល​ចំនួន​អ្នកស្លាប់​ដោយសារ​តែ​ការរីករាលដាល​យ៉ាង​រហ័ស​នៃ​វីរុស​ក្នុងប្រទេស​ចិន​បាន​កើនឡើង​ដល់​ជាង ១០០ នាក់ និង​រាប់ពាន់នាក់​ឆ្លង​ជំងឺ​ស្រប​ពេលដែល​ក្រុម​វិនិយោគិន​បារម្ភ​ពី​ផលប៉ះពាល់​លើ​សេដ្ឋកិច្ច​ពិភពលោក​ដែល​ចុះខ្សោយ​រួច​ទៅ​ហើយ​នោះ​។