.jpg)
សកម្មភាពដំឡើងចង្វាក់ផលិតកម្មស្វ័យប្រវត្តិនៃរោងចក្រ ១ នៅភ្នំពេញ នាពេលកន្លងមក។ រូបថត ហុង មិនា
ភ្នំពេញ: ខណៈពេលដែលការរីករាលដាលនៃជំងឺកូវីដ ១៩ កំពុងជះឥទ្ធិពលអវិជ្ជមានដល់សេដ្ឋកិច្ច សកល និងតំបន់បង្កប៉ះពាល់ដល់តម្រូវការ និងខ្សែចង្វាក់ផលិតកម្មកម្ពុជានៅតែបន្តទទួលបានការវិនិយោគថ្មីបន្ថែមទៀត។
រោងចក្រថ្មីចំនួន ៧៧ បានបើកដំណើរការស្របពេលរោងចក្រចំនួន ៦ បានបិទទ្វារដែលធ្វើឲ្យចំនួនរោងចក្រចុះបញ្ជីនៅក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍កើនដល់ចំនួន ១ ៨០១ នៅក្នុងត្រីមាសទី ១ ឆ្នាំ ២០២០។ នេះបើយោងតាមថ្នាក់ដឹកនាំក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និង នវានុវត្តន៍។
ថ្លែងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍» ដែលរៀបចំនៅទីស្តីការគណៈរដ្ឋមន្ត្រីកាលពីថ្ងៃម្សិលមិញលោក ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ បានឲ្យដឹងថា បើទោះបីជាកម្ពុជាកំពុងប្រឈមនឹងបញ្ហានៃការរីករាលដាលជំងឺកូវីដ ១៩ ក៏ដោយ ប៉ុន្តែតាមរយៈគោលនយោបាយ បើកទូលាយដែលមានភាពទាក់ទាញបានធ្វើឲ្យចំនួនរោងចក្រដែលបើកដំណើរការក្នុងត្រីមាសទី ១ ឆ្នាំ ២០២០ មានចំនួន ៧៧ ក្នុងនោះ ៧៥ ជារោងចក្រថ្មី និង ២ រោងចក្រទៀតជាការបើកដំណើរការឡើងវិញ ដោយរោងចក្រទាំងនេះអាចបង្កើតការងារថ្មីបាន ២៧ ៩០៩ នាក់។ លោកបន្តថា ជាមួយគ្នានេះក៏មានរោងចក្រចំនួន ៦ ដែលមានកម្មករធ្វើការសរុបចំនួន ៦ ០៥២ នាក់បានប្រកាសបិទដំណើរការផងដែរ។
គិតរហូតមកដល់ចុងខែមីនានៅកម្ពុជាមានរោងចក្រធុនធំសរុបចំនួន ១ ៨០១ ដែលមានកម្លាំងពលកម្មកំពុងបម្រើការងារសរុប ១ ០៦៣ ០៣១ នាក់។ លោក ហេង សុខគង់ បានថ្លែងថា៖ «នេះជាមោទនភាពមួយរបស់កម្ពុជា ខណៈដែលពិភពលោកកំពុងជួបប្រទះនូវជំងឺកូវីដ១៩»។
ទោះយ៉ាងណាលោកបញ្ជាក់ថា ចំនួននេះគឺមិនរាប់បញ្ចូលចំនួនរោងចក្រដែលសម្រេចព្យួរការងារមួយរយៈ ដោយសារតែការរីករាលដាលនៃជំងឺកូវីដ ១៩ ទេ។
បើតាមលោក សុខគង់ មូលហេតុចម្បងមួយដែលជំរុញឲ្យមានរោងចក្រថ្មីៗជាច្រើនបើកដំណើរការក្នុងអំឡុងពេលនេះគឺដោយសារកម្ពុជាមិនបានជួបប្រទះកង្វះខាតការផ្គត់ផ្គង់វត្ថុធាតុដើមពីបរទេស ខណៈរោងចក្រនៅប្រទេសជាច្រើននៅមិនទាន់មានដំណើរការនៅឡើយរហូតដល់ពេលនេះ។ លោកលើកឡើងថា៖ «នេះជាឱកាសមាសរបស់កម្ពុជា ដោយបន្ទាប់ពីកូវីដបញ្ចប់ទៅនឹងមានការបញ្ជាទិញ (សម្លៀកបំពាក់) ជាច្រើនបានបង្វែរមកកម្ពុជា»។
ខណៈកម្ពុជាត្រូវបានគេដឹងថា ផលិតផលនាំចេញរបស់ខ្លួនភាគច្រើននៅពេលបច្ចុប្បន្នជាផលិតផលក្នុងវិស័យវាយនភណ្ឌ លោក សុខគង់ បាននិយាយថា កម្ពុជាកំពុងជំរុញការធ្វើពិពិធកម្មនៅក្នុងវិស័យរោងចក្រដោយមិនចង់ឲ្យមានការពឹងផ្អែកស្ទើរតែទាំងស្រុងទៅលើរោងចក្រកាត់ដេរសម្លៀកបំពាក់ និងវាយនភណ្ឌតែ ១ មុខនោះទេ។
លោកបន្តថា ទន្ទឹមនឹងការធ្វើពិពិធកម្មកម្ពុជាក៏កំពុងខិតខំពង្រីក និងពង្រឹងខ្សែចង្វាក់ផលិតកម្មរបស់ខ្លួនឲ្យបានកាន់តែវែងផងដែរ ដើម្បីអាចបង្កើតការងារថ្មីៗសម្រាប់ប្រជាជន ដោយចៀសវាងការនាំចេញវត្ថុធាតុដើមទៅក្រៅប្រទេស។
លោកថ្លែងថា៖ «យើងកំពុងធ្វើពិពិធកម្មពីឧស្សាហកម្មអតិពលកម្មទៅជាឧស្សាហកម្មដែលពឹងផ្អែកលើជំនាញ»។ យើងកំពុងជំរុញរោងចក្រនៅកម្ពុជាឲ្យទៅជា Smart Factory»។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា (GMAC) បានឲ្យដឹងថា GMAC ទទួលបានសមាជិកថ្មីចំនួន ៥ រោងចក្រក្នុងរយៈពេល ៣ ខែដំបូងឆ្នាំ ២០២០ នេះ។
លោកថ្លែងថា៖ «ទន្ទឹមនឹងទទួលបានសមាជិកថ្មីនេះ សមាជិករបស់ខ្ញុំមួយចំនួនក៏បានបិទទ្វារដែរ ប៉ុន្តែខ្ញុំអត់មានតួលេខនោះទេ»។
ធនាគារពិភពលោកកាលពីពេលថ្មីៗនេះបានឲ្យដឹងថា សេដ្ឋកិច្ចរបស់កម្ពុជាបានរងការប៉ះទង្គិចយ៉ាងដំណំពីការផ្ទុះជំងឺកូវីដ១៩នេះ។ សម្រាប់កំណើនក្នុងឆ្នាំ ២០២០ ត្រូវបានព្យាករទុកថា នឹងថយល្បឿនមកនៅត្រឹម ២,៥ ភាគរយ ខណៈកាលពីឆ្នាំ ២០១៩ កំណើនសេដ្ឋកិច្ចមានរហូតដល់ ៧,១ ភាគរយ។
បើយោងតាមរបាយការណ៍របស់ក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ គិតត្រឹមចុងត្រីមាសទី ១ ឆ្នាំ ២០១៩ រោងចក្រតម្បាញ កាត់ដេរ ចាក់ កាបូប ស្បែកជើង មានចំនួន ១ ០៩៩ រោងចក្រផលិតម្ហូបអាហារ ភេសជ្ជៈ និងបារីមានចំនួន ១៦៣ រោងចក្រផលិតផលពីឈើ (លើកលែងគ្រឿងសង្ហារិម) មាន ៣៦ រោងចក្រផលិតក្រដាស និងបោះពុម្ភលើសម្លៀកបំពាក់មានចំនួន ៦៣ រោងចក្រឧស្សាហកម្មគីមី កៅស៊ូ និងប្លាស្ទិក មាន ១៤៥ និងរោងចក្រផលិតកម្មពីរ៉ែលោហៈមានចំនួន ៥៨ រោងចក្រកែច្នៃលោហៈមាន ១៦៣ រោងចក្រគ្រឿងសង្ហារិមមាន ២០ រោងចក្រផលិតគ្រឿងអគ្គិសនី ឧស្ម័ន មាន ១ និងរោងចក្រកម្មន្តសាលផ្សេងៗសរុប ៥៣៕
វីដេអូ៖
