.jpg)
យុវជនតាំងបង្ហាញស្នាដៃកែច្នៃទាក់ទងអគ្គិសនីក្នុងពិព័រណ៍យន្តហោះកាលពីឆ្នាំ ២០១៨។ ហេង ជីវ័ន
ភ្នំពេញ: កម្ពុជានៅតែចាត់ទុកវិស័យឧស្សាហកម្មជាវិស័យចម្បងសម្រាប់ការអភិវឌ្ឍសេដ្ឋកិច្ច ប៉ុន្តែមានទំនោរងាកចេញពីការពឹងផ្អែកខ្លាំងលើឧស្សាហកម្មវាយនភណ្ឌទៅរកគោលដៅអភិវឌ្ឍន៍ឧស្សាហកម្មមិនមែនវាយនភណ្ឌ ដើម្បីចាប់យកឱកាសវិនិយោគក្រៅប្រទេសជាពិសេសពីប្រទេសចិន។ នេះបើតាមអ្នកសិក្សាស្រាវជ្រាវ។
លោក គី សេរីវឌ្ឍន៍ អ្នកស្រាវជ្រាវផ្នែកសេដ្ឋកិច្ចនៃរាជបណ្ឌិត្យសភាកម្ពុជា ប្រាប់ភ្នំពេញប៉ុស្តិ៍កាលពីអង្គារថា រដ្ឋាភិបាលនឹងបន្តអនុវត្តគោលនយោបាយសម្រាប់រយៈពេល ៥ ឆ្នាំទៀតដោយងាកចេញពីវិស័យវាយនភណ្ឌ ដើម្បីចាប់ឱកាសវិនិយោគពីប្រទេសចិន។
លោកថ្លែងថា៖ «ការអភិវឌ្ឍដែលងាកចេញនេះពីវិស័យវាយនភណ្ឌនៅពេលនេះមិនមែនដោយសារការដកអនុគ្រោះពន្ធ EBA នោះទេ តែជាការអភិវឌ្ឍឈានទៅចាប់យកឱកាសថ្មីនៃការវិនិយោគដែលហូរចេញពីប្រទេសចិនមកវិញដោយសារការជះឥទ្ធិពលនៃសង្គ្រាមពាណិជ្ជកម្មចិន-អាមេរិកប៉ុណ្ណោះ»។
តាមអ្នកសិក្សាស្រាវជ្រាវរូបនេះ ការអភិវឌ្ឍលើឧស្សាហកម្មថ្មីនេះ រដ្ឋាភិបាលនឹងយកចិត្តទុកដាក់លើឧស្សាហកម្មគ្រឿងអេឡិចត្រូនិក អគ្គិសនី និងគ្រឿងបន្លាស់រថយន្ត ដោយលើកទឹកចិត្តឲ្យមានការវិនិយោគពីក្រៅប្រទេសកាន់តែច្រើន។
លោកនិយាយថា៖ «ខ្ញុំជឿថាការវិនិយោគលើវិស័យនេះនឹងជួយបង្កើនតម្លៃ ព្រោះឧស្សាហកម្មនេះនឹងប្រើប្រាស់កម្លាំងពលកម្មតិចជាងមុនដែលទទួលបានចំណូលខ្ពស់ជាងវិស័យកាត់ដេរហើយឧស្សាហកម្មប្រភេទនេះសមរម្យជាមួយប្រជាពលរដ្ឋខ្មែរ ព្រោះការបណ្តុះបណ្តាលជំនាញដល់ពួកគាត់នឹងត្រូវចំណាយពេលខ្លី និងងាយយល់ ឆាប់ចេះអាចបម្រើការងារបានភ្លាមៗ»។
លោកបន្ថែម៖ «ឧស្សាហកម្មរបស់យើងចូលដល់ជុំទី ២ ហើយដែលកាលពីមុនយើងអភិវឌ្ឍតែលើវិស័យវាយនភណ្ឌ ចំពោះជុំទី ២ នេះគឺជាយុទ្ធសាស្ត្រកែច្នៃកសិផលកសិកម្មឲ្យទៅឧស្សាហកម្មកែច្នៃស្បៀងអាហារកញ្ចប់ ដើម្បីទប់ទល់ជាមួយការផលិតលើសនៃកសិផល និងជំរុញកំណើននៃតម្លៃបន្ថែមនៅក្នុងសេដ្ឋកិច្ចជាជាងឲ្យកសិករបេះ តែផ្លែឈើយកទៅលក់»។
លោកបន្តថា តាមរយៈគោលនយោបាយអភិវឌ្ឍឧស្សាហកម្មនេះ រដ្ឋាភិបាលបានសម្រេចកែទម្រង់លើវិស័យពន្ធដារ កងកម្លាំងប្រដាប់អាវុធ ប្រព័ន្ធដឹកជញ្ជូន ប្រព័ន្ធអប់រំ និងការបណ្តុះបណ្តាលវិជ្ជាជីវៈ និងការលើកទឹកចិត្តដល់កម្មករជាដើម ដើម្បីជំរុញឲ្យវិស័យឧស្សាហកម្មមានការលូតលាស់ទៅមុខរហ័ស។
កាលពីថ្ងៃទី ១៤ ខែសីហា គណៈរដ្ឋមន្ត្រីបានឲ្យដឹងថា ដើម្បីរួមចំណែកដល់ការរក្សាកំណើនសេដ្ឋកិច្ចខ្ពស់ប្រកបដោយចីរភាព និងបរិយាប័ន្ន រដ្ឋាភិបាលបានដាក់ចេញ និងកំពុងអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ ២០១៥-២០២៥។
សេចក្តីប្រកាសនោះបានបន្តថា គោលនយោបាយនេះគឺជាយុទ្ធសាស្ត្រជំរុញកំណើនសេដ្ឋកិច្ចថ្មីរបស់កម្ពុជាក្នុងការផ្តោតលើពិពិធកម្មសេដ្ឋកិច្ច ការពង្រឹងភាពប្រកួតប្រជែង និងការលើកកម្ពស់ផលិតភាពឲ្យស្របតាមបរិបទនៃការប្រែប្រួលរចនាសម្ព័ន្ធសេដ្ឋកិច្ចក្នុងស្រុក និងសភាពការណ៍ប្រែប្រួលនៃភូមិសាស្ត្រនយោបាយ និងសេដ្ឋកិច្ចក្នុងតំបន់ និងពិភពលោក។
ក្នុងឆ្នាំ ២០១៧-២០១៨ រដ្ឋាភិបាលបានអនុវត្តរួចមកហើយលើគោលនយោបាយអភិវឌ្ឍន៍វិស័យឧស្សាហកម្មដោយទទួលបានសមិទ្ធផលវិជ្ជមានដោយអនុបាតវិស័យឧស្សាហកម្មបានកើនឡើងពី ២៧,៧ ភាគរយ នៅឆ្នាំ ២០១៥ ដល់ ៣២,៦ ភាគរយនៅឆ្នាំ ២០១៨ នៃផលិតផលក្នុងស្រុកសរុប (GDP) ដែលសម្រេចបានមុនគោលដៅកំណត់ត្រឹម ៣០ ភាគរយនៅឆ្នាំ ២០២៥។
គណៈរដ្ឋមន្ត្រីឲ្យដឹងថា តាមរយៈគោលនយោបាយនេះ រដ្ឋាភិបាលមានគោលដៅបង្កើន និងពិពិធកម្មមុខទំនិញនាំចេញផ្នែកកម្មន្តសាល (មិនមែនជាវាយនភណ្ឌ) ឲ្យបាន ១៥ ភាគរយ និងជំរុញការនាំចេញទំនិញកែច្នៃកសិកម្មឲ្យបាន ១២ ភាគរយនៃបរិមាណនាំចេញសរុបនៅឆ្នាំ ២០២៥។
កម្ពុជាបាននិងកំពុងធ្វើពិពិធកម្មមុខទំនិញនាំចេញរបស់ខ្លួនជាបន្តបន្ទាប់ និងបន្តជំរុញកំណើននៃការនាំចេញកសិផលកែច្នៃឲ្យកាន់តែសម្បូរបែបដោយមិនពឹងផ្អែកតែការនាំចេញទំនិញកម្មន្តសាលផ្នែកសម្លៀកបំពាក់ និងស្បែកជើងនោះទេ។
យោងតាមសេចក្តីប្រកាសព័ត៌មានក្នុងគោលនយោបាយនេះ រដ្ឋាភិបាលក៏បានដាក់ទិសដៅនឹងចុះបញ្ជីជាផ្លូវការសហគ្រាសធុនតូច ៨០ ភាគរយ និងមធ្យម ៩៥ ភាគរយ ហើយសហគ្រាសធុនតូច និងមធ្យមត្រូវមានបញ្ជិកាគណនេយ្យ និងតារាងតុល្យការត្រឹមត្រូវឲ្យបាន ៥០ ភាគរយ និង ៧០ ភាគរយរៀងគ្នានៅត្រឹមឆ្នាំ ២០២៥។
ការចុះបញ្ជីសហគ្រាសធុនតូច និងមធ្យមមានផលប្រយោជន៍ក្នុងការរួមចំណែកពង្រឹងអភិបាលកិច្ចអាជីវកម្ម និងឱកាសទទួលបានហិរញ្ញប្បទាន៕ LA
