.jpg)
កម្ពុជាបាននាំចេញកង់មានតម្លៃជាទឹកប្រាក់ជាង ៣៧៩ លានដុល្លារ ទៅកាន់ទីផ្សារអន្តរជាតិក្នុងរយៈពេល ៩ ខែដំបូងឆ្នាំ ២០២០ ដោយកើន ២៨,៩២ ភាគរយ។ រូបថត ភ្នំពេញ ប៉ុស្តិ៍
ភ្នំពេញៈ កម្ពុជាបាននាំចេញកង់មានតម្លៃជាទឹកប្រាក់ជាង ៣៧៩ លានដុល្លារ ទៅកាន់ទីផ្សារអន្តរជាតិក្នុងរយៈពេល ៩ ខែដំបូងឆ្នាំ ២០២០ ដោយកើន ២៨,៩២ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យពីក្រសួងពាណិជ្ជកម្ម។
ទិន្នន័យនេះបង្ហាញថា អាមេរិកគឺជាទីផ្សារឈានមុខគេមួយសម្រាប់ផលិតផលកង់កម្ពុជាក្នុងអំឡុងពេលនេះ។
កម្ពុជានាំចេញកង់ជាង ១,៥ លានគ្រឿងទៅកាន់ទីផ្សារអន្តរជាតិក្នុងអំឡុងពេលនេះ។ នេះបើយោងតាមទីភ្នាក់ងារព័ត៌មានរដ្ឋ AKP។
កង់ផលិតនៅប្រទេសកម្ពុជាត្រូវបាននាំចេញទៅកាន់ទីផ្សារអាមេរិកជាង ៥០០ ០០០ គ្រឿង អាល្លឺម៉ង់ ៣៦០ ០០០ គ្រឿង ចក្រភពអង់គ្លេស ២៧០ ០០០ គ្រឿង និងបែលហ្ស៊ិក ១៥០ ០០០ គ្រឿង ខណៈដែលប្រទេសហូឡង់មានចំនួន ៩០ ០០០ គ្រឿង និងអូស្ដ្រាលីមានចំនួន ១០០ ០០០ គ្រឿង។
លោក ស៊ាង ថៃ អ្នកនាំពាក្យក្រសួងពាណិជ្ជកម្មប្រាប់ ភ្នំពេញ ប៉ុស្តិ៍ ថា ដំណើរការផលិតកង់របស់កម្ពុជានៅតែបន្តជាធម្មតា បើទោះជាវិបត្តិនៃការរាតត្បាតជំងឺកូវីដ១៩ជាសកលកំពុងបន្តក៏ដោយ។
លោកអះអាងថា ក្នុងអំឡុងពេលនេះប្រទេសកម្ពុជាបាននាំចេញកង់កើនជាង ៨៥ លានដុល្លារ បើធៀបនឹងរយៈពេលដូចគ្នាកាលពីឆ្នាំមុន។
លោកថ្លែងថា៖ «ការនាំចេញកង់កើនឡើងនេះវាអាស្រ័យលើការបញ្ជាទិញ»។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ ភ្នំពេញ ប៉ុស្ដិ៍ ថា និន្នាការនៃការប្រើប្រាស់កង់ ដើម្បីកាត់បន្ថយការបំពុលបរិយាកាសនៅតំបន់ទីក្រុង ជុំវិញពិភពលោកបានជំរុញឱ្យមានការនាំចេញកង់របស់ប្រទេសកម្ពុជា ដើម្បីបង្កើនចំពេលការរីករាលដាលជំងឺកូវីដ ១៩ ប្រជាជនចាំបាច់ត្រូវហាត់ប្រាណឱ្យបានទៀងទាត់។
លោក លឹម ហេង ថ្លែងថា៖ «ការកើនឡើងការនាំចេញកង់កម្ពុជាក្នុងអំឡុងពេលនេះបានឆ្លុះបញ្ចាំងបរិយាកាសវិនិយោគល្អប្រសើរនៅក្នុងប្រទេសកម្ពុជា ដែលជាកិច្ចខិតខំប្រឹងប្រែងរបស់រដ្ឋាភិបាលក្នុងការទាក់ទាញក្រុមវិនិយោគិន មកវិនិយោគនៅកម្ពុជា។ ការកើនឡើងនេះបានរួមចំណែកដល់សេដ្ឋកិច្ចជាតិ»។
លោក ស៊ាង ថៃ បានឱ្យដឹងថា ក្នុងពេលកន្លងមករដ្ឋមន្ត្រីក្រសួងពាណិជ្ជកម្ម ធ្លាប់បានផ្ញើលិខិតទៅអ្នកបញ្ជាទិញទាំងអស់ឱ្យបន្តទទួលយកទំនិញដែលបានបញ្ជាទិញរួចហើយ និងបញ្ជាទិញបន្ថែមទៀតព្រោះកម្ពុជានៅតែមានសមត្ថភាពផលិតទោះបីក្នុងស្ថានភាពនៃការរាតត្បាតជំងឺកូវីដ ១៩ ក៏ដោយ។
ថ្លែងនៅក្នុងការចេញផ្សាយនៃវេទិកាធុរកិច្ចឥណ្ឌូប៉ាស៊ីហ្វិកកាលពីសប្ដាហ៍មុន លោក Patrick Murphy ឯកអគ្គរដ្ឋទូតអាមេរិកប្រចាំកម្ពុជាបានកត់សម្គាល់ថា កម្ពុជាគឺជាប្រទេសទទួលបានអត្ថប្រយោជន៍ទៀងទាត់នៃផលិតផល និងសេវាអាមេរិក។
លោកបានឱ្យដឹងថា វិស័យឯកជនកម្ពុជាធ្វើការងារយ៉ាងសកម្មជាមួយរដ្ឋាភិបាលអាមេរិក និងទីភ្នាក់ងាររបស់ខ្លួនដើម្បីបង្កើតមធ្យោបាយផ្ដល់ប្រភពទុន និងធ្វើឱ្យរីកចម្រើនពាណិជ្ជកម្មរបស់ពួកគេ។
លោក Murphy បានឱ្យដឹងដែរថាអាមេរិកជាទីផ្សារសំខាន់សម្រាប់កម្ពុជានាំចេញដែលមានចំនួន ៥,៤ ពាន់លានដុល្លារកាលពីឆ្នាំមុន កើនឡើងពី ៣ ពាន់លានដុល្លារ ក្នុងឆ្នាំ ២០១៥៕LA
