.jpg)
កង់ជាច្រើនដែលកំពុងដាក់តាំងលក់នៅកម្ពុជា។ រូបថត ភ្នំពេញ ប៉ុស្តិ៍
ភ្នំពេញៈ កម្ពុជាជាប់ចំណាត់ថ្នាក់លេខ ១ នៅអាស៊ាន និងលេខ ៥ លើពិភពលោកក្នុងនាមជាប្រទេសដែលនាំចេញកង់ទៅទីផ្សារអន្តរជាតិច្រើនជាងគេក្នុងឆ្នាំ ២០២០។
យោងតាមទិន្នន័យក្រសួងពាណិជ្ជកម្មក្នុងរយៈពេល ១២ ខែ ឆ្នាំ ២០២០ កម្ពុជាបាននាំចេញកង់ក្នុងតម្លៃសរុប ៥២៧,០៨ លានដុល្លារ កើនឡើង ២៧,៧៨ ភាគរយ បើធៀបទៅនឹងឆ្នាំ ២០១៩ ដែលមានទីផ្សារសំខាន់ៗដូចជា អាមេរិក អាល្លឺម៉ង់ ស៊ុយអែត ប៊ែលហ្ស៊ិក កាណាដា អង់គ្លេស ដាណឺម៉ាក អូស្ត្រាលី អូទ្រីស ហូឡង់ ឆែកអ៊ីតាលី កូឡុំប៊ី កូរ៉េ និងអេស្ប៉ាញ។ ចំណែកការនាំចូលកង់ក្នុងឆ្នាំ ២០២០ មានតម្លៃ ៨,៣៨ លានដុល្លារ ធ្លាក់ចុះ ១៩,៣៣ ភាគរយពីប្រទេសមួយចំនួនដូចជា ជប៉ុន ចិន កោះតៃវ៉ាន់ វៀតណាម អាមេរិក ថៃ និងវៀតណាម ជាដើម។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានឱ្យដឹងថា កំណើនជាបន្តបន្ទាប់នៃការនាំចេញកង់ពីកម្ពុជាទៅកាន់ទីផ្សារអន្តរជាតិ គឺដោយសារកម្ពុជាមានស្ថិរភាពនយោបាយល្អ មានគោលនយោបាយកែទម្រង់មុតស្រួច (ផ្នែកសេដ្ឋកិច្ច) Pro Business ច្បាប់វិនិយោគមានលក្ខណ:អំណោយផល សម្បូរកម្លាំងពលកម្ម ការវិនិយោគមានលក្ខណ:សេរី ព្រមទាំងមានទីតាំងភូមិសាស្ត្រអំណោយផល។
លោកបន្តថា ក្រៅពីនេះលក្ខណៈអំណោយផលទាំងនេះប្រទេសកម្ពុជាក៏ជាសមាជិកនៃអង្គការពាណិជ្ជកម្មពិភពលោក ជាសមាជិកអាស៊ាន និងជាប្រទេសដែលមាន និងត្រៀមមានកិច្ចព្រមព្រៀងពាណិជ្ជកម្មថ្នាក់តំបន់ អនុតំបន់ផងដែរ។ លើសពីនេះទៀត កម្ពុជាក៏ទើបសម្រេចបាននូវកិច្ចព្រមព្រៀងពាណិជ្ជកម្មសេរីទ្វេភាគី (FTA) ជាមួយប្រទេសចិន ព្រមទាំងកំពុងចរចាបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសជាច្រើនទៀត។
លោកថ្លែងថា៖ «ចំនួនទឹកប្រាក់នាំចេញនេះធ្វើឱ្យកម្ពុជាជាប់ចំណាត់ថ្នាក់លេខ ៥ នៃការនាំចេញកង់ក្នុងពិភពលោក និងជាប់ចំណាត់ថ្នាក់លេខ ១ ក្នុងតំបន់អាស៊ាន»។
យោងតាមលោក ស៊ាង ថៃ បច្ចុប្បន្ននៅកម្ពុជាមានរោងចក្រដំឡើងកង់ ៥ រួមមានក្រុមហ៊ុន A and J(Cambodia) Co., Ltd ក្រុមហ៊ុន Speedtech Industrial Co., Ltd ក្រុមហ៊ុន Smart Tech(Cambodia)Co.,Ltd ក្រុមហ៊ុន Xds Bicycle (Cambodia)Co., Ltd និងក្រុមហ៊ុន Evergrand Bicycle (Cambodia) Co., Ltd។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៤ ខែមករាថា ប្រាក់ចំណូលពីការនាំចេញកង់កំពុងរួមចំណែកលើកកម្ពស់កំណើនសេដ្ឋកិច្ចកម្ពុជា តាមរយៈប្រាក់ពន្ធ និងបង្កើតការងារថ្មីៗ។ កង់ជាផលិតផលដែលកំពុងមានតម្រូវការខ្ពស់នៅបណ្តាប្រទេសជាច្រើនលើពិភពលោក។
លោកថ្លែងថា៖ «ការផលិត និងនាំចេញកង់ពីកម្ពុជាទៅកាន់ទីផ្សារអន្តរជាតិនឹងបន្តកើនឡើងបន្ថែមទៀតនៅក្នុងឆ្នាំ ២០២១ នេះ។ ទោះយ៉ាងណា ក្រុមហ៊ុនក៏ត្រូវតែគិតគូរឱ្យបានខ្លាំងបន្ថែមទៀតលើគុណភាពផងដែរ»។
អនុប្រធានសភាពាណិជ្ជកម្មកម្ពុជាលោក លឹម ហេង ធ្លាប់ប្រាប់ថា ភាពអំណោយផលនៃច្បាប់វិនិយោគ និងភាពសម្បូរនៃកម្លាំងពលកម្មបានធ្វើឱ្យកម្ពុជាទាក់ទាញបាននូវការចូលមកបណ្តាក់ទុនលើរោងចក្រដំឡើងកង់ជាបន្តបន្ទាប់។
លោកបានបន្តថា សម្រាប់កំណើននាំចេញកង់ពីកម្ពុជាក្នុងឆ្នាំ ២០២០ ក៏ទទួលបានឥទ្ធិពលការរីករាលដាលជំងឺកូវីដ១៩ ខ្លះដែរ។ លោកនិយាយថា៖ «ការកាត់បន្ថយគម្លាត និងការប្រើប្រាស់មធ្យោបាយធ្វើដំណើរសាធារណៈ ដើម្បីទប់ស្កាត់ការឆ្លងជំងឺកូវីដ១៩ គឺជាមូលហេតុមួយដែលធ្វើឱ្យកំណើននៃតម្រូវការប្រើប្រាស់កង់កើនឡើងជាលំដាប់»។
យោងតាម Bike-EU.com ដែលជាគេហទំព័រឯកទេសផ្នែកឧស្សាហកម្មកង់បានឱ្យដឹងថា កម្ពុជាបានក្លាយជាប្រទេសផ្គត់ផ្គង់កង់ឈានមុខគេទៅសហគមន៍អឺរ៉ុបចាប់តាំងពីឆ្នាំ ២០១៧ ដោយបានវ៉ាដាច់កោះតៃវ៉ាន់ ដែលកាន់តំណែងនេះក្នុងរយៈពេលជាង ២ ទសវត្សរ៍។ តាម Bike-EU.com ក្នុងឆ្នាំ ២០១៧ កម្ពុជានាំចេញកង់ជាង ១,៤២ លានគ្រឿង កើន ៩ ភាគរយធៀបនឹង ១,២៩ លានគ្រឿង កាលពីឆ្នាំ ២០១៦៕ LA
វីដេអូ៖
