ភ្នំពេញៈ ការនាំចេញកង់ពីកម្ពុជាទៅកាន់ទីផ្សារអន្តរជាតិក្នុងរយៈពេល ៥ ខែ ឆ្នាំ ២០២០ មានតម្លៃសរុបជិត ២០០ លានដុល្លារកើនឡើង ២៦ ភាគរយ បើធៀបនឹងរយៈពេលដូចគ្នាឆ្នាំ ២០១៩ ខណៈទីផ្សារអឺរ៉ុបមានចំណែកទីផ្សារប្រមាណ ៦០ ភាគរយនៃការនាំចេញសរុប។
ទិន្នន័យអគ្គនាយកដ្ឋានគយ និងរដ្ឋាករកម្ពុជាចេញផ្សាយកាលពីចុងសប្តាហ៍មុនបង្ហាញថា ចាប់ពីខែមករាមកដល់ខែឧសភា ឆ្នាំ ២០២០ កម្ពុជាបាននាំចេញកង់ទៅកាន់ទីផ្សារអន្តរជាតិក្នុងតម្លៃសរុប ១៩៧ លានដុល្លារកើន ២៦ ភាគរយធៀបនឹងរយៈពេលដូចគ្នាឆ្នាំ ២០១៩ ចំណែកកង់ដែលនាំចេញមានចំនួនសរុប ៨៧៦ ៦១២ គ្រឿង កើនឡើង ១៩ ភាគរយ។
ទិន្នន័យខាងលើឲ្យដឹងទៀតថា ការនាំចេញកង់ទៅទីផ្សារអឺរ៉ុបមានចំនួន ៤៩៥ ៣៤១ គ្រឿង ស្មើនឹងតម្លៃ ១១៩ លានដុល្លារ ទៅអាមេរិកមានចំនួន ២២៣ ៩១២ គ្រឿង ស្មើនឹងតម្លៃ ៤៤ លានដុល្លារទៅអង់គ្លេសមានចំនួន ១២៥ ៦០២ គ្រឿងស្មើនឹង ២៥ លានដុល្លារ ទៅជប៉ុនមាន ៣៣៨ គ្រឿង ស្មើនឹង ៩៤ ១៣៧ ដុល្លារ ចំណែកគោលដៅផ្សេងទៀតមានចំនួន ៣១ ៤១៩ គ្រឿង នឹងជាង ៨ លានដុល្លារ។
លោក លឹម ហេង អនុប្រធានសភាពាណិជ្ជកម្មកម្ពុជាកាលពីថ្ងៃអាទិត្យបានប្រាប់ភ្នំពេញប៉ុស្តិ៍ថា ភាពអំណោយផលនៃច្បាប់វិនិយោគ និងភាពសម្បូរកម្លាំងពលកម្មវ័យក្មេងបានធ្វើឲ្យកម្ពុជាទាក់ទាញបាននូវការចូលមកបណ្តាក់ទុនលើរោងចក្រដំឡើងកង់ជាបន្តបន្ទាប់។ លោកបន្តថា សម្រាប់កំណើននាំចេញកង់ពីកម្ពុជាពេលនេះក៏ទទួលឥទ្ធិពលការរីករាលដាលជំងឺកូវីដ ១៩ ផងដែរ។
លោកនិយាយថា៖ «ការកាត់បន្ថយគម្លាត និងការប្រើប្រាស់មធ្យោបាយធ្វើដំណើរសាធារណៈ ដើម្បីទប់ស្កាត់ការឆ្លងជំងឺកូវីដ១៩ គឺជាមូលហេតុមួយដែលធ្វើឲ្យកំណើននៃតម្រូវការប្រើប្រាស់កង់កើនឡើងជាលំដាប់នៅពេលនេះ»។
មិនមានទិន្នន័យពីចំនួនរោងចក្រដំឡើងកង់នៅកម្ពុជានោះទេ ប៉ុន្តែយោងតាមលោក លឹម ហេង រោងចក្រដំឡើងកង់នៅកម្ពុជាភាគច្រើនជាការវិនិយោគរបស់វិនិយោគិនមកពីកោះតៃវ៉ាន់ និងមានទីតាំងក្នុងតំបន់សេដ្ឋកិច្ចពិសេសក្រុងបាវិត។
កាលពីឆ្នាំ ២០១៩ កម្ពុជានាំចេញកង់ទៅទីផ្សារអន្តរជាតិក្នុងតម្លៃស្មើ ៤១៨ លានដុល្លារកើនឡើង ២៦,២៨ ភាគរយធៀបនឹងឆ្នាំ ២០១៨ ដែលមានចំនួន ៣៣១ លានដុល្លារ។
លោក លឹម ហេង អះអាងថាការនាំចេញកង់ពីកម្ពុជាទៅទីផ្សារអន្តរជាតិនឹងមានកំណើនបន្តទៀត ខណៈបច្ចុប្បន្ននិន្នាការនៃការប្រើកង់នៅបណ្តាប្រទេសរីកចម្រើនកំពុងមានសម្ទុះកាន់តែខ្លាំង។ លោកថ្លែងថា៖ «និន្នាការនៃការនាំចេញកង់ និងមានសញ្ញាវិជ្ជមានកាត់តែខ្លាំងនៅក្នុងឆ្នាំនេះធៀបនឹងឆ្នាំមុន»។
គេហទំព័រ Bike-EU.com ដែលជាគេហទំព័រឯកទេសផ្នែកឧស្សាហកម្មកង់បានឲ្យដឹងថា កម្ពុជាក្លាយជាប្រទេសផ្គត់ផ្គង់កង់ឈានមុខគេទៅទីផ្សារអឺរ៉ុបចាប់តាំងពីឆ្នាំ ២០១៧ ដោយបានវ៉ាដាច់កោះតៃវ៉ាន់ដែលកាន់តំណែងនេះក្នុងរយៈពេលជាង ២ ទសវត្សរ៍។ Bike-EU.com បង្ហាញថា ឆ្នាំ ២០១៧ កម្ពុជានាំចេញកង់ជាង ១,៤២ លានគ្រឿងកើន ៩ ភាគរយ ធៀបនឹងឆ្នាំ ២០១៦៕ LA