ភ្នំពេញៈ តម្លៃនៃការនាំចេញកៅស៊ូរបស់កម្ពុជាទៅកាន់ទីផ្សារអន្តរជាតិមានជាង ១៦៩ លានដុល្លារ នៅក្នុងរយៈពេល ៧ ខែ ឆ្នាំ ២០១៩ ខណៈតម្លៃនៅតែបន្តធ្លាក់ចុះ។ នេះបើយោងតាមរបាយការណ៍របស់អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទធៀបនឹងរយៈពេលដូចគ្នាកាលពីឆ្នាំទៅ។
ទោះបីយ៉ាងនេះក្តីរបាយការណ៍បានបង្ហាញថា បរិមាណកៅស៊ូដែលបាននាំចេញក្នុងរយៈពេលនេះកើនឡើង ២៥ ភាគរយ ដល់ ១២៥ ៩៥៥ តោន។
ទិន្នន័យបង្ហាញថាតម្លៃកៅស៊ូជាមធ្យមក្នុងរយៈពេល ៧ ខែកន្លងមកនេះគឺ ១ ៣៤២ ដុល្លារ ក្នុងមួយតោន ដោយធ្លាក់ចុះប្រហែល ៥ ភាគរយ ធៀបនឹងឆ្នាំ ២០១៨។ ដោយឡែកសម្រាប់ខែកក្កដា ការនាំចេញជ័រកៅស៊ូមានបរិមាណជាង ២១ ៦៩៣ តោនដោយមានតម្លៃជាមធ្យម ១ ៣៥៣ ដុល្លារ ក្នុងមួយតោន។
លោក ប៉ុល សុផា អគ្គនាយកនៃអគ្គនាយកដ្ឋានកៅស៊ូកាលពីម្សិលមិញបាននិយាយថា ការផលិតកៅស៊ូរបស់កម្ពុជាមានការកើនឡើង ដោយសារតែបរិមាណដើមកៅស៊ូដែលអាចចៀរជ័របានកើនឡើង បើទោះបីជាផ្ទៃដីដាំដុះមិនមានការប្រែប្រួលធៀបនឹងឆ្នាំមុនក៏ដោយ។ លោកបានបនុ្តថា៖ «ទិន្នផលកៅស៊ូកម្ពុជាត្រូវបាននាំចេញទៅកាន់ទីផ្សារអន្តរជាតិទាំងស្រុង ហេតុនេះនៅពេលតម្លៃទីផ្សារអន្តរជាតិធ្លាក់ចុះ កៅស៊ូកម្ពុជាក៏ធ្លាក់ចុះដែរ»។
បើតាមលោក សុផា ជម្លោះរវាងមហាអំណាចចិន និងអាមេរិកបានធ្វើឲ្យកាត់បន្ថយដល់តម្រូវការកៅស៊ូ ខណៈការផ្គត់ផ្គង់ចេះតែកើនឡើង។
លោកថ្លែងថា៖ «តម្លៃកៅស៊ូកម្ពុជានៅឆ្នាំនេះបានធ្លាក់ចុះបន្តិច ដោយសារវិបត្តិសេដ្ឋកិច្ចដែលបណ្តាលមកពីប្រទេសមហាអំណាចទាំង ២ នេះ ហើយការផ្គត់ផ្គង់ទីផ្សារចេះតែកើនឡើង»។ លោកបន្តថាជ័រកៅស៊ូកម្ពុជាបាននាំចេញភាគច្រើនទៅកាន់ប្រទេស វៀតណាម ចិន ម៉ាឡេស៊ី និងសិង្ហបុរី។
កាលពីឆ្នាំ ២០១៨ កម្ពុជាបាននាំចេញជ័រកៅស៊ូបានជាង ២១ ម៉ឺនតោន ដោយទទួលបានចំណូលជិត ៣០០ លានដុល្លារ៕