ភ្នំពេញៈ កម្ពុជាបាននាំចេញដូងប្រេងឆៅប្រមាណ ២ ម៉ឺនតោននៅក្នុងរយៈពេលជិត ៥ ខែ ដើមឆ្នាំ ២០២១ កើនឡើងជាង ៣៥ ភាគរយធៀបនឹងរយៈពេលដូចគ្នាកាលពីឆ្នាំមុន។ នេះបើតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ។
អ្នកនៅក្នុងឧស្សាហកម្មនេះបានឱ្យដឹងថា ភាពអំណោយផលនៃអាកាសធាតុបាននាំឱ្យទិន្នផលក្នុងស្រុកកើនឡើង ស្របពេលផលិតកម្មដូងប្រេងរបស់ប្រទេសអ្នកផលិត និងនាំចេញធំជាងគេលើពិភពលោកបន្តធ្លាក់ចុះដោយបញ្ហាអាកាសធាតុ និងកង្វះកម្លាំងពលកម្ម។
ទិន្នន័យពីក្រសួងកសិកម្មឱ្យដឹងថា រយៈពេលជិត ៥ ខែឆ្នាំនេះ កម្ពុជាបាននាំចេញដូងប្រេង ១៩ ៩១៦ តោន កើនឡើង ៣៥,៧៦ ភាគរយ ឬស្មើនឹង ៥ ២៤៦ តោន ធៀបនឹងរយៈពេលដូចគ្នាកាលពីឆ្នាំមុន។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែឧសភាថា នៅក្នុងអំឡុងពេលនេះកម្ពុជាបាននាំចេញដូងប្រេងឆៅទៅប្រទេសឥណ្ឌា និងម៉ាឡេស៊ី ដែលជាទីផ្សារសំខាន់របស់កម្ពុជា។
ប្រទេសម៉ាឡេស៊ី គឺអ្នកផលិត និងនាំចេញដូងប្រេងឆៅធំទី ២ បន្ទាប់ពីប្រទេសឥណ្ឌូនេស៊ី។
លោកមានប្រសាសន៍ថា៖ «ខ្ញុំឃើញថា ប្រទេសមួយចំនួនបានកាត់បន្ថយការផលិតដូងប្រេងដោយសារកម្លាំងពលកម្មឡើងថ្លៃ គាត់ធ្វើអត់ចំណេញ អ៊ីចឹងគាត់បង្វែរទៅទិញដូងប្រេងនៅប្រទេសណាដែលអាចផលិតបាន»។
លោក ម៉ុង ឫទ្ធី អគ្គនាយកក្រុមហ៊ុន ម៉ុងឫទ្ធី គ្រុប ប្រាប់ ភ្នំពេញ ប៉ុស្តិ៍ថា ការនាំចេញដូងប្រេងឆៅរបស់ក្រុមហ៊ុនលោកបានប្រមាណ ២០ ០០០ តោន ចាប់ពីខែមករា ដល់ចុងខែ ឧសភា ឆ្នាំ ២០២១ ច្រើនជាងឆ្នាំ ២០២០ ចំនួន ៥ ៦៦ តោន។
លោកបញ្ជាក់ថា៖ «កំណើននៃការនាំចេញនេះ មកពីកត្តាអំណោយផលអាកាសធាតុធ្លាក់ភ្លៀងច្រើននៅដើម រដូវវស្សាធ្វើឱ្យដូងប្រេងទទួលបានផលច្រើនជាងឆ្នាំ ២០២០។ រីឯតម្លៃក៏ល្អប្រសើរជាងឆ្នាំ ២០២០ ផងដែរ គឺជាមធ្យម ៩១៩ ដុល្លារ ក្នុង ១ តោនកើនឡើងប្រមាណ ២៨ ភាគរយ បើធៀបទៅនឹងឆ្នាំមុន»។
បច្ចុប្បន្នផលិតផលពីដំណាំដូងប្រេងត្រូវបានគេយកទៅប្រើយ៉ាងទូលំទូលាយដូចជា ចំណីអាហារមនុស្ស សត្វ ថាមពល ឱសថ និងគ្រឿងសម្អាង។ ដូងប្រេងមានការដាំដុះច្រើនប្រទេសឥណ្ឌូនេស៊ី ម៉ាឡេស៊ី និងថៃជាដើម។
ចាប់ផ្តើមបណ្តុះកូនដាំដំបូងក្នុងឆ្នាំ ១៩៩៦ មកដល់ពេលនេះផ្ទៃដីដាំដុះដូងប្រេងរបស់ក្រុមហ៊ុន ម៉ុង ឫទ្ធី គ្រុប មានប្រមាណ ២០ ០០០ ហិកតា។
ម៉ុង ឫទ្ធី វិនិយោគទុនដំណាំដូងប្រេងកម្ពុជា (Mong Reththy Investment Cambodia Oil Palm Co., Ltd) ដែលជាបុត្រសម្ព័ន្ធរបស់ក្រុមហ៊ុន ម៉ុង ឫទ្ធី គ្រុប គឺជាក្រុមហ៊ុនដាំដុះដូងប្រេងធំជាងគេនៅកម្ពុជា និងលំដាប់ទី ៤ នៅអាស៊ីអាគ្នេយ៍។
សព្វថ្ងៃក្រុមហ៊ុននេះមានរោងចក្រកែច្នៃកិនយកប្រេងដូងចំនួន ២ ដែលមានសមត្ថភាពផលិតសរុប ៧៥ តោន ក្នុង ១ ម៉ោង។ ក្រុមហ៊ុននេះនាំចេញដូងប្រេងឆៅទៅកាន់ប្រទេសក្នុងតំបន់អាស៊ីអាគ្នេយ៍ និងសហគមន៍អឺរ៉ុប។
របាយការណ៍ក្រសួងកសិកម្មបានឱ្យដឹងថា ក្នុងរយៈពេល ៧ ខែដើមឆ្នាំ ២០២០ កម្ពុជាបាននាំចេញដូងប្រេងឆៅចំនួន ៣២ ៨១០ តោន ទៅកាន់ប្រទេសម៉ាឡេស៊ី ឥណ្ឌា ស្រីលង្កា ចិន ស្វ៊ីស និងប៉ាគីស្ថាន៕ LA