ភ្នំពេញៈ ការនាំចេញសរុបរបស់កម្ពុជាទៅទីផ្សារសហរដ្ឋអាមេរិក ជាប្រទេសមហាអំណាចសេដ្ឋកិច្ចឈានមុខគេរបស់ពិភពលោក បានកើនឡើងយ៉ាងខ្លាំងនៅត្រីមាសទី១ ឆ្នាំនេះ ដែលសម្រេចបានទឹកប្រាក់ជិត ១ ៨៦៣ លានដុល្លារ ទោះបីជាមានការរអាក់រអួលផ្នែកផលិតកម្មខ្លះ ដែលបានបណ្ដាលពីការរីករាលដាលជំងឺកូវីដ ១៩។
ទិន្នន័យចុងក្រោយបានមកពីការិយាល័យជំរឿនអាមេរិក កម្ពុជាបាននាំចេញទំនិញមានតម្លៃ ១ ៨៦៣ លានដុល្លារក្នុងអំឡុងត្រីមាសទី១ នេះ កើនឡើង ១៦,៨៤ ភាគរយ ធៀបនឹង ១ ៥៩៤ លានដុល្លារ ខណៈដែលការនាំចូលពីសហរដ្ឋអាមេរិកមកវិញក៏បានកើនឡើង ២៥ ភាគរយ មានតម្លៃជាង ១០៦ លានដុល្លារ ធៀបនឹង ៨៥ លានដុល្លារផងដែរ។
លោក ខេន លូ អគ្គលេខាធិការសមាគមរោងចក្រកាត់ដេរកម្ពុជា បានទទួលស្គាល់ថា អាមេរិកគឺជាទីផ្សារធំជាងគេសម្រាប់សម្លៀកបំពាក់ វាយនភ័ណ្ឌ និងទំនិញធ្វើដំណើររបស់ប្រទេសកម្ពុជា។
លោកបញ្ជាក់ថា៖ «កាលពីឆ្នាំមុន ទីផ្សារអាមេរិក គឺជាទីផ្សារនាំចេញធំជាងគេរបស់យើង ដែលមានប្រហែល ៤០ ភាគរយ នៃការនាំចេញរបស់យើង»។
រហូតមកដល់ពេលនេះ អាមេរិកមិនទាន់បន្តសុពលភាពកម្មវិធីអត្ថប្រយោជន៍អនុគ្រោះពន្ធពាណិជ្ជកម្ម (GSP) របស់ខ្លួនឡើយ បន្ទាប់ពីផុតកំណត់កាលពីថ្ងៃទី ៣១ ខែធ្នូ ឆ្នាំមុន។ ជាមួយគ្នានេះដែរលោក ខេន លូ ក៏បានបញ្ជាក់ផងដែរថា រហូតមកដល់ពេលនេះ ការនាំចេញទំនិញធ្វើដំណើរពីកម្ពុជាចាំបាច់ត្រូវបង់ពន្ធ។
លោកថ្លែងថា៖ «ប្រព័ន្ធអនុគ្រោះពន្ធពាណិជ្ជកម្ម (GSP) របស់អាមេរិកបានផុតរលត់ហើយ ពេលនេះយើងកំពុងរង់ចាំការបន្តសុពលភាពរបស់វា។ ខណៈសម្លៀកបំពាក់ និងស្បែកជើងមិនមែនជាផ្នែកមួយនៃផែនការ GSP ទេ ទំនិញធ្វើដំណើរ ទទួលបានអត្ថប្រយោជន៍ពីផែនការ GSP។ ថ្មីៗនេះការនាំចេញទំនិញធ្វើដំណើរពីកម្ពុជាទៅអាមេរិកចាំបាច់ត្រូវបង់ពន្ធសម្រាប់ការនាំចូល»។
លោកបន្តថា៖ «ប៉ុន្តែចាប់តាំងពី GSP អនុវត្តចំពោះបណ្ដាប្រទេសជាច្រើនផ្សេងទៀត វាមិនមានផលប៉ះពាល់ខ្លាំងមកដល់យើងនោះទេ»។
លោក Patrick Murphy ឯកអគ្គរដ្ឋទូតអាមេរិកបានឱ្យដឹងថា ពិព័រណ៍សិទ្ធិធ្វើអាជីវកម្មកម្ពុជាកាលពីថ្ងៃទី ៥ ខែឧសភាថា លំហូរពាណិជ្ជកម្ម និងការវិនិយោគរវាងអាមេរិក និងកម្ពុជាកំពុងកើនឡើងគួរកត់សម្គាល់ពី ១ ឆ្នាំទៅ ១ ឆ្នាំ។
លោក ទូត បានអះអាងថា ក្រុមហ៊ុនអាមេរិកកាន់តែច្រើនកំពុងចូលមកកម្ពុជារៀងរាល់ឆ្នាំ ដែលនាំយកមកនូវអ្វីដែលលោកបានឱ្យដឹងថា ជាការអនុវត្តអាជីវកម្មប្រកបដោយក្រមសីលធម៌ ស្ដង់ដាការងារ និងបរិស្ថានខ្ពស់ និងកម្មវិធីទទួលខុសត្រូវសង្គម (CSR) របស់ក្រុមហ៊ុនដ៏រឹងមាំ ដែលផ្សារភ្ជាប់ជាមួយសហគមន៍ក្នុងប្រទេសកម្ពុជា។
លោកបន្ថែមថា ក្រុមហ៊ុនអាមេរិក និងយីហោល្បីៗជារួមបានទទួលជោគជ័យ និងកំពុងរីកចម្រើននៅក្នុងប្រទេសកម្ពុជា ដែលចាប់ពីរថយន្ត Ford ក្រុមហ៊ុន Facebook ហាងកាហ្វេ Starbucks និងហាងនំភីហ្សារបស់ក្រុមហ៊ុន Papa John ជាដើម។
លោក Murphy លើកឡើងថា៖ «យើងសង្កេតឃើញថា ប្រជាជនកម្ពុជាស្វែងរកផលិតផល និងសេវាកម្មដែលមានគុណភាពខ្ពស់ និងមានតម្រូវការច្រើន។ អ្នកនឹងមើលឃើញយីហោហាងទាំងនេះកាន់តែច្រើននៅអាស៊ីអាគ្នេយ៍សព្វថ្ងៃនេះ ដូចជានៅទីក្រុងបាងកក ប្រទេសសិង្ហបុរី និងទីក្រុងហូជីមិញ។
នៅពេលនេះ ដល់ពេលវេលាដែលត្រូវមើលឃើញយីហោទាំងនេះនៅទីក្រុងភ្នំពេញផងដែរហើយ។ ខ្ញុំមានទំនុកចិត្តថា ពិព័រណ៍នេះនឹងបង្កើនការយល់ដឹងអំពីឱកាសពាណិជ្ជកម្មដ៏អស្ចារ្យ និងការបង្កើតទំនាក់ទំនង ដែលផ្ដល់លទ្ធផលសម្រាប់ប្រទេសទាំង ២»។
កម្ពុជាគឺជាទីផ្សារការនាំចេញទំនិញឈានមុខគេទី ១០០ របស់អាមេរិកកាលពីឆ្នាំ ២០១៩ ខណៈដែលការនាំចេញទំនិញអាមេរិកចូលមកកម្ពុជាកាលពីឆ្នាំ ២០១៩ មានតម្លៃ ៥១៤ លានដុល្លារ កើនឡើង ១៥,៣ ភាគរយ ធៀបនឹងឆ្នាំ ២០១៨។
ទំនិញនាំចេញសំខាន់ៗកាលពីឆ្នាំ ២០១៩ រួមមាន រថយន្ត (៣៤៥ លានដុល្លារ) គ្រឿងយន្ត (២៧ លានដុល្លារ) កាកសំណល់អាហារ និងចំណីសត្វ (១៩ លានដុល្លារ) ក្រដាស និងក្រដាសកាតុង (១១ លានដុល្លារ) និងប្លាស្ទិក (១០ លានដុល្លារ)។ ការនាំចេញផលិតផលកសិកម្មសរុបរបស់អាមេរិក ចូលមកកម្ពុជាមានតម្លៃសរុប ៦៣ លានដុល្លារកាលពីឆ្នាំ ២០១៩។
កម្ពុជាក៏ជាប្រទេសផ្គត់ផ្គង់ឈានមុខគេទី៤៤ របស់អាមេរិកនៃការនាំចូលទំនិញកាលពីឆ្នាំ ២០១៩។ ប្រភេទនាំចូលសំខាន់ៗកាលពីឆ្នាំ ២០១៩ មានសម្លៀកបំពាក់ប៉ាក់ (២,១ ពាន់លានដុល្លារ) ផលិតផលស្បែក (៩០៣ លានដុល្លារ) សម្លៀកបំពាក់ត្បាញ (៦៨៥ លានដុល្លារ) ស្បែកជើង (៤៨៦ លានដុល្លារ) និងគ្រឿងសង្ហារិម (៤៦៣ លានដុល្លារ) និងផលិតផលកសិកម្មសរុប១៩ លានដុល្លារ៕LA