.jpg)
ចំណតកុងតឺន័រផ្ទុកទំនិញនៅកំពង់ផែស្វយ័តភ្នំពេញ។ កំពង់ផែភ្នំពេញជាច្រកនាំចេញ-នាំចូលទំនិញតាមផ្លូវទឹកដ៏សំខាន់មួយទៅកាន់ទីផ្សារអន្តរជាតិ។ ហេង ជីវ័ន
ភ្នំពេញ: កម្ពុជាបាននាំចេញទំនិញដែលមានតម្លៃជិត ៨០០ លានដុល្លារ ទៅកាន់ទីផ្សារប្រទេសជប៉ុន ដោយធ្លាក់ចុះតិចតួចនៅក្នុងឆមាសទី ១ ឆ្នាំ ២០២០ នេះ បើធៀបនឹងឆមាសទី ១ នៃឆ្នាំមុន ដោយសារការរាតត្បាតជំងឺកូវីដ ១៩ ជះឥទិ្ធពលអវិជ្ជមានដល់សេដ្ឋកិច្ចក្នុងតំបន់ និងសកលលោក។ នេះបើយោងតាមទិន្នន័យពីអង្គការពាណិជ្ជកម្មក្រៅប្រទេសរបស់ជប៉ុន (Jetro)។
ទិន្នន័យរបស់ (Jetro) បានឲ្យដឹងថា កម្ពុជាបាននាំចេញនូវមុខទំនិញផ្សេងៗមកកាន់ប្រទេសជប៉ុន ដែលមានតម្លៃ ៧៩១,៦៦ លានដុល្លារ ក្នុងឆមាសទី ១ ឆ្នាំនេះ ធ្លាក់ចុះ ០,២១ ភាគរយ បើធៀបនឹងរយៈពេលដូចគ្នាកាលពីឆ្នាំមុនដែលមានតម្លៃសរុប ៧៩៣,៣៨ លានដុល្លារ។
ទិន្នន័យដដែលនេះបានបង្ហាញថា កម្ពុជាក៏បាននាំចូលមកវិញមានតម្លៃ ២១៨,៦១ លានដុល្លារ ចាប់ពីខែមករា ដល់ខែមិថុនា ធ្លាក់ចុះ ៣៩ ភាគរយ បើធៀបនឹងរយៈពេលដូចគ្នាកាលពីឆ្នាំមុនមានចំនួន ២៥៦ លានដុល្លារ។
លោក ឈួ វិចិត្រ ប្រធានក្រុមហ៊ុនតំបន់សេដ្ឋកិច្ចពិសេសប៉ោយប៉ែត Sanco Cambo Investment Group Co., Ltd បានប្រាប់ភ្នំពេញ-ប៉ុស្តិ៍កាលពីថ្ងៃព្រហស្បតិ៍ថា ការនាំចេញរបស់កម្ពុជាទៅកាន់ទីផ្សារប្រទេសជប៉ុនធ្លាក់ចុះតិចតួចនេះ ដោយសារការថមថយល្បឿននៃចង្វាក់ផលិតកម្មផ្នែកគ្រឿងបន្លាស់យានយន្តរបស់ក្រុមហ៊ុនជប៉ុនមួយចំនួនក្នុងតំបន់សេដ្ឋកិច្ចពិសេសប៉ោយប៉ែតកាលពីខែមេសា និងខែឧសភា ប៉ុន្តែកំណើនចង្វាក់ផលិតកម្មនេះបានចាប់ផ្តើមមានសម្ទុះងើបឡើងវិញចាប់តាំងពីខែមិថុនាកន្លងមក។
លោកថ្លែងថា៖ «ខ្ញុំមើលឃើញថាពិតជាមានការនាំចេញរបស់យើងថយចុះបន្តិចមែន ព្រោះក្រុមហ៊ុនមួយចំនួននៅក្នុងតំបន់សេដ្ឋកិច្ចខ្ញុំ សកម្មភាពនាំចេញមានការថយចុះ ប៉ុន្តែជាក់ស្តែងការនាំចេញគ្រឿងបន្លាស់អេឡិចត្រូនិក និងគ្រឿងបន្លាស់កុំព្យូទ័រមិនធ្លាក់ចុះទេ»។
បើយោងតាមលោក វិចិត្រ តំបន់សេដ្ឋកិច្ចពិសេសសានកូ-ប៉ោយប៉ែត មានផ្ទៃដីជាង ៨៣ ហិកតា ដោយមានក្រុមហ៊ុនបោះទីតាំងវិនិយោគចំនួន ១០ រួមមាន NHK Spring, Steel Hub, SC Wado Component, (Toyota) Techno Park & Koiwabond ជាដើម។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ការនាំចេញរបស់កម្ពុជានៅពាក់កណ្តាលឆ្នាំនេះហាក់មិនទទួលបានផលវិជ្ជមានប៉ុន្មាននោះទេ ដោយសារបញ្ហាវិបត្តិសុខភាពពិភពលោកដែលកំពុងធ្វើឲ្យប៉ះពាល់ដល់សេដ្ឋកិច្ចនៅក្នុងតំបន់ និងពិភពលោក។
លោកថ្លែងថា៖ «បញ្ហាការរីករាលដាលជំងឺកូវីដ ១៩ បាននាំឲ្យមនុស្សភាគច្រើនផ្អាកទិញរបស់របរប្រើប្រាស់ ដូច្នេះការនាំចេញរបស់យើងរួមមានគ្រឿងអគ្គិសនី សម្លៀកបំពាក់ ស្បែកជើង ជាដើម មានការធ្លាក់ចុះនៅក្នុងអំឡុងពេលនេះ»។
គិតត្រឹមខែកញ្ញា ឆ្នាំ ២០១៩ ការវិនិយោគរបស់ជប៉ុននៅកម្ពុជាមានចំនួន ១៤១ គម្រោងដែលមានទុនវិនិយោគសរុបតម្លៃ ២,៥ ពាន់លានដុល្លារ ក្នុងនោះ ៦៦ គម្រោងនៅក្នុងតំបន់សេដ្ឋកិច្ចពិសេសដែលមានទុនវិនិយោគប្រមាណ ៣៤០ លានដុល្លារ។ នេះបើតាមទិន្នន័យដែលចេញផ្សាយដោយក្រុមប្រឹក្សាអភិវឌ្ឍន៍កម្ពុជា។
ការនាំចេញរបស់កម្ពុជាទៅកាន់ទីផ្សារប្រទេសជប៉ុនសម្រេចបាន ១,៧ ពាន់លានដុល្លារកាលពីឆ្នាំ ២០១៩ កើនឡើង ៧,៧ ភាគរយបើធៀបនឹងឆ្នាំ ២០១៨ ។ នេះបើតាមទិន្នន័យពីអង្គការពាណិជ្ជកម្មក្រៅប្រទេសរបស់ជប៉ុន Jetro៕ LA
