The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​នាំចេញ​ទំនិញ​ទៅ​អាមេរិក​ក្នុង​ឆមាស​ទី​ ១ មាន​តម្លៃ $២,៧៥ ​ពាន់​លាន កើន​ជាង ២៣%

កម្ពុជា​នាំចេញ​ទំនិញ​ទៅ​អាមេរិក​ក្នុង​ឆមាស​ទី​ ១ មាន​តម្លៃ $២,៧៥ ​ពាន់​លាន កើន​ជាង ២៣%

Content image - Phnom Penh Post
ផលិតផល​ទាក់ទង​នឹង​ការធ្វើ​ដំណើរ​ពី​កម្ពុជា​មានដូចជា កាបូបដៃ កាបូបយួរ និង​វ៉ាលីស ​ត្រូវ​បាន​រាប់បញ្ចូល​ជា​ផលិតផល​ទទួលបាន​ប្រព័ន្ធ​អនុគ្រោះ​ពន្ធ​ពី​អាមេរិក (GSP) ​កាលពី​ខែកក្កដា ឆ្នាំ​ ២០១៦​។ ហុង មិនា

កម្ពុជា​នាំចេញ​ទំនិញ​ទៅ​អាមេរិក​ក្នុង​ឆមាស​ទី​ ១ មាន​តម្លៃ $២,៧៥ ​ពាន់​លាន កើន​ជាង ២៣%

ភ្នំពេញៈ ការនាំចេញ​ទំនិញ​ពី​កម្ពុជា​ទៅ​កាន់​ទីផ្សារ​អាមេរិក​មាន​តម្លៃ​ប្រមាណ ២,៧៥ ​ពាន់​លាន​ដុល្លារ​ សម្រាប់​រយៈពេល​ ៦ ​ខែ​ ដោយសារ​កំណើន​ខ្ពស់​នៃ​ការនាំចេញ​ផលិតផល​ទាក់ទង​នឹង​ការធ្វើដំណើរ​ដែល​កម្ពុជា​ទទួលបាន​ប្រព័ន្ធ​អនុគ្រោះ​ពន្ធ​ពី​អាមេរិក​។ នេះ​បើ​យោងតាម​ទិន្នន័យ​ការិយាល័យ​ពាណិជ្ជកម្ម​របស់​រដ្ឋាភិបាល​អាមេរិក​។

ទិន្នន័យ​របស់​ការិយាល័យ​ពាណិជ្ជកម្ម​អាមេរិក​បាន​ឲ្យ​ដឹងថា ការនាំចេញ​ទំនិញ​របស់​កម្ពុជា​ទៅកាន់​ទីផ្សារ​អាមេរិក​នៅ​ក្នុង​ឆមាស​ទី​​ ១ ឆ្នាំ​ ២០២០ សម្រេចបាន ២,៧៥ ​ពាន់​លាន​ដុល្លារ ​កើន ២៣,០៥ ​ភាគរយ​ បើ​ធៀប​នឹង​រយៈពេល​ដូចគ្នា​កាលពី​ឆ្នាំមុន​ដែល​មាន​ចំនួន​ជិត ២,២៤ ​ពាន់​លាន​ដុល្លារ​។

ទិន្នន័យ​នេះ​បង្ហាញ​ថា ការនាំចូល​មកវិញ​របស់​កម្ពុជា​មាន​តម្លៃ ១៤៤,៦ ​លាន​ដុល្លារ​ ធ្លាក់ចុះ ៤៥,៤៣ ភាគរយ​ ធៀប​នឹង​រយៈពេល​ដូចគ្នា​កាលពី​ឆ្នាំ​មុន ដែល​មាន​ចំនួន ២៦៥ ​លាន​ដុល្លារ​។

ផលិតផល​ទាក់ទង​នឹង​ការធ្វើ​ដំណើរ​ពី​កម្ពុជា​មានដូចជា កាបូបដៃ កាបូបយួរ និង​វ៉ាលីស​ត្រូវ​បាន​រាប់បញ្ចូល​ជា​ផលិតផល​ទទួលបាន​ប្រព័ន្ធ​អនុគ្រោះ​ពន្ធ​ពី​អាមេរិក (GSP) ​កាលពី​ខែកក្កដា ឆ្នាំ​ ២០១៦​។

ផលិតផល​សម្លៀកបំពាក់ និង​ស្បែកជើង​ផលិត​នៅ​កម្ពុជា​មិនទាន់​រាប់បញ្ចូល​ក្នុង​ប្រព័ន្ធ GSP របស់​អាមេរិក​នោះទេ​។

លោក ខេន លូ អគ្គលេខាធិការ​សមាគម​រោងចក្រ​កាត់ដេរ​នៅ​កម្ពុជា​ប្រាប់​ភ្នំពេញ​ប៉ុស្តិ៍​​ថា​៖ «​ការនាំចេញ​សំខាន់ៗ​របស់​យើង​ទៅ​អាមេរិក​គឺ​នៅតែ​រក្សា​កំណើន​ល្អ​ដូចជា​ផលិតផល​សម្លៀកបំពាក់ ស្បែកជើង និង​ទំនិញ​ធ្វើដំណើរ​»​។

ទោះយ៉ាងណា​លោក ហេង សួរ អ្នកនាំពាក្យ​ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​ថ្លែង​ក្នុង​សន្និសីទ​សារព័ត៌មាន​កាលពី​ខែ​មុន​ថា ការនាំចេញ​ផលិតផល​ក្នុង​វិស័យ​វាយនភណ្ឌ​កាត់ដេរ​ពី​កម្ពុជា​ទៅ​ទីផ្សារ​អន្តរជាតិ​សម្រេចបាន ៣,៧៨ ​ពាន់​លាន​ដុល្លារ​ក្នុង​ឆមាស​ទី​ ១ ឆ្នាំនេះ​ធ្លាក់ ៥,៤ ​ភាគរយ​បើ​ធៀប​ឆមាស​ទី​ ១ ឆ្នាំ​ ២០១៩​។

លោក​ថ្លែងថា​៖ «​មូលហេតុ​ចម្បង​ដែល​នាំឲ្យ​ថយចុះ​នេះ គឺ​ផលប៉ះពាល់​នៃ​ជំងឺ​កូវីដ​ ១៩ ដែល​ធ្វើឲ្យ​តម្រូវការ និង​ការបញ្ជា​ទិញ​ធ្លាក់ចុះ​។ ការថយចុះ​នេះ មិនមែន​ប៉ះពាល់​តែ​នៅក្នុង​វិស័យ​កាត់ដេរ​នេះ​នៅ​កម្ពុជា​ទេ គឺជា​សកល​តែម្តង​»​។

បើតាម​លោក ហេង សួរ ក្នុង​ឆមាស​ទី​ ១ រោងចក្រ​កាត់ដេរ​សម្លៀកបំពាក់ និង​ស្បែកជើង​នៅ​កម្ពុជា​ចំនួន ៤៥០ ​បាន​ព្យួរការងារ ខណៈ ៨៣ បាន​បិទទ្វារ ចំណែក​រោងចក្រ ១០ បាន​បង្វែរ​ទៅ​ផលិត​ម៉ាស់​។

លោក វង្សី វិស្សុត រដ្ឋលេខាធិការ​ប្រចាំការ​ក្រសួង​សេដ្ឋកិច្ច​បាន​និយាយថា ទោះបី​ការនាំចេញ​វិស័យ​វាយនភណ្ឌ​ធ្លាក់ចុះ​នៅ​ឆមាស​ទី​ ១ ប៉ុន្តែ​ការនាំចេញ​ផលិតផល​ពី​កម្ពុជា​រួមមាន កង់ និង​អង្ករ​នៅតែ​រក្សា​កំណើន​ល្អ​គួរ​ឲ្យ​កត់សម្គាល់​។

លោក​ថ្លែងថា​៖ «​ការនាំចេញ​ផលិតផល​សម្លៀកបំពាក់​ធ្លាក់ចុះ​ទៅកាន់​ទីផ្សារ​អឺរ៉ុប​មែន តែ​ការនាំ​ចេញ​ទៅ​អាមេរិក​កើនឡើង​វិញ ដូច្នេះ​ទើប​ការនាំចេញ​នេះ​ធ្លាក់​ប៉ុណ្ណឹង​»៕ LA

អត្ថបទគួរចាប់អារម្មណ៍

  • ភ្នំពេញ៖ រដ្ឋមន្ត្រី​ក្រសួង​យុត្តិធម៌​លោក​ កើត ​រិទ្ធ​ បាន​ប្រាប់​ឯកអគ្គ​រាជទូត​អូស្ត្រាលី​លោក ​Pablo​ Kang ​នៅ​ក្នុង​ជំនួប​កាល​ពី​ថ្ងៃ​អង្គារ នៅ​ក្រសួង​យុត្តិធម៌​ថា​ ការ​ចាប់​ខ្លួន​បុគ្គល​ណា​មួយ​ដោយ​សមត្ថកិច្ច គឺ​ធ្វើ​ទ្បើង​ដោយ​អនុលោម​តាម​ច្បាប់​​កម្ពុជា។​

  • ភ្នំពេញ៖ ដោយ​សង្កេត​ឃើញ​ពី​ការ​ប្រឈម​របស់​​ប្រជាកសិករ​កម្ពុជា​​មួយ​ចំនួន​ ជាពិសេស​អ្នក​នៅ​ទី​ដាច់​ស្រយាល​ ដែល​បាត់បង់​ទីផ្សារ​​​​ព្រោះ​តែ​វិបត្តិ​កូវីដ យុវជន ​១ ក្រុម ​បាន​រួមគ្នា​បង្កើត​គម្រោង​ COVID Farmer Hacker ដើម្បី​ជួយ​​អ្នក​ខិតខំ​ដាំដុះ​តែ​ត្រូវ​រងគ្រោះ​ពី​ការ​រំខាន​ដល់​​​សេដ្ឋកិច្ច​​បង្ក​ដោយ​វីរុស​កូរ៉ូណា។​

  • ភ្នំពេញ៖ គ្រឹះស្ថាន​មីក្រូហិរញ្ញវត្ថុ ប្រាសាក់ ​​ដែល​ចុះ​បញ្ជី​សញ្ញាប័ណ្ណ​សាជីវកម្ម​នៅ​ផ្សារ​មូលបត្រ​កម្ពុជា ​(CSX) បាន​រាយការណ៍​អំពី​ប្រតិបត្តិការ​អាជីវកម្ម​ដ៏​ល្អ​ប្រសើរ​នៅ​ត្រីមាស​ទី​២ ​ឆ្នាំ​នេះ ទោះបី​ជា​​ខ្លួន​ទទួល​រង​នូវ​សម្ពាធ​ខ្លះៗ​ពី​ការ​រីក​រាលដាល​ជំងឺ​កូវីដ ​១៩ ​ដែល​បណ្ដាល​ឱ្យ​សេដ្ឋកិច្ច​របស់​កម្ពុជា មាន​ការ​ធ្លាក់ចុះ​ក៏​ដោយ​។​

  • ភ្នំពេញ៖ ​លោកស្រី​ ​ភឿង​ សកុណា ​រដ្ឋមន្រ្តី​ក្រសួង​វប្បធម៌​ និង​វិចិត្រ​សិល្បៈ​បាន​ចេញ​សេចក្ដី​ណែនាំ​ដល់​គ្រប់​អង្គភាព​ពាក់ព័ន្ធ​ក្រោម​ឱវាទ​ក្រសួង​វប្បធម៌ ​និង​គ្រប់​រដ្ឋបាល​ថ្នាក់​ក្រោម​ជាតិ ​អនុវត្ត​នីតិវិធី​ និង​ទម្រង់​បែបបទ​នៃ​ការ​គ្រប់គ្រង​អាជីវកម្ម​កាត់សក់​ ​អ៊ុត​សក់​ និង​លម្អ​ក្រចក

  • ភ្នំពេញ៖ ​រដ្ឋមន្រ្តី​ក្រសួង​សុខាភិបាល​លោក ​ម៉ម​ ប៊ុន​ហេង បាន​ជំរុញ​ឱ្យ​គ្រប់​ភាគី​ពាក់ព័ន្ធ​ទាំង​អស់​ ដែល​ធ្វើ​ការ​ផ្នែក​គាំពារ​មាតា​ និង​ទារក​ ត្រូវ​​បង្កើន​យុទ្ធនាការ​អប់រំ​ផ្សព្វផ្សាយ​អំពី​សារៈសំខាន់​នៃ​ការ​បំបៅ​កូន​ដោយ​ទឹក​ដោះ​ម្តាយ​ និង​ហានិភ័យ​ពី​ការ​បំបៅ​កូន​ដោយ​ទឹក​ដោះ​គោ​ម្សៅ​ផ្សំ​តាម​រូបមន្ត​ទាំង​នៅ​ថ្នាក់​ជាតិ​ និង​ថ្នាក់​ក្រោម​ជាតិ។

  • មណ្ឌលគិរី៖ សាលា​ដំបូង​ខេត្ត​មណ្ឌលគិរី ពី​ម្សិលមិញ​បាន​សម្រេច​ឃុំ​ខ្លួន​ចាងហ្វាង​សារព័ត៌មាន​អនឡាញ​ម្នាក់​នៅ​ពន្ធនាគារ​​ខេត្ត​ក្រោម​បទ​ចោទ ​«ឈូស​ឆាយ​ដី​ព្រៃ​ដោយ​គ្មាន​ការ​អនុញ្ញាត​» បន្ទាប់​ពី​សមត្ថកិច្ច​ឃាត់​ខ្លួន​កាល​ពី​​ថ្ងៃទី ២២ កញ្ញា ​តាម​ដីកា​តុលាការ​ពាក់ព័ន្ធ​ការ​ឈូស​ឆាយ​ដី​ព្រៃ ​និង​ប្រើប្រាស់​សារធាតុ​ញៀន។