ភ្នំពេញៈ ប្រទេសកម្ពុជាបាននាំចេញផលនេសាទសរុប ៣ ៥៩០ តោន ទៅកាន់ទីផ្សារអន្តរជាតិក្នុងតម្លៃសរុបជាង ៨,៣៣ លានដុល្លារ កាលពីឆ្នាំ ២០២០ ធ្លាក់ ៧៤,៥៣ ភាគរយ បើធៀបទៅនឹងឆ្នាំ ២០១៩ ដែលមានចំនួន ១៤ ១០០ តោន។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។
អ្នកក្នុងវិស័យជលផលអះអាងថា ការធ្លាក់ចុះនេះគឺដោយសារក្នុងអំឡុងពេលមានការរីករាលដាលជំងឺកូវីដ ១៩ ការនាំចូល នាំចេញផលនេសាទត្រូវបានរឹតបន្តឹង ដើម្បីធានាបានសន្តិសុខស្បៀងអាហារនៅក្នុងប្រទេស។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថាក្នុងឆ្នាំ ២០២០ កន្លងមកកម្ពុជាប្រមូលផលជលផលបានចំនួនសរុប ៩៣៦ ៣០០ តោន ដោយក្នុងនោះផលិតផលទឹកសាបមានចំនួន ៤១៣ ២០០ តោន ផលនេសាទសមុទ្រ ១២២ ៧០០ តោន និងផលវារីវប្បកម្មចំនួន ៤០០ ៤០០ តោន។
តម្លៃសរុបនៃផលិតផលទឹកសាប និងសមុទ្រក្នុងឆ្នាំ ២០២០ មានចំនួន ១,០៧ ពាន់លានដុល្លារ និងតម្លៃសរុបនៃផលិតផលវារីវប្បកម្មមានចំនួន ៨០០,៨ លានដុល្លារ។ នេះបើតាមលោក វេង សាខុន។
លោក សុខ រ៉ាដែន ប្រធានសមាគមវារីវប្បកម្មនៅកម្ពុជាបានប្រាប់ ភ្នំពេញ ប៉ុស្តិ៍ ថា បច្ចុប្បន្នរដ្ឋាភិបាលកំពុងជំរុញ និងលើកទឹកចិត្តឱ្យមានការបង្កើនសមត្ថភាពផលិតផលិតផលជលផលឱ្យបានច្រើនដើម្បីធានាការផ្គត់ផ្គង់នៅក្នុងស្រុកមុននឹងឈានទៅដល់ការនាំចេញនៅពេលអនាគត។ លោក រ៉ាដែន បន្ថែមថាទោះជាយ៉ាងណា រដ្ឋាភិបាលក៏ត្រូវជំរុញ និងលើកកម្ពស់ហេដ្ឋារចនាសម្ព័ន្ធក្នុងវិស័យជលផល ពិសេសប្រព័ន្ធទឹកត្រូវមាននិរន្តរភាព។
លោកនិយាយថា៖ «ដើម្បីជំរុញការនាំចេញបានទាល់តែផលិតផលយើងមានគុណភាពល្អ យើងអាចមានការផលិតចំណីត្រីដោយខ្លួនឯង និងមានតម្លៃទាបសមរម្យហើយតម្លៃអគ្គិសនីក៏ទាបដែរ ដើម្បីអាចប្រកួតប្រជែងបាន»។
លោក ហេង សុភារិទ្ធ នាយខណ្ឌរដ្ឋបាលជលផល ខេត្តកណ្តាល បាននិយាយថា រដ្ឋបាលជលផលខេត្តកណ្តាលកំពុងជំរុញវារីវប្បកម្មដើម្បីបង្កើនសមត្ថភាពផលិតក្នុងអំឡុងពេលមានការរីករាលដាលជំងឺកូវីដ១៩។ លោកបានបន្ថែមថា៖ «ការធ្វើវារីប្បកម្មលក្ខណៈគ្រួសារកំពុងមាននិន្នាការកើនឡើងយ៉ាងខ្លាំង នៅពេលនេះ»។
លោកប្រាប់ទៀតថា រដ្ឋបាលជលផលខេត្តកំពុងមានគោលដៅជំរុញវារីប្បកម្មពីលក្ខណៈគ្រួសារទៅជាលក្ខណៈពាណិជ្ជកម្មផងដែរ។
លោក វេង សាខុន កន្លងមកធ្លាប់បានលើកឡើងថា រដ្ឋាភិបាលកំពុងខិតខំប្រឹងប្រែងជំរុញវារីវប្បកម្ម ដើម្បីបង្កើនសមត្ថភាពផ្គត់ផ្គង់ក្នុងស្រុក និងឈានទៅដល់ការនាំចេញផលនេសាទពីកម្ពុជាទៅទីផ្សារអន្តរជាតិនៅពេលអនាគត។
លោកមានប្រសាសន៍ថា៖ «ខ្ញុំជឿថា តាមរយៈការខិតខំប្រឹងប្រែងនាពេលនេះ វិស័យឯកជននឹងមើលឃើញថា កម្ពុជាអាចឈានដល់ការនាំចេញផលនេសាទទៅទីផ្សារអន្តរជាតិដោយការចិញ្ចឹមសម្រាប់នាំចេញតាមបែបផែនផលិតកម្ម ដើម្បីអាចឆ្លើយតបនឹងតម្រូវការទីផ្សារ។ យើងត្រូវមានការកែលម្អការចិញ្ចឹម ដើម្បីឆ្លើយតបនឹងស្តង់ដារបស់គេស្របពេលប្រមុខរដ្ឋាភិបាលកំពុងធ្វើការកែលម្អការដឹកជញ្ជូនទំនិញ»។
របាយការណ៍ពីរដ្ឋបាលជលផលឱ្យដឹងថា តាមរយៈការអនុវត្តផែនការយុទ្ធសាស្ត្រវិស័យជលផលឆ្នាំ ២០១៥-២០២៤ និងផែនការយុទ្ធសាស្ត្រជាតិអភិវឌ្ឍន៍វារីវប្បកម្ម ២០១៦-២០៣០ កន្លងមក រដ្ឋបាលជលផលសង្ឃឹមថា នៅឆ្នាំ ២០២៤ កម្ពុជាអាចផ្គត់ផ្គង់ផលជលផលតាមរយៈការធ្វើវារីវប្បកម្មបាន ៧៤០ ០០០ តោន៕
វីដេអូ៖