.jpg)
គ្រាប់ស្វាយចន្ទី ៧៩ ៤៧៣ តោន ត្រូវបាននាំចេញក្នុងរយៈពេល ២ ខែដំបូង ដើមឆ្នាំ ២០២១។ ហុង មិនា
ភ្នំពេញៈ ការនាំចេញផលិតផលកសិកម្មទៅកាន់ទីផ្សារអន្តរជាតិកើនឡើងយ៉ាងគំហុករហូតដល់ជាង ៥៥ ភាគរយក្នុងរយៈពេល ២ ខែដើមឆ្នាំនេះធៀបនឹងរយៈពេលដូចគ្នានៃឆ្នាំ ២០២០។ នេះយោងតាមបណ្តាញសង្គមហ្វេសប៊ុករបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដោយមិនបានបញ្ជាក់នូវមូលហេតុនាំឱ្យមានកំណើននោះទេ។
កំណើន ៥៥,២៧ ភាគរយ បានធ្វើឱ្យបរិមាណផលិតផលកសិកម្មនាំចេញសរុបដល់ ១ ៥៩៩ ៩២២ តោន ទៅកាន់គោលដៅ ២៥ ប្រទេស។ នេះបើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោកលើកឡើងថា ក្នុងចំណោមផលិតផលដែលបាននាំចេញទាំងអស់មានផលិតផលមួយចំនួនបានទទួលបញ្ជាទិញបានច្រើនជាងគេ រួមមាន ដំឡូងមីក្រៀមមានចំនួន ៨០២ ៤៥១,៥៦ តោន និងដំឡូងមីស្រស់មានចំនួន ១៥៤ ៧៥០ តោន។ ស្រូវចំនួន ២៨៧ ៨៥០ តោន ដោយមិនបានឆ្លងកាត់ច្រកភូតគាមអនាម័យមានចំនួន ៥៥៩ ០៣៣ តោន។
កសិផលផ្សេងទៀតមានដូចជាគ្រាប់ស្វាយចន្ទី ៧៩ ៤៧៣ តោន គ្រាប់ពោតក្រហម ៧៨ ៨៥៦ តោន ផ្លែចេកស្រស់ ៧៥ ៦៤៥,៥៧ តោន ផ្លែស្វាយស្រស់ ៤៣ ៦៨០ តោន និងម្ទេសស្រស់ ៣២ ៤១៧ តោន ដូងប្រេង ៧ ១៧៦ តោន កន្ទក់ ៦ ២៥០ តោន និងផលិតផលចំនួន ៣៣ មុខផ្សេងទៀតសរុបចំនួន ៣១ ៣៧១ តោន។
អ្នកស្រី អ៊ិន ឡៃហួត ម្ចាស់សិប្បកម្មកែច្នៃគ្រាប់ស្វាយចន្ទីម៉ាដាមហួតនៅខេត្តកំពង់ធំអះអាងថា គ្រាប់ស្វាយចន្ទីកំពុងមានទីផ្សារល្អជាងឆ្នាំមុន ហើយសិប្បកម្មរបស់អ្នកស្រីក៏បានបង្កើនការកែច្នៃដោយបន្ថែមកម្លាំងពលកម្មរហូតដល់ ៨០ នាក់ ដើម្បីបង្កើនល្បឿនចង្វាក់ផលិតកម្មឆ្លើយតបនឹងការបញ្ជាទិញ។
អ្នកស្រី ឡៃហួត បន្ថែមថា ក្នុងឆ្នាំនេះអ្នកស្រីត្រូវការគ្រាប់ស្វាយចន្ទីស្រស់ ៩០ តោន ដែលនឹងកែច្នៃជាផលិតផលសម្រេច ១៥ តោន សម្រាប់បំពេញតាមការបញ្ជាទិញរបស់ក្រុមហ៊ុន Top Planning Japan Co., Ltd។
អ្នកស្រីបន្ត៖ «ខ្ញុំរីករាយណាស់ដែលបានទិញគ្រាប់ស្វាយចន្ទីពីសហគមន៍ និងបង្កើតការងារដល់ពួកគាត់»។
កម្ពុជាបាននាំចេញផលិតផលដំណាំកសិឧស្សាហកម្មចំនួន ៦ ទាំងផ្លូវការ និងក្រៅផ្លូវការសម្រេចបានជាង ៨,៥៥ លានតោន ដែលមានតម្លៃទឹកប្រាក់ជាង ២,៣២ ពាន់លានដុល្លារនៅឆ្នាំ ២០២០។ ផលិតផលទាំងនោះរួមមាន ផលិតផលដំឡូងមី ផ្លែស្វាយស្រស់ គ្រាប់ស្វាយចន្ទី ផ្លែចេកស្រស់ មៀនប៉ៃលិន និងម្រេច។ នេះយោងតាមតួលេខក្រសួងកសិកម្ម រុក្ខាប្រមាញ់ និងនេសាទ៕ LA
