.jpg)
កប៉ាល់ផ្ទុកកុងតឺន័រដឹកទំនិញចេញពីកំពង់ផែស្វយ័តភ្នំពេញ។ ហេង ជីវ័ន
ភ្នំពេញ: ការនាំចេញកសិផលរបស់កម្ពុជាទាំងផ្លូវការ និងក្រៅផ្លូវការទៅកាន់ទីផ្សារអន្តរជាតិក្នុងរយៈពេល ៣ ខែដំបូងឆ្នាំ ២០២០ សម្រេចបានជិត ៣ លានតោន ទោះបីជាកម្ពុជាកំពុងប្រយុទ្ធនឹងការរីករាលដាលនៃវីរុសកូរ៉ូណាក៏ដោយ។ នេះបើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។
របាយការណ៍បង្ហាញថា កសិផលសំខាន់ៗដែលកម្ពុជានាំចេញជាផ្លូវការរួមមាន អង្ករ ដំឡូងមី ម្រេច កៅស៊ូ ស្វាយ ស្វាយចន្ទី ចេក ពោត សណ្តែកសៀង បន្លែ និងថ្នាំជក់។ ចំណែកការនាំចេញក្រៅផ្លូវការគឺស្រូវ និងដំឡូងមីស្រស់ទៅកាន់ប្រទេសវៀតណាម។
របាយការណ៍បន្តថា ការនាំចេញអង្ករកម្ពុជាសម្រេចបានជាង ២៣០ ៩៤៨ តោន ក្នុងរយៈពេល ៣ ខែឆ្នាំនេះកើនឡើង ៣៥,២០ ភាគរយ ធៀបនឹងរយៈពេលដូចគ្នាកាលពីឆ្នាំ ២០១៩។ ក្នុងនោះការនាំចេញទៅប្រទេស ចិន មានចំនួន ១០១ ៣៤៥ តោន ស្មើនឹង ៣៤,៨៨ ភាគរយ ទៅអឺរ៉ុប ៧០ ០៤០ តោន ស្មើនឹង ៣០,៣៣ ភាគរយ ខណៈការនាំចេញទៅប្រទេសក្នុងតំបន់អាស៊ានមាន ២៨ ៧៩៩ តោន ស្មើនឹង ១២,៤៧ ភាគរយ និងទិសដៅនាំចេញផ្សេងទៀតមាន ៣០ ៧៦៤ តោន ស្មើនឹង ១៣,៣២ ភាគរយ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) បានប្រាប់ភ្នំពេញប៉ុស្តិ៍កាលពីថ្ងៃពុធថា បើទោះបីជាសកលលោករួមទាំងកម្ពុជាកំពុងប្រឈមមុខនឹងការរីករាលដាលវីរុសកូរ៉ូណាក៏ដោយ តែការនាំចេញអង្កររបស់កម្ពុជានៅតែរក្សាកំណើនយ៉ាងរឹងមាំ។ លោកថ្លែងថា៖ «ការនាំចេញកើនឡើងនេះដោយតម្រូវការស្បៀងពិភពលោកមានការកើនឡើង ស្របពេលមនុស្សមានការភ័យខ្លាចជំងឺកូវីដ ១៩ បានជំរុញឲ្យពួកគេទិញស្បៀងស្តុកទុក»។
របាយការណ៍ខាងលើបានឲ្យដឹងទៀតថា ការនាំចេញម្រេចរបស់កម្ពុជាបានចំនួនជាង ២៩៩ តោន ដោយនាំចេញទៅកាន់ប្រទេសជប៉ុន អាលឺ្លម៉ង់ បែលហ្ស៊ិក ហូឡង់ បារាំង អាមេរិក ស្វ៊ីស វៀតណាម រុស្ស៊ី អង់គ្លេស និងប្រទេសឥណ្ឌា។
លោក ងួន ឡាយ ប្រធានសមាគមលើកកម្ពស់ម្រេចកំពត (KPPA) ប្រាប់ភ្នំពេញប៉ុស្តិ៍កាលពីថ្ងៃពុធថា ម្រេចកំពតដែលជាដំណាំសម្គាល់ទីតាំងភូមិសាស្ត្រ (GI) បច្ចុប្បន្នប្រជាកសិករកំពុងមមាញឹកប្រមូលផលម្រេចដែលលោករំពឹងថានឹងប្រមូលបានប្រហាក់ប្រហែលឆ្នាំមុនគឺ ១០០ តោនក្នុងរដូវប្រមូលផលឆ្នាំនេះ។
លោកបញ្ជាក់ថា៖ «ទោះបីជាយ៉ាងណាសព្វថ្ងៃកសិករប្រមាណ ២០ ភាគរយបានសម្រេចបោះបង់ការដាំដុះ និងការប្រមូលផលម្រេចដោយសារបញ្ហាកង្វះទីផ្សារ»។
លោកបញ្ជាក់ថា កាលពីឆ្នាំមុនម្រេចកំពតបាននាំចេញសម្រេចបាន ៨០ តោន កើនឡើងប្រមាណ ២០ តោន បើធៀបនឹងឆ្នាំ ២០១៨។ លោកថ្លែងថា៖ «ការនាំចេញម្រេចកំពតកើនឡើងកាលពីឆ្នាំមុនដោយសារម្រេចកំពតបានពង្រីកទីផ្សារទៅកាន់ប្រទេសកូរ៉េខាងត្បូង»។
លោកបន្តថា បច្ចុប្បន្ន KPPA បានធ្វើជាដៃគូជាមួយក្រុមហ៊ុនចំនួន ៣៨ ដើម្បីនាំម្រេចទៅទីផ្សារអន្តរជាតិ។ តម្លៃម្រេចកំពតនៅរក្សា ១៥ ដុល្លារក្នុង ១ គីឡូក្រាម សម្រាប់ម្រេចខ្មៅ ២៥ ដុល្លារ សម្រាប់ម្រេចក្រហម និង ២៨ ដុល្លារសម្រាប់ម្រេចស។
លោកនាយករដ្ឋមន្ត្រី ហ៊ុន សែន បានផ្តល់អនុសាសន៍ឲ្យត្រៀមនូវវិធានការសេដ្ឋកិច្ចដែលរងផលប៉ះពាល់ជាសកលដោយជំងឺកូវីដ ១៩ គឺត្រូវពង្រឹងវិស័យកសិកម្ម។
លោកថ្លែងថា៖ «យើងត្រូវត្រៀមទុកនូវវិធានការសេដ្ឋកិច្ចដែលរងផលប៉ះពាល់ជាសកលដោយសារជំងឺបង្កឡើងដោយវីរុសកូរ៉ូណាដែលអាចបន្តអូសបន្លាយរយៈពេលយូរគឺត្រូវពង្រឹងវិស័យកសិកម្មដែលជាចំណុចខ្លាំងរបស់កម្ពុជា ពិសេសការត្រៀមទំនិញស្បៀងចាំបាច់សម្រាប់ប្រជាជនកម្ពុជាដូចជា អង្ករ និងអំបិល។
ទន្ទឹមនឹងនេះរដ្ឋាភិបាលកម្ពុជាក៏បានសម្រេចផ្អាកការនាំចេញអង្ករស និងស្រូវ ជាបណ្តោះអាសន្នចាប់ពីថ្ងៃទី ៥ ខែមេសា តទៅ ដើម្បីធានាការផ្គត់ផ្គង់ក្នុងស្រុកឲ្យបានគ្រប់គ្រាន់ ធានាសន្តិសុខស្បៀង និងស្ថិរភាពតម្លៃនៅកម្ពុជា ក្នុងអំឡុងពេលនៃការរាតត្បាតជំងឺកូវីដ ១៩។
បើយោងតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទកាលពីឆ្នាំ ២០១៩ កម្ពុជាបាននាំចេញផលិតផលកសិកម្មជាង ៥,៤ លានដុល្លារ រួមមាន អង្ករ ម្សៅ ដំឡូងមី ដំឡូងមីស្រស់ គ្រាប់ស្វាយចន្ទី ពោត ស្វាយ និងបន្លែជាដើម៕ LA
